Rýhanııat • 07 Qarasha, 2019

Jastar jazýshy Jabal Erǵalıevpen kezdesti

103 retkórsetildi

Búgin  Qazaqstan Respýblıkasynyń Tuńǵysh Prezıdenti – Elbasy kitaphanasynyń mýzeıinde Qazaqstan Jazýshylar odaǵy jáne Jýrnalıster odaǵynyń múshesi, Parlamenti Senatynyń V-VI shaqyrylymdarynyń depýtaty Jabal Erǵalıevpen kezdesý ótti. Bul týraly kitaphananyń baspasóz qyzmeti habarlady. 

Is-sharany ashqan Elbasy kitaphanasy dırektorynyń orynbasary Botagóz Qaıypova:

– Qalamgerlik – qıyndyǵy men qyzyǵy mol, jan-jaqty bilimdi talap etetin jaýapty sala. El ıgiligi úshin qyzmet etetin osy salanyń mamandary shyǵarmashylyǵy arqyly adamzat sanasyna oń yqpalyn tıgizip qana qoımaı, jańalyqtyń jaqtaýshysy, jańanyń qoldaýshysy retinde qoǵam ómirinen erekshe oryn alady. Halyqtyń mádenıeti men rýhanııatyn tereń qasterlegen sondaı janashyr azamattardyń biri – Jabal Erǵalıuly. Ol kisiniń qalamynan tamǵan týyndylardy búgingi qazaq ádebıetiniń qundy qazynasyna balaýǵa bolady, - dep jazýshyǵa qurmet bildirdi.

Keleli kezdesýge «Bolashaqqa jol ózińnen bastalady» semınar-trenınginiń tyńdaýshylary, Qaraǵandy memlekettik tehnıkalyq ýnıversıteti, D. Serikbaev atyndaǵy Shyǵys Qazaqstan memlekettik tehnıkalyq ýnıversıteti, SILKWAY halyqaralyq ýnıversıtetiniń stýdentteri, bas qalanyń belsendi jastary qatysty.

– Eki kúnniń kóleminde bilim qoryn barynsha jan-jaqty toltyrýǵa tyrystyq. Semınar-trenıngterdiń aıasynda biz Jastar jyly men Eriktiler jylyna arnalǵan jobalardy júıelep, olardy túrli óńirlerden kelgen stýdenttermen birge qorǵadyq. Tanysýdyń arqasynda dostar qataryn tolyqtyryp qana qoımaı, aqyl-parasatymen boı túzeter bedeldi azamattardyń esimin de, ósıetin de bilip júretin boldyq. Baǵdarlamamyzdyń oqýmen ǵana shektelmeı, rýhanı, mádenı azyq berer qyzyq sharalarmen tolyqtyrylǵanyn Elbasy kitaphanasynyń bizge degen qurmeti dep bilemiz. Semınar-trenıngtiń sapasy men tıimdiligin stýdentter qaýymy da, bizben kelgen ustaz mamandar da bir aýyzdan joǵary baǵalady. Bul bastamamen jastarǵa qamqorlyq jasap otyrǵan Tuńǵysh Prezıdentke basymyzdy ıip, semınardy uıymdastyrǵan Elbasy kitaphanasyna zor alǵysymyzdy bildiremiz, - dedi 4-kýrs stýdenti, qaraǵandylyq Jalǵas Tólebaev.

Jastarǵa rızashylyǵyn bildirgen Jabal Erǵalıuly ósıetimen olardy qanattandyrdy jáne rýhtandyrdy:

– Kezdesýdiń mańyzy tereń maǵynaǵa ıe. Bul kúnniń ózi tarıhı sát ekenimen tyńdaýshylardyń kelisetinine senimdimin. Tuńǵysh Prezıdent kúni men Táýelsizdik kúni merekeleri qarsańynda elimizdiń túkpir-túkpirinen kelgen jastardyń Elbasy saıasatyn qoldaıtynyn kórip, ishteı qýandym. Sebebi, egemen eldiń búgingi býyny Elbasy men táýelsizdik uǵymdarynyń tyǵyz baılanysyn moıyndap qana qoımaı, memlekettiń erteńi men halyqtyń múddesin óz jaýapkershiligine alýǵa daıyn. Ult janashyrlary men otansúıgish jastardyń suhbatyn júzege asyrǵan Elbasy kitaphanasyna alǵysym mol. Keregemizdiń myqty, shańyraǵymyzdyń bıik bolǵanyn tileımin!

Jabal Erǵalıuly – tanymal jýrnalıst, jazýshy-dramatýrg jáne qoǵam qaıratkeri. Ol «Qurmet» ordeni, «Eńbektegi erligi úshin», «Qazaqstan Konstıtýsııasyna – 10 jyl», «Astanaǵa 10 jyl», «Qazaqstan Respýblıkasyna 20 jyl» mereıtoılyq tósbelgileriniń ıegeri, Jambyl atyndaǵy halyqaralyq syılyqtyń laýreaty. Kezdesý barysynda jazýshy keıingi býyndy shyǵarmashylyǵymen tanystyryp, olardyń nazaryna týyndylaryn usyndy.

Búginde onyń «Qazaqtyń Qarasaı batyry», «Sóne kórme, juldyzdar», «Ultym meniń, ulysym meniń», «Han kótergen el edik er ulanyn», «Bultty túngi tolǵan Aı», «Jolsapar jalǵasa beredi», «Táýelsizdik tolǵaýy», «Álemdi júregine syıǵyzǵan», «Qulpytastyń kóz jasy», «Leto bez dojdıa» kitaptary, «Sońǵy tuıaq», «Eski arba» povesteri oqyrmandarǵa jol tartyp úlgergeni belgili. Olardyń qatarynan «Bultty túngi tolǵan Aı», «Toıǵandar men tozǵandar», «Jetim taǵdyr» atty dramalyq shyǵarmalary teatr sahnalarynda qoıylyp keledi.

Sońǵy jańalyqtar

Altyn ordanyń aq tańy

Rýhanııat • Keshe

Qobyz bizge qaı dáýirden jetken?

Rýhanııat • Keshe

Almatyda kitap kórmesi ashyldy

Rýhanııat • Keshe

Kúlki kerýeni № 23

Rýhanııat • Keshe

Jańǵyrǵan Jambyl óńiri

Aımaqtar • Keshe

Baǵa QR kodtar arqyly beriledi

Medısına • Keshe

Rýhanı ráýishtegi tartý

Aımaqtar • Keshe

Turar taǵdyrynyń taǵylymy mol

Rýhanııat • Keshe

Orynbor jáne qazaq zııalylary

Rýhanııat • Keshe

El erteńi – jalyndy jastar

Prezıdent • Keshe

Uqsas jańalyqtar