22 Qarasha, 2019

«Egemenniń» toıy – eldiń toıy

232 retkórsetildi

Alash amanatyn abyroımen arqalap bolashaqqa baǵdar burǵan ult únparaǵy «Egemen Qazaqstan»-nyń ǵasyr bıigindegi ǵıbratty toıy – muqym qazaqqa ortaq mereke, aıtýly sát. «Ushqynnan» ot alyp, kemel keleshekke batyl qadam basqan el gazetiniń rýh muzartynan úzdiksiz ún qatyp kele jatqanyna – 100 jyl! Tutas ǵasyr ult shejiresin tasqa qashaǵan qarashańyraq basylymnyń dáýir tynysyn bederleýdegi tarıhy da, taǵylymy da teńdessiz. Kúni keshe sol tarıhtyń taǵylym bıiginen ún qatqan ulaǵaty ulyqtaldy. Kúlli qazaq kóz tikken mereıli sát elorda tórinde saltanatty túrde atalyp ótti.

Ǵasyrlyq mejege kelgen el gazetiniń mereıtoıyna Memleket basshysy Qasym-Jomart Toqaev pen Tuńǵysh Prezıdent – Elbasy Nursultan Nazarbaev quttyqtaý hatyn joldady. Saltanatty jıynda bul jyly lebizderdi Memlekettik hatshy Qyrymbek Kósherbaev jetkizdi. (Quttyqtaý hattarynyń mátini bólek berildi).

Memlekettik hatshy Qyrymbek Kósherbaev bul mereıtoı ulttyq rýhanııat úshin tolaǵaı beles, torqaly mereke ekenin, alǵash ret 1919 jyly Orynbor qalasynda jaryqqa shyqqan ata basylym búginde elimizdiń ǵasyrlyq jylnamasyna aınalǵanyn atap ótti.

– Basylym betterin paraqtaǵanda ultymyzdyń ǵasyr ishinde bastan keshirgen kezeńderi kóz aldyńyzǵa kelip, jıyrmasynshy jyldardaǵy ujymdastyrý, otyzynshy jyldardaǵy asharshylyq pen repressııalar, ekinshi dúnıejúzilik soǵys jyldary, tyń ıgerý jáne basqa da taǵdyrly ári tarıhı oqıǵalarmen órilip, azattyqtyń aq tańyndaǵy aqjoltaı jańalyqtarmen arnasy jalǵasady. Zamana únine aınalǵan bas gazet ár jyldary respýblıkamyzdyń astanasy bolǵan Qyzylorda, Almaty qalalarynda jumysyn jalǵastyryp, el ómirindegi órkendi isterdi oqyr­man­darǵa der kezinde jetkizip otyrdy. Gazet jýrnalısteri qaı kezde de halyqtyń qoǵamdyq-saıası, áleý­mettik-ekonomıkalyq, mádenı-rýhanı taqyryptardaǵy qadaý-qadaý prob­lemalaryn qaýzap, ıgilikti iske janashyrlyqpen ún qosty. Keleli máse­lelerdiń kesimdi sheshim tabýyna kásibı sheberlikpen atsalysty. Eń bas­tysy, «Egemen Qazaqstan» gazeti qaı dáýirde, qandaı formasııa­da qyzmet etse de, ult múddesiniń joqtaýshysy, qazaq rýhanııatynyń izdeýshisi, tól mádenıetimizdiń janashyry bolyp keledi, – dedi Qyrymbek Kósherbaev.

Osy rette Memlekettik hatshy mereıtoıǵa oraı Prezıdent Qasym-Jomart Toqaevtyń Alǵysyn «Egemen Qazaqstan» gazetiniń basqarma tóraǵasy Darhan Qydyrálige, basqarma tóraǵasynyń orynbasary Erbolat Qamenge, bas redaktordyń orynbasary Talǵat Batyrhanǵa, saıasat bóliminiń meńgerýshisi Joldybaı Bazarǵa jáne basylymnyń aǵa korrektory Zápıra Tóleshovaǵa tabystady.

