Biz ulttyq as degende aýyzǵa et, qýyrdaq, qurt, qymyz jáne taǵy birdi-ekili ataýlardy ǵana alamyz da, sonymen shektelip qalamyz. Al shyn mánisinde, qazaqtyń ashanasy san qyrly jáne ol biregeıligimen tańdaı qaqtyrady. Mysaly, «Halyq qazynasy» ǴZI materıaldyq emes mádenı mura bóliminiń jetekshisi, etnograf Áıgerim Musaǵajınovanyń aıtýynsha, búgingi kúnde qazaqtyń 200-ge tarta taǵamynyń ázirlený qupııalary qalpyna keltirilgen eken.
Shara barysynda qonaqtarǵa dástúrli et, sút taǵamdary, un ónimderi men sýsyndardy ázirleý jáne olardyń bıologııalyq qundylyǵynyń tehnologııasy týraly jan-jaqty aqparat berildi. Sondaı-aq umytylǵan resepter boıynsha ázirlengen taǵamdar festıval qatysshylarynyń zor qyzyǵýshylyǵyn týdyrdy.
Baıqaý úmitkerleriniń jumystaryna Aqparat jáne qoǵamdyq kelisim mınıstrliginiń ókilderi, Qazaqstan halqy Assambleıasynyń músheleri jáne qoǵam qaıratkerleri baǵa berdi. Olardyń sheshimimen Baqytty Qanapınova, Gúlmıra Káribaeva jáne Gúljan Úzdenbaeva atalǵan festıvaldiń jeńimpazdary bolyp tanyldy. Bul úshtik endi Nur-Sultan qalasynda ótetin qorytyndy kezeńde baq synaıtyn boldy.
– Qazaqstanda gastronomııalyq týrızmdi batyl túrde damytýǵa bolady. Ulttyq taǵamdar týraly sóz bolǵanda, olardyń adamdy baýrap alatyn úsh negizgi sapasy – dámi, ıisi jáne túsi jóninde maqtanyshpen aıtýǵa bolady. Al et, sút jáne astyq dáni jarasymdy úılesim tapqan taǵamdardan dám tatqan sheteldik azamattardyń bizdiń elge qaıta kelgisi kelip turaryna senim mol. Bizdiń ulttyq asúı babalardan qalǵan asyl mura jáne ol istiń qııýyn tapsa, el qazynasyna orasan zor tabys ákeletin sala, – deıdi uıymdastyrýshylar.
