Kórmege otandyq qylqalam sheberleriniń keskindeme, grafıka, músin, qolóner týyndylary (gobelen, kıiz pannolar, shym shı, kýshkon) qoıyldy. Respýblıkalyq kórmege Almaty, Taldyqorǵan, Qaraǵandy, Petropavl, Aqtóbe, Atyraý, Qyzylorda, О́skemen óńirinen 130 sýretshi qatysyp otyr.
– QR Sýretshiler odaǵy QR SO músheleriniń sońǵy 2-3 jylda oryndaǵan jumystarynyń respýblıkalyq eseptik kórmesin turaqty túrde ótkizip keledi. Jumystardy irikteýdi júrgizgen – úlken shyǵarmashylyq stajy bar, qoǵamda tanylǵan tájirıbeli mamandardan quralǵan kórme komıteti bolsa, ony bekitken – QO SO sekretarıaty. Osy kórme ótip jatqan kezde QR SO barlyq bólimsheleriniń tóraǵalarynyń qatysýymen QR SO Eseptik plenýmy ótedi. Osy ekspozısııada Atyraý oblystyq, Aqtóbe, Qaraǵandy, Petropavl bólimsheleri óz jumystaryn qoıady. Túrkistan oblysynyń Shymkent bólimshesi, Taldyqorǵan oblysy, Semeı, О́skemen bólimsheleri burynyraq Almaty-Arena galereıasynda tolyq quramda óz eseptik kórmelerin ótkizgen bolatyn. Mundaı kórmeler pisýi jetken máselelerdi sheshý jolyn anyqtaıdy, sýretshilerge, ónertanýshylarǵa, mádenıettanýshylarǵa pikir almasýǵa, shyǵarmashylyqtyń tolǵaqty problemalaryn sheshý jolyn anyqtaýǵa múmkindik jasaıdy, – deıdi kórme jetekshisi Gúlnar Jubanııazova.
Jumystardy irikteý barysynda kórme komıteti jumystardyń mynadaı prınsıpterge sáıkes kelýine nazar aýdardy: kásibı kórkemdik deńgeıi, ıdeıalar men plastıkalyq-obrazdyq sheshimderdiń jańashyldyǵy, taqyryptyq mazmunnyń ózektiligi. Qyzyqty kompozısııalyq sheshimder bolsa, quba-qup. Etıýdtik jáne eskızdik, aıaqtalmaǵan jumystar qabyldanbaǵan. Mamandar mundaı shyǵarmalar – úlken kórmelerge qoıylýǵa tıis emes shyǵarmashylyq jumys barysyndaǵy quramdas bólikter ekenin aıtady.
Kórme kórkemdik shyǵarmashylyqtyń búgingi deńgeıinen kórinis beredi, avtorlyq stılder men taqyryptyq artyqshylyqtardyń alýandyǵyn kórsetedi. Keskindemelik kompozısııalardyń konseptýaldyq sheshimderiniń shegi keńeıe túsedi. Keskindeme burynǵysynsha Qazaqstan kórkemsýret mektebiniń beıneleý ónerindegi basty túr bolyp qala beredi.
ALMATY