Sahna tórine kóterilgen Premer-Mınıstrdiń orynbasary Berdibek Saparbaev el ıgiligine qyzmet etip júrgen egemendikterdiń eńbegin erekshe atap ótip, Úkimet basshysy Asqar Mamınniń quttyqtaýyn oqyp berdi.

Premer-Mınıstr hatynda bir ǵasyrdyń shejiresi dep biletin «Egemen Qazaqstan» gazeti el basyna kún týǵan, er taǵdyry synǵa túsken ýaqyttyń ózinde de ulttyń únin jetkizýge, jaqsylyqtyń jarshysy bolýǵa umtylǵanyn aıtqan.

«Qazaq halqynyń keńestik kezeńdegi taǵdyrly tarıhy, jarqyn jetistigi gazettiń sarǵaıǵan paraqtarynda saqtaýly. Ult zııalylarynyń eldik úshin egeske, memlekettilik úshin kúreske túsken kezdegi maqalalary da osy basylymda jaryq kórdi. Azattyq úshin arpalysqan tulǵalardyń eńbeginiń óteýindeı bolǵan táýelsizdiktiń qar­sańynda «Sosıalıstik Qazaqstan­nyń» eń birinshi bolyp «sosıalızm­men» birjola qosh aıtysyp, «Egemendi Qazaq­stan» atanýynyń ózi eldiń eńsesin bıiktetti. Azattyq alar kúndi ja­qyn­datyp, halyqtyń kóki­regine senim uıa­latty, rýhyn kóterdi. Osylaısha el­diktiń uranyn asqaqtatqan gazet búginde Táýelsizdik tuǵyryn nyǵaıtý jolynda qyzmet etip keledi», dep atap ótken Asqar Mamın quttyqtaý hatynda.

Aqjarma tilekter aǵylǵan mereı­­toıda Parlament Senaty men Máji­lisiniń depýtattary da «Egemen Qa­zaq­stan» gazetiniń eńsesin bir kóterip tas­tady.

Senat Tóraǵasy Darıǵa Nazar­bae­va­nyń izgi tilegin senator Nurtóre Júsip jetkizdi.

– Basylymnyń ár sany, ár maqalasy halqymyzdyń tynys-tirshiligin aıqyn kórsetip, memlekettik baǵdarlamalar men reformalardyń mańyzyn qalyń kópshilikke der kezinde ári sapaly jetkizýge atsalysyp keledi. Ǵasyrlyq shejiresi bar gazetti oıy tushymdy, qalamy qarymdy, jazǵany jalyndy jýr­nalısterdiń ordasy deýge bolady. Sebebi sizder bılik pen buqara ara­syndaǵy altyn kópir bolyp, tynymsyz eńbektiń arqasynda oqyrmannyń oń baǵasyn alyp kelesizder. Búgingi ujym­nyń tolaıym tabystary sol beınetti eńbek jolyndaǵy jetistikterimizdiń baǵamy dep bilemin, – delingen quttyq­taýda.

Al depýtat Qýanysh Sultanov Májilis Tóraǵasy Nurlan Nyǵma­týlınniń quttyqtaýyn oqyp berdi. Onda Alash zııalylary negizin qalaǵan basylym bir ǵasyrlyq tarıhynda talaı syndardan súrinbeı ótip, táýelsiz Qazaqstannyń bas gazeti atanǵany, elimiz egemendik alǵan kúnnen bastap, gazet zaman aǵymyna saı ósip-órkendep, talǵamy bıik shyǵarmashylyq ujym qalyptasyp, mazmuny men sheberligi jaǵynan jańa serpinge ıe bolǵany atap kórsetildi. Sondaı-aq Nurlan Nyǵmatýlın «Egemen» jýrnalısteri qandaı taqyrypqa qalam terbese de, oqyrmannyń júreginen jol taýyp, táýelsizdigimizdiń jetistikterin úzdiksiz nasıhattap, memleketimizdiń abyroıyn asyryp júrgenin aıtyp, bas gazet aldaǵy ýaqytta da halqymen birge jasap, talaı belesti baǵyndyratynyna zor senim bildirgen.

