Aımaqtar • 12 Qarasha, 2019

Ońaltý ortalyqtary salynady

18 retkórsetildi

Memleket basshysy Qasym-Jomart Toqaevtyń Qazaqstan halqyna arnaǵan Joldaýynyń basym baǵyttaryn túsindirý, jergilikti jerdegi tynys-tirshilikpen etene jaqyn tanysý maqsatynda Aqmola oblysyna jumys saparymen kelgen Premer-Mınıstrdiń orynbasary Berdibek Saparbaev bastaǵan Úkimettiń jumys toby óńirdi aralady.

Úkimet músheleri jumys  saparyn Zerendi aýdanyna qarasty Vıktorovka aýylyndaǵy orta mektepten bastady. Mektep dırektory Jámıla Qasenovanyń aıtýynsha, búginde bilim oshaǵynda 204 oqýshy tálim-tárbıe alýda. Bógenbaı bı aýylynan 13 oqýshy  avtobýspen tasymaldanady. Kóp balaly jáne turmysy tómen otbasylardyń 59 oqýshysy tegin tamaqpen qamtylǵan. Aýyldyq mádenıet úıinde turǵyndarmen júzdesken Berdibek Saparbaev Memleket basshysy Joldaýynyń basty baǵyttaryn túsindirdi. Vıse-premer kelesi jyldyń 1 qańtarynan bastap engiziletin kóp balaly jáne muqtaj otbasylarǵa arnalǵan kómektiń jańa ádisi týraly jan-jaqty aıtyp berdi.

Etek-jeńi keń pishilgen Vıktorovka aýylynda 1247 adam turady. Negizinen osyndaǵy seriktestikte jumys isteıtin jáne mal súmesimen kún kórip otyrǵan jergilikti jurttyń tórt túliktiń basyn kóbeıtýge múmkindigi mol. Memleket tarapynan kórsetilip jatqan qomaqty kómekti paıdalanǵan lázim. Ásirese, «Altyn asyq», «Sybaǵa» tárizdi baǵdarlamalardyń sharapatyn kórýge ábden bolar edi. Ataýly áleýmettik kómekke qol sozýdyń túbi keı rette masyldyqqa uryndyrýy múmkin. Sondyqtan boıynda kúsh-qýaty bar adamdardyń jumys istep, ózderiniń otbasylaryn qamtamasyz etkeni durys. Kezdesý barysynda osyndaı keleli oılar aıtyldy. Aýyl turǵyndary úshin kópten beri sheshilmeı kele jatqan eń ótkir másele de kóterildi. Bul ortalyqtandyrylǵan sý júıesiniń ábden tozyǵynyń jetýi. Qazir seriktestik aýylǵa aýyz sýdy arnaıy kólikpen tasymaldaýda. Biraq sonyń ózinde úlgere almaıdy. Kópshilik ótinishine Berdibek Saparbaev aldaǵy ýaqytta bul máseleni qarastyryp, kómek kórsetiletinin aıtty.

Jumys toby budan ári Zerendi aýylyndaǵy Málik Ǵabdýllın atyndaǵy orta mektepte boldy. El eńsesin kóterýge baǵyttalǵan memlekettik baǵdarlamalar qalaı júzege asyrylyp jatyr degen saýalǵa áleýmettik qyzmetker Vıktorııa Koh jaýap berdi

– Biz jalǵyzilikti adamdarǵa kómek kórsetemiz. Tobymyzda segiz adam bar, – dedi ol, – ár adamǵa eki saǵatqa jýyq ýaqytymyz ketedi. Turmystyq-medısınalyq kómek kórsetemiz. Qarttardyń tynys-tirshiligi ár ýaqytta nazarymyzda. 

Aýyl turǵyny Raıhan Sársenbaeva sharapaty tıip jatqan baǵdarlamalar týraly aıta kelip, tıimdiliginiń az emestigine toqtaldy. Máselen, ózi bıyl 250 myń teńge grant alyp, qus ósirýmen aınalysýda eken. Tabysynyń tolymdy bolaryna senimdi.

Vıse-premer bastaǵan jumys toby oblys ortalyǵyndaǵy kópsalaly oblystyq aýrýhanada bolyp, jańadan salynyp jatqan onkologııalyq emhananyń qurylysymen tanysty. Bul emhana bir aýysymda 150 adamǵa deıin qabyldaıtyn bolady. Jańa emhana osy zamanǵy medısınalyq qural-jabdyqtarmen qamtamasyz etilmek. Onda 70 medısına qyzmetkeri jumys isteıtin bolsa, onyń 23-i joǵary bilimdi dárigerler bolady. Qazir qurylys jumystary qarqyndy júrgizilýde. Jańa nysan 2020 jyldyń úshinshi toqsanynda paıdalanýǵa berilmek. Premer-Mınıstrdiń orynbasary qurylys jumystaryn shırata túsýdi tapsyrdy. Onyń ústine mamandardy osy bastan taýyp, jumysqa tartqan lázim. Oblystyq aýrýhanada aımaqtaǵy medısına salasynyń qyzmetkerlerimen kezdesý ótkizildi. Vıse-premer júzdesý barysynda  elimizdiń ár adamy óziniń basty baılyǵy – densaýlyǵyn saqtaýy kerektigin, ózin-ózi qamtamasyz etkender men jumyssyzdardyń da jaıyna kóńil aýdarylýy qajettigin aıtty. Júıeden eshkim de syrt qalmaýǵa tıisti. Sóz sońynda aldaǵy úsh jylda densaýlyq saqtaý salasynyń bıýdjeti eki ese artatynyn, medısınalyq qural-jabdyqtardyń múmkindiginshe jańartylatynyn, medısına kadrlarymen tolyqtyrý «Dıplommen – aýylǵa!» baǵdar­lamasy arqyly júzege asatynyn aıtyp ótti. Sondaı-aq óńirdegi ózekti máselelerge toqtaldy. Sábılerdiń shetineýi 18 paıyzǵa kóbeıgen. Mindetti medısınalyq saqtandyrýǵa jarna tóleý mardymsyz.

