100 • 21 Qarasha, 2019

Azamattyq ustanymym qalyptasty

55 retkórsetildi

Men bul gazetke 1972 jyldyń 8-tamyzynda jumysqa turdym. Ol kezde gazettiń ataýy «Sosıalıstik Qazaqstan» edi. Oǵan deıin bes jyl Qazaq radıosynyń Qostanaı oblysy boıynsha tilshisi, bes jyl Torǵaı oblystyq teleradıokomıtetiniń bas redaktory qyzmetin atqarǵanmyn. Men úshin «Sosıalıstik Qazaqstan» gazeti úlken mektep boldy. «Jazý-sy­zýdy úırendim, belgili bir azamattar ustazym boldy» deı almaımyn. Gazettiń maǵan jasaǵan jaqsylyǵy – sol tustaǵy qazaqtyń mań­daıaldy azamattarymen suhbat qurýyma múmkindik berdi. Sol suhbattardyń barysynda olardyń árqaısysynan ulttyq máselelerge nemquraıdy qaramaýdy úırendim. Osy kisilerdiń arqasynda ol kezde «jabyq taqyryp» bolǵan Alash arystarynyń eńbekterimen túgel tanystym. Ult úshin táýekelge barýǵa bolatynyn túsindim. Gazetke kelgennen bastap habar jazsam da «osydan halyqqa qandaı paıda» degendi oılaıtyn boldym. Buǵan deıingi qalyptasqan «jýrnalıst – partııanyń qolǵanaty» degen túsinikti «jýrnalıst – halyqtyń joqshysy, janashyry, úni» degen uǵymǵa aýystyrdym.

 «Egemen Qazaqstan» – dástúr jalǵastyǵy saqtalǵan qara­shańyraq. Biz jumys istep júrgen kezde Sáken, Beıimbet, Ilııas syndy myqtylardyń kózin kórgen aǵalar bar edi. Olar bizge aqylyn aıaǵan joq. Tilshi bolyp kirip, «Ádebıet jáne óner» bóliminiń meńgerýshisi qyzmetine deıin óstim. «Bir hattyń izimen» aıdary boıynsha 3 adamdy túrmeden shyǵarýǵa septigim tıdi. Qanshama zábir kórip júrgen eńbek adamdarynyń quqyqtaryn qorǵadyq. Munyń bári meniń jazǵyshtyǵymnan emes, gazettiń bedeliniń arqasynda sheshilip jatty. Jalpy gazettiń maǵan bergeni kóp boldy. Tamaǵyn asyrap qana júrgen qatardaǵy kóp adamnyń birinen barlyq nársege syn kózben qaraıtyn, eldiń erteńin oılaıtyn azamatqa aınaldym.

 

Qoıshyǵara SALǴARAULY,

ǵalym-jazýshy, Memlekettik syılyqtyń laýreaty

 

Sońǵy jańalyqtar

Kúlki kerýeni № 20

Rýhanııat • Keshe

Haliń qalaı, Qostanaı?

Aımaqtar • Keshe

«Iokerıtten» jeńildi

Hokkeı • Keshe

Qazaqstan tórtinshi topta

Fýtbol • Keshe

Pedagogterge paıdaly shara

Rýhanııat • Keshe

Onlaın-oqyrman

Tehnologııa • Keshe

Sý basý qaýpi joq

Qoǵam • Keshe

Baspanaly bolyp, baqytqa bólendi

Baǵdarlamalar • Keshe

Ábishtanýdyń áz álipbıi

Rýhanııat • Keshe

Uqsas jańalyqtar