Jýyrda Maı aýdanynda jolsaparda bolǵanda Malaısary batyr aýylyndaǵy mektepke kireberisten «Kóp oqysań, syılyqqa – velosıped!» degen jazý kózimizge túsken edi.
– Oqýshylarymyz sabaqtan tys ýaqytta ádebı kitap, onyń ishinde qazaq jazýshylarynyń shyǵarmalaryn oqýdy kúndelikti ádetke aınaldyrsa deımiz. Erteńnen keshke deıin uıaly telefonǵa telmiretinderdiń sabaq qaraýǵa, sabaq oqýǵa yntasy azaıatynyn baıqap júrmiz. Sondyqtan osyndaı ıgi sharany bastap kettik, – deıdi Anar Jetibaeva.
Sóıtip mektep basshylyǵy qoıǵan talaptar bıiginen tabylǵan 8-synyp oqýshylary Aıda Ahmetjan, Rızagúl Jaqypova, Ersaıyn Baıanbek syılyqqa velosıped alǵan alǵashqy jeńimpazdar atanypty. Al júldelerge beriletin 10 velosıpedti mektep túlegi kásipker basshy Serik Shahajanov syıǵa tartqan eken. Endi 7 velosıped óz ıelerin kútip tur.
Bir qýanarlyǵy, basqa da mektep túlekteri, Qamqorshylyq keńesiniń tóraǵasy Beken Jumabekovtiń basshylyǵymen shahmat, toǵyzqumalaq oıyndary, ınformatıka kabınetterin jabdyqtap beripti.
– Aýyldyń «Arman», «Mádı», «Qazanǵap» sharýa qojalyqtary jáne Temirbolat Galıev, Murat Shaıhymýlda, Qýanysh Nurǵojın, Qanat Serǵazınder sekildi jeke kásipkerleri 1-4 synyp oqýshylaryn tegin tamaqpen qamtamasyz etýde. Kásipker Bekbolat Qasenuly úzdik oqýshylarǵa aqshalaı stıpendııa berýde, – deıdi mektep dırektory.
Oqýshylar endi aldaǵy aılarda ótetin Abaı, Oralhan, Mahambet, Muqaǵalı, Maǵjan, Malaısary batyr oqýlaryna daıyndyqty bastap ketipti.
Pavlodar oblysy,
Maı aýdany