Sondaı-aq redaksııamyzǵa elimizdiń Konstıtýsııalyq keńesiniń tóraǵasy Qaırat Mámıden de quttyqtaý hat túskenin aıta ketken jón.

«Egemen Qazaqstan» bir ǵasyr qazaq eliniń rýhanı, aqparattyq, ǵylymı aǵartýshylyq suranysyn qamtamasyz etip kele jatqan ulttyń ustazy, jetistiginiń jarshysy, áleýmettik ómiriniń aınasy.

 Aqıqat pen ádildik, shyndyq pen zańdylyq egiz uǵymdar, ony túsiný,  qaýymǵa jetkizý ardyń isi, joǵary mádenıet pen ımandylyq paryzy, Egemenniń ushqynynan eńbekshi qazaq jańardy, áleýmet táýelsiz bolyp jańǵyrdy.

Memleket qurylymynyń eń mańyz­dy tetigi Konstıtýsııanyń qýatty­lyǵy, quqyq qorǵaý, qoldaný ınstı­týt­tarynyń ońtaıly jumys isteýi, bar­shany qu­qyq­tyq saýattylyqqa jet­kizý, zańǵa senimin uıalatý, otan­súı­gishtik qasıetterdi boı­ǵa sińirý bolsa, ony júzege asyratyn da, qaýym­ǵa jetkizetin de negizinen bas­pa­sóz quraldary, onyń basynda tur­ǵan ult­tyń ar ujdany «Egemen Qazaqstan». Gazet ujymynyń júz jyl­dyq mer­zimde atqarǵan qyzmeti tarıh úshin qaıta­lanbaıtyn erlik», delingen quttyqtaý hatta.

Jastar jyly jáne «Egemen Qazaqstan» gazetiniń 100 jyldyǵy aıasynda «Úmit» jas jýrnalıster konkýrsy ótkizilgen edi. Osy saltanatty jıynda konkýrs jeńimpazdaryn Aq­parat jáne qoǵamdyq damý mınıstri Dáýren Abaev marapattady.

Mınıstr aldymen bıyl tarıhy tereń, mártebesi zor «Egemen Qazaqstan» gazetiniń ǵasyrlyq belesi toılanyp jatqanyn, qazaqtyń birtýar tulǵalary qyzmet etken bul basylym qazaq baspasóziniń qarashańyraǵy ekenin aıtyp, aldaǵy ýaqytta da qara­shańyraqtyń qadir-qasıeti túspeı, qarapaıym jýrnalısterdiń eldiń sózin sóıleıtin tulǵa bolyp qalyp­tasýlaryna tilektestik bildirdi.

Sonymen «Baspasózdiń yqpaldy ári bedeldi bolýy úshin ne istemek kerek?» degen suraqqa jaýap izdep, otan­dyq jýrnalıstıkanyń keshegisi men búginin saraptap, keleshegine kóz júgirt­ken qaraǵandylyq jas jýrnalıst Dýlat Amanjol «Otandyq BAQ-ty damytýǵa qatysty jeti oı» sarapta­malyq maqalasy úshin 3-orynǵa laıyq dep tanyldy.

«Egemen Qazaqstan» gazetiniń tarı­hyna úńilip, onda qyzmet etken bel­gili qalamger Qalmaqan Ábdiqady­rovtyń qalaı jumysqa turǵany, Qyzylordadaǵy Ilııastyń izi, Uzaq Baǵaev­tyń azamattyq ustanymy týraly qy­zyqty derekterge qurylǵan «О́tken­niń ónegesi óshpeıdi» atty maqalasymen qyzylordalyq jýrnalıst Erasyl Sháribek 2-oryn aldy.

