Jumys tobynyń qyzmeti Jas Otan-nyń 2025 jylǵa deıin josparlanǵan baǵdarlamasyna ıdeıalar men usynystardy birlesip daıyndaýǵa baǵyttalǵan. Baǵdarlamanyń negizgi maqsaty - jastar qanatynyń damý vektoryn aıqyndaý, jastardy áleýmettendirý úshin naqty tetikter men mehanızmderdi daıyndaý, aýyl jastaryna arnalǵan áleýmettik lıftti damytý, jastardyń rýhanı-adamgershilik, patrıottyq tárbıesin kúsheıtý, jas sportshylarǵa, shyǵarmashyl, ǵylym-bilimmen aınalysatyn jastarǵa jan-jaqty qoldaý kórsetý, jergilikti saılaý organdarynda jastardyń úlesin arttyrý jáne otbasy ınstıtýtyn nyǵaıtý.
Jas Otan jastar qanatynyń tóraǵasy Dáýlet Káribek jospardyń mańyzdylyǵyn atap ótti.
«Bizge 2020 jyly osy qujattardy qabyldaý qajet dep tapsyrma berilgen bolsa, biz búginnen bastap jatyrmyz. Sonymen qatar jastar qanatynyń 17 aımaqtaǵy fılıaldary da árbir jumysshy jastarmen, óndiris ornyndaǵy stýdent, odan bólek bazarlardaǵy ózimizdiń jastarymyzdy tartý úshin túrli formatta kezdesýler ótkizip, usynystar jınaqtaıtyn bolady», dedi D. Káribek.
Jumys tobynyń quramyna Parlament Májilisiniń depýtattary, partııa basshylyǵy, ýákiletti organ ókilderi, qoǵam qaıratkerleri, úkimettik emes uıym ókilderi, jastar uıymdarynyń ókilderi, eńbek etip júrgen, shyǵarmashyl, sportshy jastar men jas kásipkerler kirdi.
Baǵdarlamany daıyndaý aıasynda 12 kezdesý ótedi dep kútilýde. Sondaı-aq jastar máselelerin muqııat zertteý jáne baǵdarlama boıynsha sheshimder men usynystardy ázirleý úshin, shaqyrylǵan sarapshylar men músheler «Bilim», «Eńbek jáne kásiptilik», «Baqytty otbasy», «Patrıotızm jáne bos ýaqyt» sııaqty salalyq toptar boıynsha jumys isteıtin bolady.
Otyrys barysynda jumys tobynyń birneshe músheleri óz usynystaryn aıtty.
- Meniń usynystarymnyń biri shákirtaqy aılyq eseptik kórsetkishke baılansa, demek AEK ósken jaǵdaıda stýdentterdiń alatyn shákirtaqysy ósedi. Ekinshiden mektep túlekterimen kásiptik baǵdar berý boıynsha jumys salǵyrt nemese tipti ótkizilmeıdi. Ekeý arasynda, ıaǵnı mektep pen JOO arasynda baılanys joq. Aqparattandyrý jumystaryn joǵary deńgeıde ótkizý kerek,- deıdi «Qazaqstan stýdentter alıansy» kóshbasshysy Ilııas Tústikbaev.
Baǵdarlamany daıyndaý kezinde jastar tarapynan kelip túsetin ıdeıalar men usynystar áleýmettik jeliler, messendjer jáne BAQ arqyly jınalatyn bolady. Sonymen qatar Eýropa men Amerıka elderi jastar uıymdarynyń tájirıbesi zerttelip, jastar kóp shoǵyrlanǵan kezdesýlerde, jumys oryndarda, stýdenttik kezdesýlerde, taqyryptyq alańdar men sessııalarda talqylanatyn bolady.
Qorytyndy qujat 2020 jyly «Jas Otan» JQ sezinde qabyldanady.
