Kezinde, óz Táýelsizdigin alǵan Qazaqstanǵa túrik bıznesmenderi alǵashqy ınvestor bolyp kelgeni sııaqty bul joly da kóshti túrik aǵaıyndardyń ókili bastap otyr. Túriktiń YDA Holding atty kompanııasy Qyzyljar AE aımaǵyndaǵy «Shyǵys» shaǵyn aýdanyna kóp salaly aýrýhananyń qurylysyn salýdy bastady. Onyń irgetasyna Qyzyljarǵa kelgen saparynda Premer-Mınıstr Asqar Mamınniń qatysýymen kapsýla kómilgen edi.
Aıta ketetin jaıt, osy kompanııa Túrkistan oblysynda da osy tárizdes kóp salaly aýrýhana salmaqshy. Bul týraly YDA Holding kompanııasynyń basqarma tóraǵasy Arslan Hýseın men Túrkistan oblysynyń ákimi О́mirzaq Shókeev jaz aıynda kelisimge qol qoıǵan edi. Soltústik pen Ońtústikke salynatyn medısınalyq nysandarǵa kompanııa jalpy kólemi 50 mlrd teńgeni quraıtyn ınvestısııa quımaq. Aıta ketetin bolsaq, bul jobalar Densaýlyq saqtaý ınfraqurylymyn damytýdyń óńirlik perspektıvaly josparlary sheńberinde iske asyrylady.
Keńestegi sózinde óńir basshysy Qumar Aqsaqalov: «Bizdiń maqsat qazirgi jáne bolashaq ınvestorlarǵa meılinshe durys jaǵdaı jasap, kómek kórsetý. Sonda olardyń jumysqa degen yntasyn arttyratyn bolamyz. Qazir ekonomıkalyq aımaqqa kirý týraly Germanııanyń Claas jáne Alageum Electric kompanııalary da qalaýyn bildirip otyr. Biz olarmen de transformator zaýytynyń qurylysyn salý boıynsha kelisimge keldik», - dedi.
Sonymen qatar ótken aptada turmystyq hımııa ónimderin jasaıtyn fabrıkanyń óndirisi de óz jumysyna kiristi. Bul joba «Qarapaıym zattar ekonomıkasy» baǵdarlamasynyń sheńberinde iske qosyldy. Sonymen birge «Kırov atyndaǵy zaýyttyń» negizinde turmystyq tehnıkaǵa arnalǵan kóp qabatty plat óndirý de iske qosylǵanyn buryn jazǵan bolatynbyz.
Sóıtip, teristiktiń óndirisi jandana bastady. О́nerkásiptiń barlyq salasyna da kadrlyq áleýeti kezinde zor bolǵan óńir osylaısha qaıtadan bas kóterýde. Tek isterine Alla sáttilik bersin.
Soltústik Qazaqstan oblysy
