Qoǵam • 15 Qarasha, 2019

Qyzyljarda eki jasóspirimdi kólik qaǵyp ketti

25 retkórsetildi

Bıyl Qyzyljarǵa qar kesh tústi. Tipti ózinen 500 shaqyrym ońtústikke qaraı ornalasqan Nur-Sultanda aq boran bolyp jatqanda teristiktiń tórindegi, Sibirdiń shetindegi Qyzyljar myzǵymaı, qońyrjaı qalypta turdy. Kesh jaýǵan qardyń bir ereksheligi – ol qurǵaq jerge tústi. Sonyń ózinde erterekte jaýǵan jańbyrdan keıin tolyq keppegen bolmashy shalshyqtar qatyp, shaǵyn kólemdi bolsa da kóktaıǵaqtar paıda bolǵan. Mine, sondaılardyń kesiri tıip, qalada eki birdeı jol-kólik oqıǵasy bolyp úlgerdi.  

Aldymen Batyr Baıan men Internasıonal kósheleriniń qıylysynda tórtinshi synyp oqýshysyn kóktaıǵaqtan toqtaı almaı qalǵan avtobýs qaǵyp ketti. Qazir bala orta dárejedegi jaraqatpen aýrýhanaǵa jatqyzyldy. Al Shýhov pen Naberejnyı kósheleriniń qıylysynda «Nıva Chevrolet» avtomashınasymen kele jatqan 18 jasar qala turǵyny jaıaý júrginshiler ótetin jerde toqtaı almaı qalyp, 16 jasar qyz balany qaǵyp ketti. Onyń jaraqaty jeńil dárejede dep tanylyp, alǵashqy medısınalyq kómek kórsetilgen soń aýrýhanaǵa jatqyzylmaı, úıine jiberildi.

Jol-kólik oqıǵasyn jasaǵan kólik quraldary arnaıy turaqqa qoıyldy. Al júrgizýshilerge qatysty Ákimshilik quqyq buzýshylyqtar týraly kodekstiń 610 baby boıynsha is qozǵaldy.

Oblystyń PD Jergilikti polısııa qyzmeti basqarmasynyń bastyǵy polısııa podpolkovnıgi Aıdyn Baımatov: «Joldarda, ásirese qar jaýǵanda, muzdaqta abaı bolǵan jón», - dep barlyq jol qozǵalysyna qatysýshylardy eskertip teledıdardan sóıledi. Onyń aıtýyna qaraǵanda alǵashqy qar jaýǵan joldarda saǵatyna 40-45 km jyldamdyqpen júrgen durys. Jaıaý júrginshiler qysta mashınanyń tejelýi qıynǵa soǵatynyn esten shyǵarmaǵandary jón.

Sonymen birge Jergilikti polısııa qyzmeti bóliminiń qyzmetkerleri kóshede balalar kóp júrgen kezde bilim berý mekemelerine jaqyn mańda patrýldik baqylaýdy kúsheıtýde. Al qalalyq turǵyn úı - kommýnaldyq sharýashylyǵy tańerteńnen bastap oblys ortalyǵynyń joldaryn qardan tazartyp, kúrdeli bólikterge qum-tuz shashylyp otyratynyn jetkizdi.

Sońǵy jańalyqtar

Kúlki kerýeni № 24

Rýhanııat • Keshe

Reıtıngte joǵarylady

Kásipqoı boks • Keshe

«Altyn saqa» úzdikteri anyqtaldy

Ulttyq sport • Keshe

Qazaq áni Nıý-Iorkte shyrqaldy

Rýhanııat • Keshe

Uqsas jańalyqtar