Prezıdent • 14 Qarasha, 2019

Memleket basshysy Aqmola oblysyn damytý jóninde keńes ótkizdi

22 retkórsetildi

Prezıdenttiń Kókshetaý qalasyna jumys sapary Aqmola oblysyn damytý jóninde keńes ótkizýmen bastaldy. Bul týraly Aqordanyń baspasóz qyzmeti habarlady.

Qasym-Jomart Toqaev Úkimet músheleri men oblys aktıviniń aldynda sóılegen sózinde Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń tarıhı eńbegin atap ótip, kóregen kóshbasshylyǵynyń arqasynda elimiz áleýmettik-ekonomıkalyq damýda, sondaı-aq halyqaralyq arenadaǵy óz ornyn nyǵaıtýda eleýli tabystarǵa qol jetkizgenin atap ótti.

–Úkimettiń, Parlament depýtattarynyń, oblys ákimderiniń mindeti – Elbasynyń uzaq merzimdi Strategııasyn, Ult josparyn jáne Bes ınstıtýsıonaldyq reformany iske asyrýǵa barlyq kúsh-jigerin jumsaý, dedi Memleket basshysy.

Prezıdent jańa Memlekettik ındýstrııalyq-ınnovasııalyq baǵdarlamany sapaly júzege asyrýdyń mańyzdylyǵyna nazar aýdaryp, aldyńǵy baǵdarlamalarda ketken kemshilikterdi eskerý kerektigin tapsyrdy. Qasym-Jomart Toqaev josparlardy iske asyrý úshin jalań esep emes, salmaqty taldaý, tıimdi is-áreketter qajet dep sanaıdy.

–Memleket basshysy retinde, halyqtyń mańyzdy talap-tilekterin qanaǵattandyrýǵa arnalǵan tıimdi jumys kútemin, dedi Qasym-Jomart Toqaev.

Qazaqstan Prezıdenti Aqmola oblysynyń damýy týraly aıta kelip, óńirdiń aýyl sharýashylyǵy, ındýstrııalyq-ınnovasııalyq saıasat, mashına jasaý, túrli-tústi metallýrgııa, qurylys jáne qus sharýashylyǵy salalarynda oń ózgerister bar ekenine toqtaldy.

Memleket basshysy oblys ekonomıkasyndaǵy ónerkásip óndirisiniń úlesi artqanyna qaramastan, óńirdiń respýblıka kólemindegi úles salmaǵy 2,5 paıyzdan aspaı otyrǵanyn aıtty.

Qasym-Jomart Toqaev Masal ken ornyndaǵy taý-ken metallýrgııa keshenin Taý-ken metallýrgııa ónerkásibin damytý jónindegi keshendi jospardan jáne Respýblıkalyq ındýstrııalandyrýdyń kartasynan alyp tastaý máselesine nazar aýdardy. Joba ken óndirýden bastap bolat prokatyn shyǵarýǵa deıingi tehnologııalyq jelini qurap, 1 mıllıon tonnaǵa deıin ónim óndirýdi kózdegen bolatyn. Prezıdenttiń aıtýynsha, bul keshen Jarqaıyń jáne Esil aýdandarynyń turǵyndaryn jumyspen qamtamasyz etip, oblys ekonomıkasynyń ósýine septigin tıgizgen bolar edi.

Osyǵan baılanysty Memleket basshysy Úkimetke «Samuryq-Qazyna» qorymen birlesip, atalǵan joba boıynsha naqty sheshimge kelip, tıisti sharalar qabyldaýdy tapsyrdy.

Prezıdent eńbek ónimdiligin arttyrý, onyń ishinde, aýyl sharýashylyǵy – óńir ekonomıkasyn órkendetýdiń basty faktory ekenine toqtaldy.

–Sońǵy úsh jylda Aqmola oblysynda sýarmaly jerlerdiń kólemi 7,5 esege artyp, 24 myń gektardan asty. Bul – ónimdilikti arttyrýǵa tikeleı áser etetin jaqsy kórsetkish. Osyndaı jumysty jalǵastyra berý qajet, dedi Qasym-Jomart Toqaev.

Sonymen qatar Memleket basshysy elimizdiń úsh iri astyq ósiretin oblysynda aýyl sharýashylyǵy boıynsha eńbek ónimdiligi tómen ekenin, olardyń úlesi 5 myńnan 8 myń dollarǵa deıin ǵana jetetinin aıtty.

