«Barystyń» bási tómendep tur

О́tken aptada QHL komanda­lary Eýrotýr oıyndary ótip jatqan soń 10 kúndik qysqa úziliske shyqty. Basqa komandalardy qaıdam, jeńi­listen bas kótere almaı jatqan «Ba­rys» úshin bul úzilis tıimdi bolady degen senimdemiz. 14 qazanda óz alańymyzda bastalǵan sátsizdiktiń sońy kóriner emes. Qazan aıynyń ortasynda «Barys» Vladıvostoktyń «Admıralynan» overtaımda 0:1 esebimen utyldy. Nur-Sultandaǵy match asa shıelenisti ótti. Qos tarap baryn salyp aıqasty. Əsirese, aıdyn ıeleriniń qarqyny kúshti boldy. Bıylǵy maýsymda atalǵan komandalar ózara eki mərte kezdesip, ekeýinde de Qıyr Shyǵystan kelgen hokkeıshiler basym túsken edi. Bul joly da Markýs Iýngtyń soqqan shaı­basynyń arqasynda «Admıral» jeńiske jetti.

«Barys» araǵa eki kún salyp «Ba­rys Arenada» Rıganyń (Latvııa) «Dı­namo» komandasyn qabyldap, ekinshi ret overtaımda jeńiliske ushyrady. Kezdesýdi tamashalaýǵa kelgen 5 myńǵa jýyq jankúıer úsh ke­zeńge sozylǵan bəsekede 7 gol­dyń kýəsi boldy. Birinshi kezeńde esep ashylmaǵanymen, ekinshi jáne úshinshi kezeńde qos komandanyń hokkeıshileri úsh-úshten shaıba soǵyp, kezdesý teń eseppen aıaqtaldy. Qosymsha ýaqyttyń úshinshi mınýtynda Krıstaps Sotnıekstiń soqqan shaıbasynyń arqasynda «Dınamo» jeńiske jetti.

Keıingi oıynda jerlesterimiz áýpirimdep júrip eki matchta jeńiske jetti. Alǵash elordada ótken kezdesýde «Barys» Máskeý oblysynyń «Vıtıaz» komandasymen oınap, bul joly jerlesterimiz overtaımda 3:2 esebimen basym tústi. Qosymsha ýaqyttyń 3-mınýtynda Dastın Boıd matchtaǵy ekinshi shaıbasyn soǵyp, komandasyna mańyzdy jeńis syılady. Ekinshi oıyndy Mınskide ótkizgen «Barys» jergilikti «Dınamo» komandasynan býllıt serııasynda aılasyn asyryp ketti. Negizgi kezeń 1:1 esebimen aıaqtalyp, býllıtte jerlesterimiz 3:1 esebimen jeńis to­ıyn toılady.

Mınskidegi jeńisten keıin Andreı Skabelka shákirtterin ne qyrsyq shalǵany belgisiz, sońǵy bes oıynda jeńilisten kóz ashpady. Iаroslavlde kezdesý ótkizgen «Barys» oıynshy­lary jergilikti «Lokomotıvke» over­taımda ese jiberdi. Eki shaıba aıyrmashylyǵymen alda turǵan «Barys» úshinshi kezeń sońynda 2:3 ese­bimen utyldy. «Lokomotıvten» je­ńilgen soń «Barys» oıynshylary Qazan qalasyna sapar shegip, «Shyǵys» konferensııasynda kósh bastap turǵan azýly «Aq Barys» komandasymen kezdesti. Bul kezdesýde de jerlesterimiz qarsylastaryna 3:2 esebimen jol berdi.

Araǵa úsh kún salyp «Barys» elordada Magnıtogordiń «Metallýrgin» jeńe almady. Birinshi kezeńde qarsylas komandanyń oıynshysy Denıs Parshın esep ashyp, komandasyn alǵa súıregen. Ekinshi kezeń bel ortaǵa jetken tusta aıdyn ıeleri Dar­ren Dıstiń mergendigi arqasynda tara­zy basyn teńestirgen-di. Alaıda, 33-mınýtta Maksım Matýshkın «Me­tal­­lýrgti» alǵa shyǵardy – 2:1. Osy­laısha, jerlesterimiz qatarynan úshin­shi kezdesýde jeńilistiń kermek dəmin tatty.

Eki kúnnen soń Ekaterınbýrgtiń «Avtomobılıst» klýbyn qabyldaǵan «Barys» bıylǵy birinshilikte besinshi márte overtaımda omaqasty. Kezdesý barysynda qonaq komanda úsh ret esepte alǵa shyqqanyna qaramastan, jerlesterimiz lezde qarymtasyn qaıtaryp otyrdy. О́kinishke qaraı kezinde «Barystyń» sapynda oınaǵan Naıdjel Doýs overtaımda jeńis golyn soqty. Nátıjesinde «Barys» 3:4 esebimen jeńilis tapty.

