Muǵalimderdi qoldaýǵa qomaqty qarjy bólinedi

Ekonomıka • 15 Qarasha, 2019

Muǵalimderdi qoldaýǵa qomaqty qarjy bólinedi

Nur Otan partııasynyń Quqyqtyq keńes músheleri pedagog mártebesin zańnamalyq turǵydan qamtamasyz etý máselelerin talqylady. Keńeıtilgen otyrysqa jetekshi partııanyń basshylary, ustazdar qaýymy men ýákiletti memlekettik organdar ókilderi qatysty.

Egemen Qazaqstan

Nur Otan partııasy Tóraǵasynyń birinshi orynbasary Baýyrjan Baıbek táýelsizdik jyldary Tuńǵysh Prezıdent Nursultan Nazarbaevtyń basshylyǵymen elimizde 2000-ǵa jýyq jańa mektep jáne 900 balabaqsha ashylǵanyn atap ótti.

Apatty jaǵdaıdaǵy mektepter sany sońǵy 5 jylda 4 esege azaıdy. Muǵalimderdiń jalaqysy 1997 jyldan beri 17 esege ósken. Elbasynyń tapsyrmasymen árbir qazaqstandyq otbasyǵa qatysy bar «Pedagog mártebesi týraly» zań jobasy ázirlendi.

«Qazir bilim berý salasynda jarty mıllıonnan astam qazaqstandyq jumys isteıdi. Olardyń 81%-y áıelder. Tamyz konferensııasynda el Prezıdenti Qasym-Jomart Toqaev ultymyzdyń básekege qabilettiligin arttyrý úshin muǵalim mártebesi bıik deńgeıge kóterilý kerek dep atap ótti. Jyl saıyn dıplomdy mamandardyń sany artqanymen, pedagogtarǵa degen suranys azaımaı otyr. Pedagog mamandardyń 35%-y basqa salaǵa ketip qalady. Bilikti muǵalimderdi mektepterge, ásirese aýyldyq jerlerge tartý mehanızmi mardymdy jumys istemeı tur. Bul sheshýge tıisti máselelerdiń bir bóligi ǵana», dedi Baýyrjan Baıbek.

Onyń aıtýynsha, zań jobasyn ázirleý úshin ǵalymdar, muǵalimder, zańgerler, depýtattar jáne bilim salasy kásipodaqtarynyń ókilderinen quralǵan jumys toby jasaqtalǵan. Jyl boıy elimizde kóptegen kezdesý ótkizildi, 8600-den asa usynys tústi.

«Partııa músheleriniń 30%-y – pedagogtar, sondyqtan Nur Otan zań jobasynyń ázirlený barysyn erekshe baqylaýda ustap otyr. Pedagog quqyǵyn keńeıtý jáne onyń áleýmettik mártebesin jaqsartý máselesi bar. Áńgime, bárinen buryn, muǵalimderdi materıaldyq turǵydan jáne basqa da yntalandyrý jaǵdaılaryn týǵyzý, qajetsiz tekserýlerden aryltyp, shyǵarmashyl jáne nátıjeli jumys isteýge jaǵdaı jasaý týraly bolyp otyr. Qazirgi ýaqytta ázirlenip jatqan zań jobasy boıynsha taıaý 5 jylda jalaqyny ósirý, ustazdyq sheberlik pen synyp jetekshiligi úshin ústemeaqy qosý, eńbek demalysy men basqa da yntalandyrýlardy qamtıtyn 5,2 trıllıon teńge bólinedi dep mólsherlenýde. Munyń barlyǵy Elbasy men Prezıdent saıasatynyń sabaqtastyǵynyń nátıjesi», dep atap ótti Baýyrjan Baıbek.

Partııa Tóraǵasynyń birinshi orynbasary Májilistegi Nur Otan partııasy fraksııasy depýtattarynyń jáne jumys tobynyń zań jobasyn talqylaý qorytyndysy boıynsha qosymsha usynystar engizilgenin jetkizdi. Sondaı-aq oqý júktemesin 16 saǵatqa tómendetý, jer telimderin bólý jáne «Qazaqstannyń eńbek sińirgen ustazy» dárejesine ıe bolǵandarǵa bir jolǵy 2000 AEK kólemindegi tólem tóleý jáne Prezıdenttik olımpıadalar, respýblıkalyq jáne halyqaralyq jarystardyń júldegerlerin daıyndaǵandary úshin 3 aılyq jalaqy berý týraly usynys aıtyldy.

О́z kezeginde Bilim jáne ǵylym mınıstri Ashat Aımaǵambetov jańa zań jobasynda pedagog quqyǵyn qorǵaý týrasyndaǵy 10 jańa ustanym qarastyrylǵanyn habarlady. Muǵalimderdiń sapalyq quramyn arttyrý úshin magıstr dárejesi barlarǵa 10 AEK kóleminde ústeme, balabaqshalarda eń aldymen oryn bólý jáne basqa da áleýmettik kómekter qarastyrylmaq.

Otyrys barysynda Shymkenttegi №1 mektep-gımnazııasynyń bıologııa pániniń muǵalimi Alına Solovıova óz oıyn jetkizdi.

«Men qarapaıym mektep muǵalimimin. Ata-analardyń bizden neni kútetinin bilemin. Kez kelgen ata-ana onyń balasyna túsinistikpen qarap, jaqsy kórgenimizdi qalaıdy. Qoǵam muǵalimderdiń esep berýmen aınalyspaı, balalarǵa durys mán bergenin jaqsy kóredi. Muǵalimderdi olımpıadada oryn alǵan oqýshylary úshin marapattaý jaıyna kelsek, «Daryn», NZM sııaqty daryndy balalar oqıtyn mektepterdiń bar ekenin eskere ketken jón. Al meniń jaı mektebimniń ózinde 143 jeńimpazym bar. Maqtanaıyn dep turǵan joqpyn, biraq osylardy dárejelerge bólý kerek sııaqty. Kimniń oqýshysy júıeli túrde jeńimpaz bolyp júrse, solardy marapattaý kerek», dedi ol.

Baýyrjan Baıbek muǵalimniń usynysyn qoldady. Onyń aıtýy boıynsha, osy tektes mektepterdiń arasynda saralaýdy engizý qajet.