–Reseıde bul kórsetkish 17 myń dollar, al damyǵan elderde 80-90 myń dollarǵa deıin jetedi, dedi Prezıdent.

Qasym-Jomart Toqaev Aýyl sharýashylyǵy mınıstrligine agrarlyq óńirlerdiń ákimdikterimen birlesip, agroónerkásip keshenindegi eńbek ónimdiligin ulǵaıtý úshin jetekshi otandyq ázirlemeler engize otyryp, naqty sharalar qabyldaýdy tapsyrdy.

–Aýyl sharýashylyǵy jańa tehnologııalardy qoldaný, avtomattandyrý jáne sıfrlandyrý arqyly damýda tyń serpin alýy tıis. Egis alqaptaryn ulǵaıtý úshin ylǵal jáne resýrs únemdeıtin tehnologııalardy engizý jónindegi jumystardy odan ári jalǵastyrý qajet, dedi Prezıdent.

Memleket basshysy egistik alqaptaryn ıgerýmen aınalyspaıtyn latıfýndısterden jerdi qaıtaryp alý jónindegi tapsyrmasyna toqtaldy.

–Meniń tapsyrmam óte baıaý oryndalyp jatyr. Budan tapsyrmanyń oryndalýyn ádeıi sozyp otyr degen oı týady. Mundaı jaǵdaıda qoldanatyn sharalar sımmetrııaly bolady. Yqylassyz oryndaýshylarǵa ońaı tımeıdi, dep eskertti Qasym-Jomart Toqaev. 

Keńes barysynda Memleket basshysy týrızm salasyndaǵy shaǵyn jáne orta bıznesti damytý máselesine toqtaldy. Ol bıznes júrgizýge jasalatyn jeńildik boıynsha oblystyń artta qalǵanyna, jumyspen qamtylǵandar men shaǵyn jáne orta bıznes kásiporyndarynyń ónim óndirisi tómen ekenine nazar aýdardy.

Qasym-Jomart Toqaev «qarapaıym zattar ekonomıkasy» jobalaryna kásipkerlerdi belsendi túrde jumyldyrý kerek dep esepteıdi.

–Mysaly, bul baǵytta ónerkásip, aýyl sharýashylyǵy, qyzmet kórsetý salalarynyń múmkindikteri mol. Shaǵyn jáne orta bıznestiń áleýetin elordanyń azyq-túlik beldeýin qamtamasyz etý úshin paıdalanǵan jón, dedi Memleket basshysy.

О́ńirdiń tabıǵı demalys oryndary men mádenı mura nysandary jaıynda aıtqan Prezıdent týrıstik áleýettiń áli de tolyq paıdalanylmaı jatqanyna toqtaldy. Qasym-Jomart Toqaev  týrızm salasy aımaqtyń jalpy óniminiń 0,5 paıyzyn ǵana qurap otyrǵanyn basa aıtyp, týrızmdi damytýǵa arnalǵan memlekettik baǵdarlama boıynsha 2025 jyly elimizde atalǵan kórsetkishti 8 paıyzǵa jetkizý tapsyrylǵanyn atap ótti. 

–Úkimetke oblys ákimdigimen birlesip, Shýche-Býrabaı kýrorttyq aımaǵyn damytý josparynyń úshinshi kezeńi sheńberinde qolǵa alynǵan ınfraqurylymdyq jobalardy aıaqtaýdy tapsyramyn. Qazaqstannyń Týrızm kartasynda Zerendi demalys aımaǵy da bar. Atalǵan aımaqty ekologııalyq jáne balalar týrızm salasyna beıimdeýge bolady, dedi Qazaqstan Prezıdenti.

Memleket basshysy jol boıy servısiniń sapasy men qyzmet kórsetý deńgeıiniń tómendigin synǵa alyp, ony tıimdi damytýdyń joldaryn qarastyrýdy tapsyrdy.

Qasym-Jomart Toqaev baǵanyń kóterilýine jol bermeýdi, ásirese áleýmettik mańyzy bar taýarlardy qymbattatpaýdy eskertti. 