«Barys» úzilis aldyndaǵy sońǵy oıynyn «Batys» konferensııasynyń úzdigi Máskeýdiń SSKA komandasyna qarsy ótkizip, iri eseppen ese jiberdi. Bogdan Kıselevıch, Mıhaıl Grıgorenko jáne Kırıll Kaprızov soqqan úsh shaıbaǵa jerlesterimiz jaýap qaıtara almaı, «Barys Arenaǵa» jınalǵan 11 myńǵa jýyq jankúıerdiń aldynda masqara boldy. Osy 9 oıynda «Barys» komandasy óz qaqpasyna 23 shaıba ótkizip alsa, qarsylastarǵa 16 golmen jaýap bergen. Bul aralyqtaǵy eki oıynda elorda ujymy qarsylas qomandanyń qaqpasyna sańylaý taba almady.

Qatarynan bes oıynda jeńil­gen «Barys» komandasy dál qazir­gi ýaqytta «Shyǵys» konferensııa­synda 24 oıynnan keıin 30 upaı­men altynshy orynda tur. О́zge koman­dalarǵa qaraǵanda «Barys» 1-2 oıyn kem ótkizgen. Bul toptyń kó­shin 25 oıynda 39 upaı jınaǵan Qazan­nyń «Aq Barys» komandasy bas­tap tur. Alǵashqy altylyqtyń upaı sanynda azdaǵan alshaqtyq bol­ǵa­nymen, tómengi altylyqtyń upaılary shamalas. Mysaly, kes­tede «Barystan» keıin ornalasqan «Ad­mı­ral» men «Metallýrg» komanda­lary 29 upaımen 7-8-oryndardy bó­lisip tur. Al «Kýnlýn» men «Av­to­mobılıst» 26 upaımen 9-10-satyda tursa, «Traktor» men «Amýr» 22 upaı­men sońǵy eki orynǵa jaıǵasqan.

«Barys» aldaǵy ýaqytta jeńiske jetip, meılinshe upaı toptamasa, úzdik segizdikten túsip qalatyn túri bar. Eger jerlesterimiz týrnır kestesinde segizdikke ene almasa, onda olar úshin bıylǵy maýsym aıaqtaldy deı berýge bolatyn shyǵar. О́ıtkeni Gagarın kýbogyna qatysý úshin komandalar kem degende alǵashqy segizdiktiń qa­tarynda bolýy kerek.

Mamandardyń aıtýynsha, «Ba­rys­tyń» jeńilisine eki sebep bolýy múmkin. Birinshisi, transferdegi sát­­siz­dik, ekinshisi, hokkeıshilerdiń fızı­kalyq turǵydan daıyn bolmaı shyǵýy jáne oıynshylardyń únemi jara­qat alýy. Mysaly, «Barys» ótken maý­symda astanalyqtardy órge súı­regen, bul kúnderi karerasyn aıaq­taǵan Brendon Bochenskı men maýsym­aralyq transfer kezeńinde komanda­dan ketken Patrıs Korme, Mett Fret­tın, Andre Petersson sııaqty sha­býy­l­shylardyń ornyn joqtat­paıtyn laıyqty izbasar hokkeıshiler almaǵan.

Al komandaǵa bıyl qosylǵan shabýylshylardyń nátıjesi kóńil kónshitpeıdi. Mysaly, amerıkalyq shabýylshy Erık Tangradı 17 oıynda muzaıdynǵa shyǵyp, tórt-aq shaıba soqqan. Kanadalyq Korban Naıt 24 matchta bar-joǵy alty ret mergendigimen kózge túsken. Fın­lıandııalyq Iıro Pakarınen «Barys» sapyndaǵy 17 oıynda tek úsh ret qaqpany dál kózdegen eken. Aldaǵy ýaqytta «Barys» komandany alǵa súıreıtin hokkeıshi almasa, bıylǵy kúıdi kelesi jyly da keshetini anyq.

Sondaı-aq dál qazirgi ýaqytta komanda sapynda jaraqat alyp, emdelip jatqan úsh birdeı oıynshysy bar. Olar – shvesııalyq Vıktor Svedberg, fınlıandııalyq Iıro Pakarınen jáne qazaqstandyq Talǵat Jaılaýov. Bas bapkerdiń aıtýynsha, atalǵan oıynshylar jańa jylǵa deıin komandaǵa kómektese almaıtyn kórinedi.

Jýyrda Reseıdiń «Chempıonat» ınternet-basylymy QHL-diń 2019/20 jylǵy maýsymdaǵy komandalardyń reıtıngin jasap shyqty. Basylym reıtıngi boıynsha «Barystyń» bas bapkeri Andreı Skabelka sońǵy oıyndardaǵy sátsizdikterden keıin 6-orynnan 15-orynǵa túsip qaldy.

10 kúndik úziliske shyqqan Qur­lyq­tyq hokkeı lıgasynyń komandalary erteńnen bastap kezekti týr oıyndaryn ótkizedi. «Barys» úzilisten keıingi alǵashqy kezdesýin 12 qarashada syrt alańda «Batys» konferensııasynyń 10-orynda kele jatqan Cherepoves qalasynyń «Severstal» komandasymen sheber­lik baıqasady.