Sol sebepti de elimizde 2019 jyldyń maýsym aıynda «Eurasian Expert Council» qoǵamdyq qory Aqparat jáne qoǵamdyq damý mınıstrliginiń qoldaýymen Azamattyq bastamalardy qoldaý ortalyǵynyń granttyq qarjylandyrýy arqyly Qorgau jobasyn júzege asyrýdy qolǵa aldy. Jobanyń basty maqsaty – ómirlik qıyn jaǵdaıǵa tap bolǵan jandardyń quqyqtyq bilim deńgeıin arttyrý jáne azamattardyń quqyǵyn qorǵaıtyn ulttyq júıe qurý.
– Bul – memleket tarapynan jasalǵan teńdessiz qadam. О́ıtkeni azamattardy zańdy turǵydan qorǵaý úshin aıtarlyqtaı mol qarjy bólinip otyr. Dálirek aıtqanda, óziniń jaýapsyz ókilderinen qorǵaý úshin. Búginde «Eurasian Expert Council» qoǵamdyq qory júzege asyryp otyrǵan Qorgau jobasy Qazaqstandaǵy eń iri quqyq qorǵaý jobasy sanalady. Jalpy, elimiz boıynsha Advokattar alqasynyń nemese Zańgerler palatasynyń músheleri sanatyndaǵy 210 zańger keńes beredi. Bul elordada, respýblıkalyq mańyzdaǵy qalalar men oblys ortalyqtarynda ǵana emes, sonymen qatar shalǵaıdaǵy eldi mekenderde de iske asyrylýda. Alǵash ret alys aýdan-aýyldardyń turǵyndary tegin qol jetkizip otyr. Bul úshin olar Qorgau ortalyǵy bar aýdan ortalyǵyna kelse bolǵany. Al eger mundaı múmkindikteri bolmasa, qajetti jerge zańgerlerimiz ózderi barady, – deıdi Qorgau jobasynyń menedjeri Shyńǵys Lepsibaev.
Iаǵnı, azamattar tek keńes alyp qoımaıdy. Qajet bolǵan jaǵdaıda olarǵa tolyq sıkldi zańgerlik qyzmetter usynylady. Máselen, aryzyn qabyldap, qajetti qujattaryn jınaqtaý, talap resimdeý, sotta múddesin qorǵaý isi júzege asyrylady, ıaǵnı ár is logıkalyq shegine deıin jetkiziledi.
– Joba júzege asyryla bastaǵannan beri Qazaqstannyń túkpir-túkpirindegi Qorgau ortalyqtarynyń zańgerleri ómirlik qıyn jaǵdaıǵa tap bolǵan 11 myńnan astam adamǵa tegin keńes berdi, 400 azamattyń quqyǵy sotta qorǵaldy, – dep málimdedi Qazaqstan halqy Assambleıasy tóraǵasynyń orynbasary, sondaı-aq Qorgau jobasynyń adam quqyǵyn qorǵaý salasyndaǵy keńesshisi Sherzod Pýlatov.
Onyń aıtýynsha, óz tájirıbesinde joba zańgerleri túrli jaǵdaıatqa tap bolyp jatady eken. Máselen, Qostanaı oblysyndaǵy Qorǵau ortalyǵyna onkologııalyq dertke shaldyqqan zeınetker jolyǵypty. Bankten alǵan nesıeniń shyrǵalańy kesirinen er azamat kók tıynsyz qalypty. Belgili bolǵandaı, ol 200 myń teńge kóleminde nesıe alǵan, al endi kún sanap ósken paıyzdarymen qosqanda 708 myń teńge qaryzdy qaıtara almaı júrgen. Másele munymen bitpeıdi. Notarıýstyń atqarýshy jazbasy boıynsha jeke sot oryndaýshysy onyń elden shyǵýyna shekteý qoıypty. Zeınetaqysynyń teń jartysyn qaryzyn óteý úshin ustap qalǵanda qarııanyń qolyna bar-joǵy 30 myń teńge tıedi eken. Onyń ústine, óziniń aıtýynsha, qyzy úıinen qýyp shyǵyp, barar jer, basar taýy qalmaǵandyqtan, ápkesiniń úıin panalap júr eken.
