18 qarashada saǵat túngi eki shamasynda Atyraý oblystyq balalar aýrýhanasynyń qabyldaý bólimine 4 jasar bala tústi. Alǵashqy belgileri onyń jaǵdaıy aýyr ekenin aıqyndady. Balanyń tamaq, óńesh joldary bitelip, tamaq júrýi toqtaǵan. Onyń óńeshine 100 teńgelik moneta turyp qalǵany anyqtaldy. Aýrýhananyń kezekshiliktegi dárigerleri endoskopıst Erbol Tólegenovti jumysqa shaqyrtqan. Jumys ornyna kelgen maman jedel túrde endoskopııalyq qurylǵy kómegimen álgi monetany shyǵaryp aldy.
Túngi ekiler shamasynda jumystan telefon shaldy. Jaǵdaıdy túsingen boıda dereý aýrýhanaǵa keldim. Júz teńgelik monetanyń dıametri kishkentaı bala turmaq, úlken adamnyń óńeshin bitep tastaı alady. Biraq ata-anasynyń der kezinde habarlasqanynyń, bizdiń mamandardyń tıisti sharalardy júzege asyrǵanynyń arqasynda balany aman alyp qaldyq. Qazir balanyń jaǵdaıy jaqsy, dedi dáriger Erbol Tólegenov.
Balamnyń tıyndy qaı kezde jutyp qoıǵanyn bilmeımin, bir biletinim bet álpeti ózgerip, jaǵdaıy nasharlaı bastaǵanda jedel járdem shaqyrdym. Odan keıin, jedel járdem aýrýhanaǵa apardy. Áıteýir aman alyp qaldy balamdy. Sol sebepti dereý kelgen jedel járdem qyzmetkerlerine de, tıisti em-domyn jasaǵan balalar aýrýhanasy dárigerlerine de alǵysym sheksiz, deıdi balanyń anasy.
