Úkimet basshysyna Qazaqstandaǵy ekonomıkalyq ahýal týraly HVQ saraptamalyq baǵalaýlary men boljamdary usynyldy, olar bıylǵy qarasha aıyndaǵy Qor qyzmetkerleriniń Qazaqstan Respýblıkasyna saparynyń qorytyndysy boıynsha mıssııanyń Qorytyndy málimdemesine engizilgen.
Mıssııa Qazaqstandaǵy ekonomıkalyq ósýdiń joǵary qarqyny saqtalǵanyn naqtylady, bul negizinen munaıly emes sektordyń, eń aldymen, qurylys jáne kórsetiletin qyzmetter salasynyń esebinen qamtamasyz etildi.
«Aldyn ala baǵalaýlar úshinshi toqsandaǵy údeýdi kórsetedi. Basty faktorlar – tutyný kóleminiń artýy jáne ınvestısııalyq qyzmettiń jalǵasýy. Bul bıýdjettiń qoldaýymen, bólshek nesıelendirýdiń joǵary ósimimen, sondaı-aq munaı-gaz salasyndaǵy ınvestısııalyq jobalarmen baılanysty», delingen HVQ mıssııasynyń qorytyndy málimdemesinde.
Úkimet basshysy Qazaqstan ekonomıkasy osy jyldyń 10 aıynyń qorytyndysy boıynsha turaqty ósýge bet alǵanyn kórsetip otyrǵanyn atap ótti. Qazaqstannyń IJО́-si ótken jyldyń sáıkes kezeńimen salystyrǵanda 4,4%-ǵa artty.
Taraptar aqsha-nesıe, baǵam, salyq-bıýdjet saıasaty, bank salasyndaǵy ahýal, Qazaqstanda júrgizilip jatqan ekonomıkadaǵy qurylymdyq reformalar, sondaı-aq 2020 jyly Almatyda Kavkaz, Ortalyq Azııa jáne Mońǵolııa elderine arnalǵan HVQ-nyń tehnıkalyq kómek boıynsha Aımaqtyq ortalyǵynyń ashylýy máselelerin talqylady.
Kezdesýge Premer-Mınıstrdiń birinshi orynbasary – Qarjy mınıstri Á.Smaıylov, Ulttyq ekonomıka mınıstri R.Dálenov, Saýda jáne ıntegrasııa mınıstri B.Sultanov, Indýstrııa jáne ınfraqurylymdyq damý mınıstri B.Atamqulov, Syrtqy ister mınıstriniń orynbasary E.Kósherbaev jáne basqa da vedomstvolardyń ókilderi qatysty.
HVQ mıssııasy HVQ Kelisim babynyń IV babyna sáıkes jyl saıynǵy konsýltasııalar ótkizý úshin jylyna eki ret Qazaqstanǵa keledi.