Qorǵau ortalyǵynyń zańgeri nesıe bergen JShS-men beıbit kelisim jasasty. Zeınetker fakti boıynsha 114 myń teńgeni tólep qutyldy. Endi qalǵan 56 myń teńgeni tólegennen keıin qaryzdy óteldi dep sanaý týraly kelisildi. Sonymen qatar nesıeger atqarýshy paraǵyn qaıtaryp aldy, elden tysqary shyǵýǵa qoıylǵan barlyq shekteý alynyp tastaldy, zeınetker zeınetaqysyn tolyq kólemde alatyn boldy. Al ony úıinen qýyp shyqqan qyzynan alıment óndirý týraly qujattar resimdeldi.
Taǵy bir mysal. Pavlodar qalasynyń turǵyny, múmkindigi shekteýli balany tárbıelep otyrǵan jalǵyzbasty ana múgedek balanyń kútimi úshin taǵaıyndalatyn zeınetaqyǵa qol jetkize almaı júr. Qorgau jobasynyń zańgerleri tólemaqyny resimdeý úshin qajetti qujattardy jınaqtaýǵa qolushyn sozdy.
Qorgau jobasynyń komandasy tegin zańgerlik kómek berýmen ǵana aınalyspaıdy. Olar Qazaqstan tarıhynda alǵash ret memlekettik qurylymdar (ásirese polısııa) men azamattyq qoǵam arasynda júıeli baılanys ornatýǵa úles qosýda. Bul ne úshin qajet? «Qazaqstannyń azamattyq alıansy» zańdy tulǵalar birlestiginiń (ZTB) vıse-prezıdenti, Qorgau jobasynyń Jastar resýrstyq ortalyqtarymen jumys boıynsha menedjeri Gamal Túzelbaevtyń oıynsha azamattardyń ishki ister qurylymdaryna senimin arttyrý jáne olardyń ımıdjin jetildirýge polısııa men azamattyq qoǵam arasyndaǵy tyǵyz qarym-qatynas arqyly ǵana qol jetkizýge bolady. Sol sebepti naq osy áriptestik qaǵıdaty negizinde quqyq qorǵaý qurylymdary men kommersııalyq emes uıymdar arasyndaǵy ózara árekettestik qarqynyn turaqty túrde qamtamasyz etý mańyzdy.
– Memleket pen azamattyq qoǵamnyń Qazaqstandy damytý baǵytyndaǵy maqsat-múddeleri ortaq ekenin uǵyný kerek jáne oǵan qol jetkizý úshin áriptestik qaǵıdaty negizinde jáne múddeler tepe-teńdigin saqtaý arqyly kúsh-jigerdi biriktirý qajet, – dep atap ótti Gamal Túzelbaev.
Qorgau jobasy sonymen qatar ÚEU-lardy memlekettik áleýmettik tapsyrys júıesi arqyly áleýmettik jobalardy júzege asyrýǵa tartýdy jáne azamattyq bastamalarǵa memlekettik qurylymdar men halyqaralyq uıymdar tarapynan qoldaýdy qamtamasyz etýdi iske asyrady. Sol sebepti Qorgau jobasy IIM-men memorandýmǵa qol qoıdy. Qujattyń basty mindeti – polısııa qyzmetkerleri, ýchaskelik ınspektorlar men azamattar arasyndaǵy alshaqtyqty azaıtý.
Árıne Qorgau jobasy ómirlik qıyn jaǵdaıǵa tap bolǵan azamattarǵa zańgerlik kómek kórsetýge baılanysty barlyq máseleni bir demde sheshýge qaýqarsyz. Mundaı aýyr mindetti moıynǵa júkteýdiń ózi ańǵaldyq bolar edi. Bul degenimiz – myńmen jalǵyz alysýǵa talpyný. Degenmen Qorgau jobasynyń qysqa ýaqytta qol jetkizgen jetistikteri osynaý paıdaly quqyq qorǵaý bastamasyna memleket tarapynan jetkilikti deńgeıde qoldaý kórsetilse, azamattardy quqyqtyq saýattandyrýǵa qatysty kóptegen másele jýyr arada kún tártibinen alynyp tastalýy múmkin ekenin kórsetkendeı.