Al 1-oryndy Petropavl qalasynan kelgen Araılym Beısenbaeva «Qala­my muqalmas qaıratker» atty maqala­symen ıelendi. Bul maqala belgili jýr­­nalıst-pýblısıst, «Egemen Qazaq­stan» gazetiniń Soltústik Qazaq­stan obly­syndaǵy menshikti tilshisi qyz­metin atqarǵan, eldik múdde, ulttyq másele­lerde «Egemenniń» týyn bıik ustaǵan marqum Málik Muqanov týraly jazyldy.

Sonymen qatar mereıtoı aıasyn­da «Eń qysqa áńgime» baıqaýy jarııa­lanǵan edi. Bul baıqaýǵa kelip túsken 300-den asa shyǵarmanyń ishinen «Qostanaı tańy» gazetiniń tilshisi, jas aqyn Jandos Júsipbektiń áńgimesi top jardy. Jeńimpazǵa aqshalaı júlde men arnaıy dıplomdy talaı jyl «Egemen Qazaqstan» gazetin basqarǵan, búginde Májilis depýtaty Saýytbek Abdrahmanov tabys etti.

Marapattaý sońynan sóz sóılegen qalamger «Egemen Qazaqtan» tek qazaq tilinde shyǵatyn kóp gazettiń biri emes, «Egemen» shyn mánindegi qazaqy, rýhty gazet» dep joǵary baǵalap, bar­sha ujymdy, jalpy qazaq halqyn baba basylymnyń ǵasyr toıymen quttyqtady.

Saltanatty is-sharada elorda­lyq Q.Qýanyshbaev atyndaǵy akade­mııa­lyq qazaq mýzykalyq drama teatry ártisteriniń qatysýymen daıyn­dalǵan «Júz jyl jáne jalǵyz sát» teatrlandyrylǵan qoıylymy kórer­men nazaryna usynyldy. Sahnaǵa kezegimen kóterilgen ult únjarııa­syn ár jyldary basqarǵan Alash arys­tarynyń aıaýly beınesi hám urpaqqa aıtqan amanat-aryzy taǵylym, taǵzym toıyna jınalǵan kórermenniń kóńiline berik bekip, bas basylymnyń júz jyldyq jylnama shejiresin tutas kórip shyqqandaı aıryqsha áserlendi. Bernııaz Kúleev (Jasulan Erbolat), Ahmet Baıtursynuly (Meıram Qaı­sanov), Júsipbek Aımaýytov (Asylbek Qapaev), Beıimbet Maılın (Oljas Jaqypbek), Sáken Seıfýllın (Keńes Nurlanov) bastaǵan arystar amanaty Ǵabıt Músirepov (Bolat Ybyraev), Sherhan Murtaza (Janqaldybek Tólenbaev), Ábish Kekilbaev (Boranbaı Moldabaev) taǵylymyna ulasty. Sahnalyq kórinis sońy dástúrli ánshi Qanat Júnisovtiń oryndaýyndaǵy Murathan Eginbaevtyń «Úsh arys» áni men Allajar Qaıbardyń oryndaýyn­daǵy Aqseleý Seıdimbektiń «Saryarqa» ánine jalǵanyp, ulttyq rýhymyz bir silkinip alǵandaı ǵalamat kúı keshtik.

Tereńnen sóz marjanyn terdim búgin,

Rýhanııat kóshin bastap jeldim búgin.

Qazaq baspasóziniń tóbe bıi,

Eki sózben sheshetin erdiń qunyn.

Kómekeıi qazynaly baba gazet,

Maıqy bıdeı tolǵaıdy eldiń muńyn, – dep tolǵanǵan belgili aıtysker aqyn Amanjol Áltaevtyń «Egemenge» arnaýy da taǵylymdy keshtiń kórigin qyzdyryp, arqaly kórermenin bir silkintip alǵany sózsiz.

Taǵylymdy kesh sońyn gazet basshysy Darhan Qydyráli qory­tyn­dylady.

