23 qazanda Nur-Sultan qalasynda III respýblıkalyq ımamdar forýmy ótip, shara barysynda «Jeti rýhanı qazyq» dep atalatyn tuǵyrnama qabyldanǵany belgili. Jýyqta Qazaqstan musylmandary dinı basqarmasynyń О́skemen óńiri boıynsha bas ımamy, oblystyq «Halıfa Altaı» meshitiniń bas ımamy Ermek qajy Muqataı aımaqtyń jýrnalısterimen kezdesip, tarıhı qujattyń mán-mańyzyn jan-jaqty túsindirip berdi. «Tuǵyrnamada ımandylyq, otanshyldyq, bilim alý, birlikke bolysý, eńbekqorlyq, mádenıettilik jáne ádildik syndy jeti qaǵıda negizge alynǵan. Jeti qaǵıda da qazirgi bizdiń qoǵamǵa aýadaı qajet ekeni aıtpasa da túsinikti bolar. Biz osy tuǵyrnama aıasynda aldaǵy ýaqytta ártúrli rýhanı-tanymdyq sharalar uıymdastyrýdy josparlap otyrmyz. «Jeti rýhanı qazyq» ımamdarǵa, din adamdaryna ǵana emes, halyqqa qajet dúnıe dep esepteımiz» degen bas ımam elordada ótken forýmda Dinı basqarma atqaratyn dinı rásimder jáne dinı laýazymdar tizilimi syndy qundy qujattar qabyldanǵanyn da jetkizdi.
Pátýany kim shyǵarady?
Forýmda qabyldanǵan «QMDB qurylymyndaǵy dinı laýazymdar tizilimi» atty qujatta meshittegi ár qyzmetkerdiń mindetteri belgilenipti. «Bas ımamnyń, naıb ımamnyń, azanshynyń, qarıdyń, ustazdyń jumystary qandaı? Osynyń bári qujatta anyq kórsetilgen. Máselen, aýdan men qalanyń bas ımamdaryna pátýa shyǵarýǵa bolmaıdy. Pátýa tek oblystyq meshitte shyǵarylady. Budan bólek «QMDB atqaratyn dinı rásimder tizilimi» deıtin qujatta adam dúnıege kelgen sátten bastap, dúnıe salǵanǵa deıingi aralyqta atqarylatyn dinı rásimderdiń 45 tarmaqtan turatyn sharttary jazylǵan» deıdi E.Muqataı.
Shala moldalarǵa shara qoldana almaımyz
Bas ımam óńirde meshitte resmı túrde jumys istemese de, dinı rásimderge qatysatyn dúmshe moldalardyń kóp bolmasa da, biren-saran bar ekendigin, olardy as berýshi adam ózi tańdaıtyndyqtan tyıym sala almaı júrgendikterin de jasyrmaı aıtty. «Qurandy naqyshyna keltire, ádemilep oqıtyn kisilerdi bilimdi, tereń adam dep oılaıtyndar aramyzda az emes. «Astyń ıesi shaqyrdy» degen soń mundaı moldalarǵa shara qoldana almaımyz. Osyndaı shala moldalar astan nemese qatymnan shyqqannan keıin: «Meni shaqyrsańyzdar bolady, meniń stavkam pálenshe» dep aıtady eken. Halyqqa aıtarymyz, bizdiń ımamdarda eshqandaı da stavka joq. Munyń bizdiń ımamdarǵa esh qatysy joq. Bizdiń ımamdar aqsha suramaıdy. Jurt óz yqylasymen berip jatsa, sadaq retinde alady. Osy rette halyqqa dinı bilimi bar, meshitte jumys isteıtin ımamdardy shaqyrýǵa keńes beremiz» deıdi ol.
Meshitti salýshylar kóp, qaraýshylar az
Kezdesýde qazir ekiniń biri meshit salǵysh bolyp alǵany, salýyn salǵanymen artynan ǵıbadat úıi múlde qaraýsyz qalatyny jaıynda da aıtyldy. «Qazir meshit salatyndar kóp. Biri óziniń ataǵyn shyǵarý úshin salsa, ekinshisi shyn nıetpen, shyn kóńilmen turǵyzady. О́kinishke qaraı, meshit salǵan azamattardyń keıbiri «men óz mindetimnen qutyldym» degendeı, sol kúıi meshitke at izin salmaı ketedi. Meshit bolǵannan keıin onyń kútimi, basqa da dúnıeleri bar emes pe?! Sondyqtan Dinı basqarma meshit salýshy azamattarǵa onyń ary qaraıǵy kútimin esten shyǵarmaýdy eskertip otyr. Jasyratyny joq, qazir kóp aýyldarda ımam joq. Tabý qıyn. Keıde kásipker azamattarǵa: «Kishkene aýyldarǵa meshittiń qajeti joq, shaǵyn namazhana bolsa jetedi. Odan da balabaqsha, jol, kópir salyp berińizdershi. Halyq soǵan rıza bolady» dep usynysymyzdy aıtyp jatamyz» deıdi.
О́SKEMEN
