Qazaq kúıiniń qudiretin arab álemine tanytqan jas kúıshilerdiń arasynda Rasýl О́mirzaqov gran-prı júldesin jeńip aldy. Taǵy bir ónerpaz qyzymyz Kámıla Maqpoz jeke oryndaýda birinshi oryndy ıelendi. «Kúder» dombyrashylar ansambli kórermenderge M.Áýbákirovtiń «Talas», T.Mombekovtiń «Saltanat» jáne t.b. kúıler usynǵan edi.
«Kúder» ansamblin Toıken Kúderova 1995 jyly qurǵan. Ol kezde qazaq ónerine degen salqyn kózqarastan Petropavl áli aryla almaǵan bolatyn. О́zge ult túgili orystanyp ketken qandastarymyzdyń arasynda dombyrany mensinbeıtinder kóp edi. Sonyń biri ózi basqaratyn mádenı mekemeniń mereıtoılyq konsertin uıymdastyrǵanda «tolko dombrý ne nado» deıtin qazaq áıeli áli de at ústinde kele jatyr.
Osyndaı qarsylyqtarǵa, muryn shúıirýlerge qaramaı Toıken Kúderova eren tabandylyqpen dombyrashylar ansamblin quryp, onyń jumysyn búginge deıin jalǵastyryp keledi. Dombyranyń qudiretin ol aldymen týǵan jerinde tanytty, al qazir Táýelsizdiktiń arqasynda alys shetelderdi de moıyndatýda.
Kúıshi ári ónerdiń ǵalamat uıymdastyrýshysy búgingi kúni aq bata men aq tilektiń arqasynda ónerdiń shyńdaryna kóterilip keledi. Máselen, qazan aıynda ǵana onyń shákirtteri Kókshetaý qalasynda bolǵan «Jańa format» atty halyqaralyq dombyrashylar festıvaline qatysyp, túrli nomınasııa boıynsha eki gran-prı men 3 ekinshi oryndy qanjyǵalaryna baılap qaıtqan.
Tek osyndaı jetistikterdi jergilikti basshylar da moıyndap, laıyqty baǵalap jatsa nur ústine nur bolar edi. Áıtpese, alpys jyldyǵyn toılaǵanda T.Kúderovanyń tek «Mádenıet qaıratkeri» degen vedomstvolyq ataǵy ǵana bary bilindi... Otyz jyldaı óner maıdanynyń ótinde bolyp jáne oblys qana emes, búkil elimiz úshin úlken nátıjeler kórsetip júrgen jannyń eńbegine laıyqty baǵa berý kerek-aq...
PETROPAVL