– El gazeti «Egemenniń» mereıli mejesi – ǵasyr toıyn qorytyndylap jatyrmyz. Biz bıyl jyl basynda Abaı­dyń jerinde, Jıdebaıda basta­ǵan gazettiń 100 jyldyq mereıtoıyn jer-jerde, alashtyń ulyla­rynyń – Sáken Seıfýllın, Beıimbet Maılın, Ilııas Jansúgirov, Turar Rysqulov, Sultanbek Qojanov syndy babalarymyzdyń 125 jyldyq mereı­toı­larymen sabaqtastyryp, úndes­tirip atap ótýge tyrystyq. Sebebi «Egemenniń» júrip ótken joly taǵy­lym men taǵzymǵa toly. Qazaqqa qazaq ataýyn qaıtarýǵa aıryqsha úles qos­qan, eldik rýhty eńseli etýge eńbek etken azattyqtyń araıly tańynda qasıetti Táýelsizdigimizdi súıinshi­legen «Egemen Qazaqstan»-nyń toıy – bar­sha­myzdyń toıymyz, kúlli qazaq baspa­sóziniń toıy, – dedi basylym basshysy.

Merekelik jıynnyń taǵy bir aıtýly tusy – saltanatty shara ót­ken «Qazmedıa» konsert zalynyń foıe­sin tutas ala qoıylǵan «Egemen Qazaqstan»-nyń 100 jyldyq shejire­sinen syr shertken kórme boldy. Bas basy­lymnyń ár kezdegi aıtýly sátteri taspalanǵan tamasha sýretter tarıh tolqynyndaǵy dáýir únin tamasha bederlepti. Alash arystarynyń arhıv sórelerinde saqtalǵan kóne fotolary men qoǵam, redaksııa ómiriniń túrli tarıhı oqıǵalary, qyzyqty mezetteri men jumys barysyndaǵy san alýan jaǵdaılary jan-jaqty beınelengen sýretter de gazettiń ǵıbratty joly men zamana atmosferasyn shynaıy jetkizedi. Sondaı-aq kórme tórine qoıylǵan «Egemen Qazaqstan» gazeti arhıvinen alynǵan ǵasyr syryn ónboıyna syıdyrǵan sarǵaıǵan gazet tigindileri, ujymnyń ár jyldarda paıdalanylǵan terim mashınkalary, tilshilerdiń eski dıktofondary men túrli úlgidegi fotoapparattary, gazetti basqarǵan tulǵalarǵa tıesili zattar, atap aıtsaq, Sherhan Murtazanyń kózildirigi men Ábish Kekilbaevtyń sııaqalamy, qoljazba kúıindegi tamasha týyndylary – barlyǵy da kórýshisin bir sátke tarıh qoınaýyna súńgitip jibergendeı tolqytqany anyq. Budan bólek, gazettiń ǵasyr toıy qarsańynda jaryqqa shyqqan «Júzjyldyq jylnama» bestomdyǵy, «Egemen Qazaqstan». Elbasy» foto albomy da tarıhı kezeńniń jaýapty da sáýleli sátterinen mazmunǵa toly tereń syr tarqatady.

Júz jasaǵan basylymnyń mere­ıin tasytqan saltanatty is-shara­nyń sońynda aqyn, sazger Elena Ábdi­halyqova «Egemen Qazaqstan» gazetine án arnady. Alǵaýsyz oı, aǵedil kóńilden týǵan bul ánge «Egemende» qyzmet etken arystar men alyptardyń jolyn bersin degen nıetpen ortaǵa shyqqan bir top jas jýrnalıst qosylǵanda, bas basylymnyń gımnindeı shyrqaldy.

