Oblys ortalyǵynyń turǵyny Serikbaı Ramazanuly ishki ister salasyndaǵy qyzmetin 1983 jyly Qorǵasyn-myrysh kombınatynda (qazirgi «Qazsınk» JShS) kúzetshilikten bastap, shahardaǵy burynǵy Oktıabr aýdandyq ishki ister bóliminiń qylmyspen kúres bóliminde jedel ýákil, aǵa jedel ýákil, qalalyq ishki ister bóliminiń kezekshi bóliminde jedel kezekshi, keıin qalalyq Jedel basqarý ortalyǵynda jedel kezekshi qyzmetterin atqarypty. «Osy ortalyq ashylǵanda jumys istedim. Tájirıbeli qyzmetker retinde meni sonda jiberdi. Úsh jyldaı jedel kezekshi bolyp eńbek ettim. Keıin О́skemen qalalyq Ishki ister basqarmasynyń jedel kezekshi bóliminiń bólim basshysy qyzmetine shaqyrylyp, 2007 jyly sol jerden zeınetkerlikke shyqtym. Bir qyzyǵy, kóbinde kezekshi bólimde jumys isteppin. О́zim negizi Tarbaǵataı aýdany Qabanbaı aýylynyń týmasymyn, 1979 jyly mektep bitirip, qalaǵa keldik. Ákeden 6 jasymda qalyp, anamyzdyń tárbıesin kórdik. Sheshem 5 balany qanattyǵa qaqtyrmaı, tumsyqtyǵa shoqyttyrmaı ósirdi. Balalarymnyń eshqaısysyna osy salaǵa bar nemese barma dep aıtqan emespin. О́zderi tańdady. Meniń jolymdy eń birinshi qyzym Dınara jalǵady. Qazir Nur-Sultan qalasynda Ulttyq qaýipsizdik komıtetinde jumys isteıdi. Qyzymnyń jubaıy, ıaǵnı kúıeý balamyz Rýslan da polısııa maıory», deıdi ishki ister salasynyń ardageri.
Serikbaı Nurmuhanbetovtiń uly Dastan búginde О́skemen qalalyq polısııa basqarmasy Jedel basqarý ortalyǵynda jedel kezekshi qyzmetin atqarady. Ol mektep bitirgen soń Sársen Amanjolov atyndaǵy ShQMÝ-da mýzyka pániniń muǵalimi mamandyǵy boıynsha bilim alǵanymen, áskerı boryshyn ótep kelgennen keıin áke jolyn jalǵastyrýdy jón dep uıǵarypty. «Ishki ister organdarynda 2011 jyldan beri jumys istep kelemin. Eńbek jolymdy atty ásker vzvodynda patrýldik polısııa bolyp bastadym. Keıin Ertis polısııa bóliminde kámeletke tolmaǵandar isi jónindegi ınspektor, osy bólimniń kezekshi bóliminde ınspektor qyzmetterin atqardym. Sońǵy eki jarym jyl Jedel basqarý ortalyǵynda eńbek etip jatyrmyn. Polısııa bolý – óz tańdaýym. Kózimizdi ashyp kórgenimiz mılısııa formasy bolǵandyqtan, tańdaýymyz osy salaǵa bekerge túspegeni anyq. Jumystaǵy áriptesterim keıde meni ákemmen shatastyryp jatady. Bir qyzyǵy, ákem jumys istegen jerlerde men de jumys istep jatyrmyn. Jubaıym Aqbotamen 2014 jyly Ertis polısııa bóliminde jumys istep júrgen kezde tanystym», deıdi áke jolyn qýǵan tártip saqshysy.
Dastannyń jubaıy Aqbota Nurmuhanbetova oblystyq Polısııa departamentiniń kadr jumysy basqarmasynda polısııa ınspektory. «Polıseı bolýdy bala kezimnen armandadym. «О́skende kim bolasyń?» degende «Mılısııa bolamyn» deıtinmin. Armanym oryndaldy. Meniń týǵan aǵam da ishki ister salasynda jumys istegen. О́zim 5 jyl Ertis polısııa bóliminde kámeletke tolmaǵandar isi jónindegi ınspektor qyzmetin atqardym. Osy salada jumys istep jatqanyma 7 jylǵa jýyqtady» deıdi búginde bala tárbıesimen ýaqytsha úıde otyrǵan Aqbota.
Oraıy kelgende aıta keteıik, búginde Dastan men Aqbota eki qyz ben bir uldy tárbıelep otyr.
О́SKEMEN
Sýretterdi túsirgen Mereı QAINAROV
