– 2017 jylǵy 31 mamyrdan 2019 jylǵy 25 qazanǵa deıingi aralyqta ekinshi deńgeıli bankter jalpy salmaǵy 523,3 kılo tartatyn 13,2 myń altyn quımasyn satty. Oǵan qosa valıýta aıyrbastaý pýnktteri arqyly jalpy salmaǵy 118,1 kılo bolatyn 4,2 myń quıma altyn ótkizildi. Osylaısha el azamattary satyp alǵan taza altynnyń salmaǵy 641,2 kılony qurady, – delingen LS taratqan aqparatta.
Taıaýda World Cold Council ár eldegi altyn qory men ony halyq sanyna shaqqandaǵy kórsetkish týraly da habarlaǵanyn aıta keteıik. Bul tizimge kóz júgirtsek, altyn qory 377,3 tonnaǵa jetken Qazaqstan dúnıe júzi boıynsha 13-orynǵa kóterildi. Iаǵnı, elimizde 18,6 mıllıonnan astam halyqtyń jan basyna shaqqanda ár azamatqa 20,2 gramm altynnan keledi degen sóz.
Dúnıe júzi boıynsha baǵaly metall qory eń kóp elderdiń kóshin Shveısarııa bastap tur. Shveısarııanyń 1040 tonna altyn qoryn jan basyna shaqqanda 120,7 gramnan asady. Odan keıingi orynda Italııa, Germanııa, Portýgalııa syndy elder ornalasqan.
Álem boıynsha altyn qory jan basyna shaqqanda eń az kólemnen keletin elderdiń tizimin Japonııa (6,03 gramm), Qytaı (1,35 gramm), Úndistan (0,45 gramm) túıindeıdi.
Qazaqstanda altyn quımasyn satý baǵdarlamasy boıynsha quımanyń 5 túri usynylǵan bolatyn. 5, 10, 20, 50 jáne 100 gramm tartatyn quımalardyń ishinde sany boıynsha eń kóp satylǵany 10 gramdyq quıma – 33 paıyz. Al salmaǵyna keler bolsaq, satylǵan barlyq altynnyń 59 paıyzy 100 gramdyq quıma.
Bankter men aıyrbastaý pýnktterinde satylatyn árbir quıma altynnyń beti syrtqy soqqylardan qorǵaıtyn qorǵanysh elementpen jabylǵan. Betinde buǵynyń sýreti, quımanyń tazalyǵyn bildiretin 999,9 degen sıfr, Ulttyq banktiń logotıpi beınelengen.