 

Berik ÝÁLI,

Qazaqstan Respýblıkasy Prezıdentiniń baspasóz hatshysy:

– Memleket basshysy Qasym-Jomart Kemeluly Toqaev «Egemen Qazaqstan» gazetin únemi nazarynda ustaıdy, kúndelikti oqyp otyrady. Birinshi «Egemen Qazaqstan»-nan bastaıdy desem qatelespeımin. Gazet betinde kóterilgen keıbir ózekti máselelerge kóńil bólip, sheshý úshin naqty tapsyrmalar da berdi. «Egemen Qazaqstan» – elimizdiń jylnamasyn tasqa basyp túsirip otyrǵan basty basylym. Elimizdiń bas basylymynyń mereıtoıy – barsha qazaqtyń mereıtoıy. «Egemen Qazaqstan» – eldiń muńyn muqtap, joǵyn joqtaıtyn, eldiń eldigin kóteretin basylym. Sol sebepti bul – «Egemenniń» ǵana toıy desek qatelesemiz. Bul – barsha Alash jurtynyń toıy. О́ıtkeni tarıhtan jaqsy biletindeı, bul basylymnyń basynda Alash ardaqtylary turdy. Búginde «Egemen Qazaqstan» elimizdiń tynys-tirshiligin halyqqa kúndelikti jetkizip otyrǵan gazet. Sol sebepti, Ahań aıtqandaı, halyqtyń kózi, qulaǵy hám tili bolyp otyrǵan basylym. «Egemendikterdi», barsha jurtty mereıtoıymen shyn júrekten quttyqtaımyn. 

 

Kenjeǵalı MYRJYQBAI,

Qazaqstannyń eńbek sińirgen ártisi:

– 1996 jyldary «Egemenniń» redaksııasyna jıi baryp turatynmyn. Ondaǵy zııaly qaýymmen túrli taqyrypta áńgime qozǵap, jaqsy aralasatyn edik. Odan keıin gazet redaksııasy elordamyzǵa kóship keldi, kósheniń aty berildi. Osylaısha, eki astananyń ortasynda kópir paıda boldy. «Egemenniń» jýrnalısi Qarashash Toqsanbaı menen jıi suhbat alatyn. Men týraly jazǵan maqalalarynan kitap basýǵa jarap qaldy-aý. Sonymen birge gazettiń fototilshilerin de atap ótkim kelip tur. Ár maqalanyń sáni – sýret. Adamnyń emosııasyn qalt jibermeı, eń sáttilerin tańdap beretin Orynbaı, Erlan baýyrlarymdy da merekelerimen quttyqtaımyn.

Osynaý úlken toıǵa respýblı­­-
ka­myzdyń túkpir-túkpirinen qa­lam­gerler, gazettiń ardagerleri jınalyp otyr. Basylym basshylyǵy da olardy mereı­toılyq medaldarmen marapattap, eńbekterin elep jatyr. Bári bas qosyp, arqa-jarqa bolyp qaldy. Alystan kelgender bir-birimen tabysyp jatyr. Men de kópten kórispegen jýrnalıstermen qaýyshyp ózim bir jasap qaldym. Toı qutty bolsyn!

 

Nesip JÚNISBAIULY,

jýrnalıst, Qazaqstannyń eńbek sińirgen qaıratkeri:

– Shyn máninde, búgingi mereke – qazaq baspasóziniń toıy. «Egemen» qashanda kósh basynda bolatyn. Bul gazetpen baılanysty oqıǵalar da, estelikter de kóp. «Sosıalıstik Qazaqstan» kezinde maqala jazyp, kóp oqydyq. Sapar Baıjanov aǵamyz meniń jazǵandarymdy jaqsy kórip, gazetke usynyp turatyn. Sheraǵańdar basymyzdan sıpap, aqylyn aıtyp otyratyn. Aqseleý Seıdimbek, Qoıshyǵara Salǵara, Keńes Iýsýpov aǵalarymyzben de turaqty baılanysta edik. Bul jıynǵa tolǵanyspen kelip, úlken áserde ketip bara jatqan jaıym bar. Nege deseńiz, búgin kórsetilgen fılmde elimizdi, halqymyzdy álemdik deńgeıge shyǵarǵan ulylardyń beınesin kórdik. Endigi kezekte solardy sońymyzdan ergen jas áriptesterimizge jetkizýimiz paryz. «Egemen Qazaqstan» – úlken mektep. Qyzmetkerleriniń arasynan talaı myqty qoǵam qaıratkerleri shyqty. Búgingi jastardyń arasynan da qazaq baspasózin kórkeıtetin jaqsy jýrnalıster shyǵady dep senemiz. El gazetiniń 100 jyldyǵy qutty bolsyn! Qazaq gazetteriniń barlyǵyna juǵysty bolǵaı! 

