Qazaqstan-Ázerbaıjan Premer-Mınıstrleri Kaspıı teńiziniń túbinde salynatyn TOBJ qurylysyn ashty

Qazaqstan • 19 Qarasha, 2019

Qazaqstan-Ázerbaıjan Premer-Mınıstrleri Kaspıı teńiziniń túbinde salynatyn TOBJ qurylysyn ashty

Premer-Mınıstr Asqar Mamın jáne Ázerbaıjan Premer-Mınıstri Alı Asadov Aqtaý qalasynda ótken Kaspıı teńiziniń túbinde eki el arasyndaǵy baılanystyń talshyqty-optıkalyq jelisin (TOBJ) salý boıynsha «Trans Caspian Fiber Optic» (TCFO) salýdy bastaý saltanatty rásimine qatysty. Bul týraly Premer-Mınıstrdiń baspasóz qyzmeti habarlady.

Egemen Qazaqstan

Joba transqurlyqtyq bola otyryp, Eýropa men Azııa arasyndaǵy sıfrlyq telekommýnıkasııalyq dálizdi qurady. Kaspıı teńiziniń túbinde uzyndyǵy 380-400 shaqyrymǵa jýyq bolatyn kabel tartý jumystaryn «Transtelekom» AQ, «KazTransCom» AQ jáne «AzerTelecom» ázerbaıjan baılanys operatory júzege asyrady. TOBJ 2021 jyldyń sońyna qaraı paıdalanýǵa beriledi, ol keminde 4-6 terabıt/s syıymdylyqpen aqparattardy jetkizýge múmkindik beredi.

«Ázerbaıjan – Qazaqstannyń strategııalyq seriktesi. QR Tuńǵysh Prezıdenti – Elbasy Nursultan Nazarbaev, ázerbaıjan halqynyń jalpyulttyq kóshbasshysy Geıdar Alıev jáne odan keıin AR Prezıdenti Ilham Alıev dostyq pen ózara tıimdi yntymaqtastyq qaǵıdalaryn ornatqan. Qazaqstan Prezıdenti Q. Toqaev Elbasynyń syrtqy saıası baǵdaryn jalǵastyra otyryp, Ázerbaıjanmen ekijaqty qarym-qatynasty damytyp, tereńdetýge erekshe kóńil bóledi», — dedi A. Mamın.

Qazaqstan Úkimetiniń basshysy «Trans Caspian Fiber Optic» birlesken jobasy derekterdi berýdiń jyldamdyǵy joǵary jáne qorǵalǵan ınfraqurylymyn damytýdyń joǵary deńgeıine shyǵýǵa, jetekshi Eýropa-Azııa magıstraldy baǵyttarynyń qataryna kirýge jáne álemdik derekter tranzıtinde laıyqty oryn alýǵa múmkindik beretinin atap ótti.

A. Mamın jáne A. Asadov eki eldiń saýda-ekonomıkalyq, ınvestısııalyq, kólik-logıstıkalyq, aýyl sharýashylyǵy, ǵarysh jáne mádenı-gýmanıtarlyq salalardaǵy yntymaqtastyǵynyń jaı-kúıi men perspektıvalaryn talqylady.

Mańǵystaý oblysyna jumys sapary aıasynda Premer-Mınıstr A. Mamın metanol jáne olefın óndiretin zaýyt qurylysy júrgiziletin jerge kapsýla salý rásimine qatysty. Jobany sıngapýrlyq «WestGasOil» kompanııasy júzege asyrady, ınvestısııalar kólemi – $1,8 mlrd. Zaýyttyń qýattylyǵy – jylyna 300 myń tonna metanol men 600 myń tonna olefın. Qurylys kezeńinde 4000 jumys orny qurylady, 2023 j. paıdalanýǵa berilgen soń kásiporyn personaly 650 adamdy quraıtyn bolady.

Úkimet basshysy «Aktau Resort Hotel» kópfýnksıonaldy qonaq úı-týrıstik keshenniń salyný barysymen, sondaı-aq «KazAzot», «Mangystau Oil Refining» kásiporyndarynyń jáne «Maga-Bread» nan-toqash zaýytynyń jumysymen tanysty.

A. Mamın Á. Kekilbaev atyndaǵy mádenı ortalyqqa baryp, Qazaqstannyń halyq jazýshysynyń mýzeıi men memorıalyn aralady.