Aýdandaǵy jáne oblystaǵy jetekshi sharýashylyqtardyń biri «Turar» jaýapkershiligi shekteýli seriktestiginiń ujymymen kezdesti. «Turar» – egin jáne mal sharýashylyǵymen qatar aınalysatyn, aýdandaǵy eń iri salyq tóleıtin kásiporyn. Máselen, 2018 jyly qazynaǵa 118 mıllıon teńge quıdy.
Berdibek Saparbaev eńbek ujymymen emen-jarqyn áńgimede aýyldaǵy áleýmettik jaǵdaıdy, aýyz sýmen, otynmen qamtamasyz etý jáne medısınalyq kómektiń, jalaqynyń kólemi men berilý merzimi qandaı ekenin surady. Sharýashylyqta jyl boıy jumys bolady. Onyń ústine aýyl turǵyndary mal ustaıdy, óz otbasyn sútpen, etpen qamtamasyz etedi. «Turar» sharýashylyǵy jas mamandaryna arnap 15 keń, barlyq qolaılylyǵy eskerilgen úılerdiń qurylysyn jalǵastyryp otyr. Sharýashylyqtaǵy ortasha aılyq jalaqy 163 myń teńgeni quraıdy.
Vıse-premer Qostanaıdaǵy azyq-túliktiń baǵasyna kóńil bóldi. Ol oblys ortalyǵyndaǵy «Rauzet» sýpermarket dúkenine kirip, kúndelikti paıdalanylatyn negizgi azyq-túlik túrleriniń baǵasyn surady. О́ńirlik ıgilik qory qyzmetiniń sheńberinde 8 myń 700 tonna 14 túrli áleýmettik mańyzǵa ıe azyq-túlik úshin 1 mıllıard 281 mıllıon teńge bólindi. Nan baǵasy turaqty jáne naýbaıhanalardyń jumysy úzdiksiz júrýi úshin «Tobyl» áleýmettik-ónerkásiptik korporasııasy birinshi surypty 3191 tonna undy 300 mıllıon teńgege satyp aldy.
– Naýbaıhanalarǵa túsetin un irikteledi, ıgilik qorynan kelgen un 94 teńgeden alynady. Naýbaıhanadan áleýmettik nannyń bir bólkesi 80 teńgeden bosatylady, dúkenderde bul 83 teńgeden satylady, – dedi Aýyl sharýashylyǵy basqarmasynyń basshysy Jansultan Táýkenov.
Vıse-premer Berdibek Saparbaevtyń qatysýymen ótken Áleýmettik áriptestik, áleýmettik jáne eńbek qatynastaryn retteý jónindegi respýblıkalyq úsh jaqty komıssııanyń otyrysynda Prezıdent Joldaýyna oraı memlekettik áleýmettik eńbek saıasaty máseleleri sóz boldy. Onda aldymen oblys ákimi Arhımed Muhambetov óńirdegi eńbek qatynastary, ıaǵnı eńbek táýekelderi kartasy, jalaqy qaryzy týraly baıandady.
– Oblystaǵy salalyq kásipodaqtar 21 kelisimge qol qoıdy. Ujymdyq kelisimder iri jáne orta kásiporyndardyń 97 paıyzyn qamtıdy. Monıtorıng nátıjesi kórsetkendeı, oblystaǵy kásiporyndar men mekemelerde jalaqy qaryzy joq. Al óńirdegi bankrotqa ketken 2 kásiporynnyń 77 jumysshyǵa bereshegi 16 mıllıon teńgeni quraıdy, – dedi Arhımed Begejanuly.
Premer-Mınıstrdiń orynbasary Berdibek Saparbaev atalǵan komıssııanyń basty mindeti kásiporyndarda eńbek daýynyń órshýine jol bermeý, onyń aldyn alý bolyp tabylatynyn eskertti.
QOSTANAI