 

Kópen ÁMIRBEK,

belgili satırık:

– «Egemen Qazaqstan» gazetinde bas redaktor Sherhan Murtaza tusynda úsh jyl qalam terbedim. «Egemenniń» mektebi bir bólek, Sherhan Murtaza aǵamyzdyń mektebi tipti erekshe. Nege? Danyshpandar aıtady. «Dúnıege nuryn tógetin eki nárse bar. Biri – Kún, biri – jýrnalıster» deıdi. Kúnnen shýaq tógilse, jýrnalısterden qýat tógiledi. Bir sózben aıtqanda, «Egemen Qazaqstan» gazeti – shýaqty da, qýatty da halqyna arnap júrgen bas gazet. Erterekte osy «Egemende» eńbek etken Ázilhan Nurshaıyqov aǵamyzdyń aıtqany bar edi: «Tozǵan jýrnalıst tot basqan bolt sııaqty, ne alynbaıdy, ne salynbaıdy». Biz sol kezde nege olaı aıtty dep oılaıtynbyz. Sóıtsek, keshegi Keńes ókimeti, partııanyń kezinde kemeline kelgennen keıin, sol qalamgerler qartaıǵandaı qalyp tanytyp, sol tot basqan boltqa uqsaǵan soń aıtqan-aý deımin. Al qazir «Egemen» qyzýy qaınaǵan jastardyń qolynda. Qaı jýrnalıst, qaı qalamgerdi alsań da, árqaısysy bir-bir bólshek, bir-bir mashına, bir-bir tehnıka, bári de sý jańa. Olardyń oılary – elimizdiń eńsesin bıikke kóterý. «Egemen Qazaqstan» gazeti júrdek poıyz sııaqty. Onyń vokzaly, shyǵatyn ýaqyty, toqtaıtyn úlken-úlken shahardaǵy beketteri bar. Ol keshikpeı, ýaqytynda júredi. О́ıtkeni sol júrdek poıyzǵa halyq senedi. Osyndaı ýaqytta keledi, osyndaı ýaqytta minemiz, osyndaı kezde júremiz deıdi. «Egemen Qazaqstan» gazeti eldiń senimin uıalatqan osy júrdek poıyz sekildi.

 

Shámshıdın Pátteev,

«Qazaq gazetteri» JShS bas dırektory:

«Egemenniń» toıy – qazaq baspa­sóziniń toıy. Memleket bolyp alǵash qurylǵanda qazaqtyń, eldiń, ulttyń sózin sóılegen «Ushqyn» gazeti boldy. Odan beri júz jyldyń ishinde qazaqtyń joǵyn joqtap, memlekettiń sózin sóılep, eldiń máselesin aıtyp kele jatqan birden-bir gazetke aınaldy. Árıne oǵan deıin de talaı gazetter shyqty, biraq onyń barlyǵy jalǵasyn tappaı, biraz shyǵyp, toqtap qaldy. Júz jyl boıy úlken taralymmen búkil bir ulttyń joǵyn joqtaǵan gazettiń biregeıi «Egemen» ekeni daý­syz. Áriptesterimdi shyn júrekten quttyqtap, tabys tileımin. Bolashaqta da gazet eldiń sózin sóıleıdi degen úmitimiz bar.

