Ekonomıka • 19 Qarasha, 2019

Aqtóbe ınvestısııa tartýdan alda tur

482 ret

kórsetildi

4 mın

oqý úshin

Aqtóbe oblysy ınvestısııa tartý jaǵynan elimizde kósh bastap tur. Jyl sońyna deıin 600 mlrd teńge ınvestısııa tartylady dep josparlanýda. Bul kórsetkish byltyrǵydan qaraǵanda 5%-ǵa joǵary. Alaıda óńirde agrarlyq sektordyń damýy kóńil kónshitpeıdi. Naqty aıtqanda, aýyl sharýashylyǵynyń aımaq ekonomıkasyna qosatyn úlesi 5%-ǵa jetpeıdi. Mundaı statıstıkany ortalyq kommýnıkasııalar qyzmetinde ótken baspasóz máslıhatynda oblys ákimi Ońdasyn Orazalın aıtty.

Jaqsylyq SAǴADAT

9 aıdaǵy negizgi áleýmettik-ekonomıkalyq ındıkatorlardy qorytyndylaǵan óńir basshysy oblysta ónerkásip ósimi 5,3% quraǵanyn aıtty. 2024 jylǵa qaraı tartylatyn ınvestısııa kólemi boljam boıynsha 2,7 ese artyp, 1,6 trln teńgege jetedi dep kútilýde. Spıkerdiń sózine súıensek, aımaqta jalpy quny 140 mlrd teńge bolatyn 25 joǵary tehnologııalyq ınvestısııalyq joba iske asyrylyp, 2 myńnan astam jańa jumys orny ashylady. Iri jobalardyń qatarynda jylyna 5 mln tonna altyn shyǵaratyn «AltynEx» AQ-tyń taý-ken metallýrgııalyq kombınatynyń qurylysy bar. Investısııalyq jobanyń quny – 148 mlrd teńge. 38 mlrd teńgege 4.0 Indýstrııasynyń tujyrymdamasyna saı «Orys mys kompanııasy» AQ baıytý fabrıkasyn jańǵyrtýdy aıaqtamaq.

– Investısııalyq jobalardyń tizimine «Qazhrom» TUK» AQ tazartylǵan ferrohromnyń shógindi qojyn qaıta óńdeıtin fabrıka salý, «Green Capital Kazakhstan» JShS besinshi býyn jylyjaıynyń jobasyn ári qaraı keńeıtý syndy jobalar kiredi. Balama energetıka salasy boıynsha «ArmWind» JShS jylyna 48 MVt qýat beretin «Badamsha» jel elektr stansasynyń birinshi kezegin iske qosady. Investısııa aǵynyn kóbeıtý maqsatynda qosymsha 500 mlrd teńgeden astam qarajatqa kem degende 15 myń jańa jumys ornyn ashý kózdelgen. Sondaı-aq «Eýrazııa» arnaıy ekonomıkalyq aımaǵy men túrik ınvestorynyń «GOSB» ındýstrıaldy parkin qurý jumystary jalǵasyp jatyr, – dedi O.Orazalın.

Ákim arnaıy ekonomıkalyq aımaq tıimdiligi joǵary óndiristi damytýǵa, syrtqy jəne ishki ınvestısııany tartýǵa, eksportty yntalandyrýǵa, ımport almastyrýshy óndiristerdi órkendetýge, sol sekildi jergilikti mazmundaǵy ónim úlesin arttyryp, halyqty jumyspen qamtýǵa múmkindik beredi deıdi. 700 gektardy alatyn ónerkásip alańynda 50 shaǵyn, orta jəne iri kəsiporyn qurylatyn bolady.

Doing Business reıtınginde Aqtóbe oblysy bıznesti júrgizý jaǵynan respýblıka boıynsha úshinshi orynda tur. O.Orazalınniń aıtýynsha, óńirde «Jol kartasy -2020» baǵdarlamasy sátti iske asyrylyp keledi. Bıyl 3,3 myń adam bıznes negizderin úırenip, olardyń 650-den astamy nesıe men grant ıelendi. Atalǵan salada 144 myń aqtóbelik eńbek etýde.

Jyl basynan beri aımaq sharýalary 199,9 mlrd teńgege aýyl sharýashylyǵy ónimin óndirdi. Bir adamǵa shaqqanda eńbek ónimdiligi 1,4 mln teńgeni quraǵan.

Oblysta sýarmaly jerdi 3,5 ese nemese 100 myń gektarǵa deıin ulǵaıtý kózdelgen. Aqtóbe aımaǵyndaǵy sý resýrstarynyń áleýetin arttyrý úshin 32 sý qoımasy salynady.

O.Orazalın turǵyn úı qurylysy salasyn qarqyndy damytýdyń tıimdi jumystary qolǵa alynǵanyn aıtady. Ol sońǵy bes jylda barlyq qarjy kózderinen 3,3 mln sharshy metr paıdalanýǵa berilip, 28 myńnan astam otbasy baspanamen qamtylǵanyn jetkizdi. Bıyl «Nurly jer» baǵdarlamasy boıynsha 939,5 myń sharshy metr turǵyn úı berý josparlanǵan.