Oblys ortalyǵyndaǵy IT-mektepte bolǵan sátinde jumys toby Aqmola oblysynyń muǵa­lim­der qaýymymen kezdesti.

– Bilim berýmen qatar mektepterdegi tárbıe máselesine de aıryqsha nazar aýdarǵan jón, – dedi Berdibek Saparbaev, – ár aımaqta demalys kúnderi jáne keshkilik ýaqytta bos turatyn sport zaldary men sheberhanalardy paıdalaný kerek. Kásibı-tehnıkalyq bilim berý máselelerine de nazar aýdaryldy.

Kókshetaý qalasynda balalardy ońaltý ortalyǵy salynbaq. Jaǵymdy jańa­lyq Premer-Mınıstrdiń orynbasary Ber­di­bek Saparbaevtyń Aqmola oblysynyń turǵyn­darymen kezdesýi kezinde jarııa etildi. Júzdesý barysynda el Prezıdentiniń Joldaýy­nan týyndaıtyn mindetter jáne sol min­detterdi júzege asyrý barysyndaǵy Úki­met­tiń jumysy týraly keńinen baıandaldy.

– Balalardy ońaltý máselesi óte mańyz­dy, – dedi ol, – qazir kóp jumys istelip jatyr. Biraq sonda da jetkiliksiz. Bizge ońaltý ortalyqtarynyń jumysyn keńeıte túsý qajet. Osyndaı ortalyqtar bar jerde nátıjeli jumys ta bolady. Tuńǵysh Prezıdent bastamasy aıasynda kelesi jyldan bastap respýblıkamyzdyń úsh qalasynda Nur-Sultan, Shymkent jáne Kókshetaýda balalardy ońaltý ortalyqtarynyń qurylysyn bastaımyz.   

Oblys ákimi Ermek Marjyqpaev bul ortalyqtyń jańa zamannyń talabyna tolyq jaýap beretin nysan bolatynyn aıtyp ótti. Jobanyń quny 4 mıllıard teńge kóleminde. Berdibek Saparbaev turǵyndardyń  áleýmettik-turmystyq jaǵdaıyn jaqsartý máselelerine toqtaldy. Ústimizdegi jyly memlekettik bıýdjettiń 45 paıyzy bilim berý, densaýlyq saqtaý, mádenıet pen sport salalaryna bólinip otyr. Áleýmettik jaǵynan az qamtylǵan, kóp balaly otbasylarǵa jeke qarajat júıesi qarastyrylǵan.

– Ataýly áleýmettik kómek memleket tarapynan tólenetin jalaqy emes, bul kóp balaly otbasylarǵa óz kásipterin bas­tap, jaǵdaılaryn túzetý úshin beriledi. Sondyqtan, memleket qazir bul máseleni qarastyrýda, – dedi vıse-premer.

Kezdesýdiń ekinshi bóliginde vıse-premer aqmolalyqtardyń alýan suraqtaryna jaýap berdi. Bul úkimettik emes uıymdardyń jumysyna, múgedekterdi, jetim balalardy qoldaý máselesine baılanysty órbidi. Múgedek balalarǵa arnaıy áleýmettik kómek kórsetý jaıy da aıtyldy.

 

Aqmola oblysy

 

Sońǵy jańalyqtar

Elordada jalpy jaǵdaı turaqty

Koronavırýs • Búgin, 14:50

Fýtbol maýsymy jalǵasa ma?

Sport • Búgin, 14:48

Qyzylorda oblysynda qylmys azaıdy

Aımaqtar • Búgin, 11:49

Qostanaı qalasy jartylaı jaryqsyz qaldy

Aımaqtar • Búgin, 11:06

Karantındegi Qaraǵandynyń «qyzyqtary»

Aımaqtar • Búgin, 11:05

Álemdegi ahýal qandaı?

Koronavırýs • Búgin, 10:57

Onlaın formatta otbasylyq baıqaý ótti

Aımaqtar • Búgin, 10:37

Qytaı: Ýhanda karantın aıaqtaldy

Álem • Búgin, 10:08

Daýyl «dertimizdi» anyqtap berdi

Aımaqtar • Búgin, 10:02

Qyzylorda: Taǵy 3 adam tirkeldi

Aımaqtar • Búgin, 09:57

MMA: UFC-di synǵa aldy

Sport • Búgin, 09:20

Elimizde vırýs juqtyrǵandar sany 700-den asty

Koronavırýs • Búgin, 08:48

Eń bastysy – úılesimdi jumys isteý

Saıasat • Búgin, 08:00

Uqsas jańalyqtar