–Jyl basynan beri áleýmettik mańyzy bar taýarlardyń baǵasy qymbattap, ınflıasııanyń aldyna túsip ketti. Keı jaǵdaılarda eki esege deıin jetken. Inflıasııanyń jalpy deńgeıi 5,3 paıyz, al baǵa 9 paıyzdan asyp ketti, dedi Prezıdent.

Qasym-Jomart Toqaev oblystyń sońǵy eki jyldaǵy turǵyn úı qurylysynyń qarqynyna (900 myń sharshy metr) oń baǵa berip, jergilikti joldar men kóshe-jol júıesiniń 880 shaqyrymy jaqsarǵanyn aıtty. Sonymen qatar sheshilmegen birqatar ınfraqurylymdyq máselelerge, onyń ishinde Saryarqa magıstraldi gaz qubyry boıyna salynatyn gaz taratý jelisiniń qurylysyna nazar aýdardy.

–Úkimetke oblys ákimdigimen birlesip, 2020-2021 jyldary Arshaly jáne Selınograd aýdandarynda gaz taratý jelisin salýdy tapsyramyn, dedi Prezıdent.

Qasym-Jomart Toqaev ınfraqurylymdy damytý jónindegi mindetterge toqtalyp, Úkimetke halyqaralyq qarjy ınstıtýttarynan nesıe tarta otyryp, Aqmola oblysynda JEO salý múmkindigin qarastyrýdy tapsyrdy.

–Bul shamamen 200 mıllıon dollardy quraıdy. Kóp qarjy emes. Qarastyryp, usynys berińizder. Biz Kókshetaý qalasynda mindetti túrde JEO salýymyz kerek, dedi Prezıdent.

Memleket basshysy oblystyń aglomerasııalyq aımaǵynyń ınfraqurylymyna qatysty máselelerdi tezdetip sheshý jaıynda aıtyp, Qosshy aýylyn mysalǵa keltirdi. 

–Qosshy aýylyndaǵy halyqtyń sanyna qatysty úsh túrli derek bar: naqty esep boıynsha 52,5 myń halyq turady; úı sharýashylyǵynyń tirkeý dápterindegi turǵyndar sany – 34 myń; kóshi-qon qyzmeti resmı túrde 16,5 myń adamdy tirkegen. Bul qaı turǵydan alsańyz da qaýipti jaǵdaı. Jaqynda halyq sanaǵy bolady. Turǵyndardyń sany men olardyń ómir sapasy jaıynda naqty bilýimiz kerek, dedi Qasym-Jomart Toqaev.

Prezıdent aımaqty damytýda keshendi basqarý tásiline kóshý qajettigin atap ótip, halqymyzdyń turmys sapasyn arttyrý basty maqsat ekenin jetkizdi.

–Ol úshin Nur-Sultan qalasy men Aqmola oblysy ákimdikteriniń arasyndaǵy jumystardyń ózara úılesimdiligin jandandyrý kerek, dedi Memleket basshysy.

Sóziniń sońynda Qasym-Jomart Toqaev Úkimet pen oblys ákimdigine 2020 jyly Kókshetaý qalasynda ótetin Qazaqstan men Reseıdiń óńiraralyq yntymaqtastyq Forýmyn ótkizýge tolyq daıyn bolý úshin birqatar tapsyrma berdi.

Sońǵy jańalyqtar

Qazaq kúresi jańa kezeńge aıaq basty

Ulttyq sport • Búgin, 19:28

Basylym basshylary - Júsipbek AIMAÝYTOV (1889-1931)

Basylym basshylary • Búgin, 17:42

Elimizdiń basym bóligin tuman basady

Qazaqstan • Búgin, 17:01

Basylym basshylary - Smaǵul SÁDÝAQASOV (1900-1933)

Basylym basshylary • Búgin, 16:53

Almatyda Abaı klýby ashyldy

Rýhanııat • Búgin, 16:22

Basylym basshylary - Bernııaz KÚLEEV (1899-1923)

Basylym basshylary • Búgin, 14:55

Basylym basshylary - Támımdar SAFIEV (1892-?)

Basylym basshylary • Búgin, 11:28

Elordada Úsh arysqa eskertkish ornatyldy

Rýhanııat • Búgin, 11:14

Almaty álemdik qalalar qataryna qosylady

Aımaqtar • Búgin, 10:57

Atyraýlyqtar taǵy da úzdikter qatarynda

Aımaqtar • 13 Jeltoqsan, 2019

Uqsas jańalyqtar