Tynyshtyqbek aqynnyń sonaý Semeı shaharynda jatyp-aq óleńsúıer qaýymdy eleńdetetin qasıeti bar. Onyń sebebi, kóp jazyp, kóp izdenetin aqynnyń oılaý júıesiniń ózgesheliginde bolsa kerek. Ekinshi myńjyldyqtyń bastala qalǵan shaǵynda tuńǵysh shyqqan «Aqsham hattary» kitabynyń qoldan-qolǵa tımeı oqylǵanyna kýágermiz. Qazirgi ınternet júıesi damyǵan shaqta aqynnyń shyǵarmashylyǵy da, ózi de kóz aldymyzda deýge bolady. Aqynnyń ara-tura oqyrmandarymen syrlasyp, hat jazatyny da bar. «Internqazaqqa hat» jazbasy sonyń dáleli. «Qas saq ańqymasy» kitabynyń mazmuny negizinde jazylǵan hatta aqyn «ańqyma», «múńkime» uǵymdary arqyly kóshpelilik pen otyryqshylyqtyń aıyrmashylyǵyn kórsetip, qazaq dúnıetanymynyń artyqshylyǵyn áńgime ózegine aınaldyrǵan. Keshegi akademııalyq kitaphanada ótken kezdesý keshinde de Tynyshtyqbek Ábdikákimuly oqyrmandarymen ózi shırek ǵasyrdan beri izdengen ejelgi uǵymdarymyz tóńireginde pikir bólisti. Oqyrmandarynyń suraqtaryna barynsha naqty jaýap berdi. Shırek ǵasyrǵa jýyq izdenip, jazǵan dúnıesiniń on tom kitap bolatynyn, ázirge qoljazba kúıinde turǵanyn, sátin salsa aldaǵy jyly úsh tomy jaryqqa shyǵatynyn málimdedi.
Kesh barysynda elordalyq stýdent jastar aqynnyń óleńderin oqydy. Belgili dástúrli ánshi Klara Tólenbaeva, kúıshi Qaırat Aıtbaev syndy ónerli jastar aqyn aǵalaryna qurmet kórsetip, keshtiń qonaǵy boldy, án-kúımen keshtiń árin kirgizdi. Keshti aqyn, Qazaqstan Jazýshylar odaǵy Nur-Sultan qalalyq fılıalynyń basshysy Dáýletkereı Kápuly júrgizdi.