 

Asqar OMAROV,

«QazAqparat» HAA bas dırektory:

– Qazaqstan jáne qazaq jýrnalıstıkasy tarıhynda «Egemen Qazaqstan»-nyń orny bólek. Búgin de, osyǵan deıin de estigen qazaq baspasóziniń qarashańyraǵy degen teńeý bas basylymǵa qatysty beker aıtylmasa kerek. Sebebi elimizdegi kóptegen jýrnalıst «Egemenniń» kásibı mektebinen ótti. Gazet betterinde Qazaq eliniń 1919 jyldan bergi tarıhy kórinis tapqan desek, artyq emes. Gazettiń árbir sany – tunyp turǵan shejire. Qazaq eliniń sońǵy júz jyldaǵy tarıhyna úńilgisi keletin kez kelgen adam osy gazettiń betterin muraǵattan paraqtap shyqsa bolǵany. Bul paraqtarda jýrnalıstıka tarıhy da bar, tulǵalardyń taǵdyry da bar. Gazettiń 200, 300, 1000 jyldyǵyn toılaýǵa jazsyn.   

 

Oljas BERKINBAEV,

«Saryarqa aqparat» JShS dırektory:

– Búgingi toıǵa Qaraǵandy oblysynan arnaıy kelip otyrmyz. «Egemenniń» júzjyldyǵy – qazaq baspasózindegi aıtýly oqıǵa. Tarıh tuǵyrynan qaraıtyn bolsaq, «Egemen» – revolıýsııany, asharshylyq kezeńin, Uly Otan soǵysyn ótkergen, halyqtyń turmysymen bite qaınasqan basylym. Gazet táýelsiz Qazaqstannyń tarıhyn zertteımin degenderge taptyrmas qural. Tyń aqparattar taýyp, sol kezdegi halyq ómirinen habar alýǵa úlken múmkindik bermek. Tek tarıh emes, halyqtyń mádenıeti, turmysy da gazette kórinis tabady. Sondyqtan gazet halyq ómiriniń aınasy ispettes.

Sońǵy jyldary Egemenniń transformasııasyn eskermeý múmkin emes. Gazet formatynyń ózgerýinen bastap, gazet ujymyna jastardyń tartylýy qýantarlyq jaıt. Jastar bar jerde jańa ıdeıalar bolady.

 

Jandos JÚSIPBEK,

«Qostanaı tańy» oblystyq gazetiniń tilshisi:

Búgin el gazeti Egemenniń ǵasyr toıynda júldeli bolyp otyrmyn. Osyndaı qýanyshty sebeppen toıǵa qatysýǵa múmkindik týǵany da baqyt. Es jıǵannan oqyp kele jatqan gazetimiz bolǵan soń, ár jańalyǵynan, ár ózgerisinen habardarmyz. «Egemen Qazaqstan»-nyń mereıtoıy qutty bolsyn! Ultpen taǵdyrlas gazet áli talaı urpaqtyń qurdasy, muńdasy, syrlasy bolady degen senim mol. Gazet ujymyna shyǵarmashylyq tabys pen eńbegine jemis tileımin. Áriptesterimizdiń qalamdary ushty, jazarlary kúshti bolsyn!

 

Orynbek О́TEMURAT,

Nazerke JUMABAI,

Svetlana ǴALYMJANQYZY,

Merýert BÚRKITBAI,

«Egemen Qazaqstan»

Sońǵy jańalyqtar

Kúlki kerýeni № 20

Rýhanııat • Keshe

Haliń qalaı, Qostanaı?

Aımaqtar • Keshe

«Iokerıtten» jeńildi

Hokkeı • Keshe

Qazaqstan tórtinshi topta

Fýtbol • Keshe

Pedagogterge paıdaly shara

Rýhanııat • Keshe

Onlaın-oqyrman

Tehnologııa • Keshe

Sý basý qaýpi joq

Qoǵam • Keshe

Baspanaly bolyp, baqytqa bólendi

Baǵdarlamalar • Keshe

Ábishtanýdyń áz álipbıi

Rýhanııat • Keshe

Uqsas jańalyqtar