Týrızm • 26 Qarasha, 2019

Toǵyz óńirdiń týr operatorlary Býrabaıdyń áleýetimen tanysty

16 retkórsetildi

«Kazakh Tourism» ulttyq kompanııasy uıymdastyrǵan úshinshi respýblıkalyq aqparattyq týr óz máresine jetti.  Qarashanyń 22-24 aralyǵyndaǵy úsh kúndik týr aıasynda elimizdiń túkpir-túkpirinen kelgen 23 týr operator Shýchınsk-Býrabaı kýrorttyq aımaǵyn aralady. Almaty, Qyzylorda, Qaraǵandy, Taraz, Shymkent, Qostanaı, Petropavl, Semeı, О́skemen jáne Elordanyń ókilderi jergilikti týrónimdi pysyqtap, jańa usynystarmen tanysty. Bul týraly Mádenıet jáne sport mınıstrliginiń baspasóz qyzmeti habarlady. 

Aqparattyq týrdyń alǵashqy kúni Aqmola oblysy men Shýchınsk-Býrabaı kýrorttyq aımaǵynyń tanystyrylymy jáne b2b kezdesýler uıymdastyryldy. Nátıjesinde, óńirlerden kelgen týr operatorlar jergilikti týrıstik bıznes ókilderimen áriptestik jónindegi memorandýmdarǵa qol qoıdy.

Kýrorttyq aımaqpen tereńirek tanysý úshin týrǵa qatysýshylar birqatar týrıstik nysandarǵa at basyn burǵan edi. Olardyń ishinde, ashyq aspan astyndaǵy Botaı dáýiriniń turaǵy «Botaı Býrabaı» mýzeıi, Tas aýyly, Abylaı han alańdary bar.

Sondaı-aq ekskýrsııa barysynda týr operatorlar Bólektaýdyń basyna shyǵyp, soqpaq jolmen júrdi. Budan keıin, maral ósiretin sharýashylyq men pantokrın negizinde medısınalyq em- dom jasaıtyn sanatorııdiń jumysymen tanysyp, «Burabayland» otbasylyq demalys saıabaǵyndaǵy jeke rezıdensııasy bar Aıaz atamen kezdesti.  

Aqparattyq týrdyń ekinshi kúni týr operatorlar toby Oqjetpes baýraıyndaǵy shıpajaı jáne Býrabaı, Bolshoe Chebache kólderi jaǵasyndaǵy demalys oryndaryna at basyn burdy. Týr operatorlar kún uzaq ár qonaqúıdiń usynar as máziri, oıyn-saýyq baǵdarlamasy men baǵasyn baǵamdady. Budan bólek, byltyr qoldanysqa berilgen taý-shańǵy tramplınin tamashalady. Osylaısha, aqparattyq týrdyń ekinshi kúninde týr operatorlar qol jetimdi baǵadaǵy jáne lıýks sanatyna enetin qonaqúılerdiń tizimin jasaqtady.    

Baǵdarlamanyń  úshinshi kúni aqparattyq týrǵa qatysýshylar Zerendi aýdanynyń týrıstik áleýetine zer saldy. Qaraǵaıly ormannyń saıasyndaǵy nysandardyń deni otbasylyq demalysty uıymdastyrýǵa laıyqtalǵan. Sondaı-aq mektep demalysy kezinde oqýshylardy qabyldaýǵa arnalǵan nysandar da qarastyrylǵan. Aıta keterligi, mundaǵy burynǵy demalys nysandaryn abattandyryp, jańǵyrtýǵa, sonymen qatar, jańa úlgidegi qonaqúılerdi salýǵa memlekettik qoldaý sep bolyp otyr.

Qostanaılyq týr operatory Almagúl Eseneevanyń pikirinshe, Zerendidegi týrızmdi damytýǵa jergilikti kásipkerlerdiń den qoıǵany tántti etedi. «Týǵan ólkesin jan-tánimen súıetin, ári syrttan kelýshi meımandardy jyly qarsy alatyn janashyr azamattardy kórgende, bul óńirdegi týrızmniń mindetti túrde damıtynyna kózim jetti. Demek, aldaǵy ýaqytta turǵyndardy esh alańsyz osy jerlerge jiberýge bolady. Ishki týrısterdi ǵana emes, sheteldik týrısterdi de Býrabaıǵa shaqyratyn bolamyz,» - deıdi qostanaılyq týr operator.

Osylaısha, Býrabaıdyń týrıstik áleýetimen tanys bolǵan aqparattyq týr qatysýshylary ishki naryqta jańa ónimderdi usynýǵa bolatynyna taǵy kóz jetkizdi. Úsh kúnge sozylǵan týr baǵdarlamasynyń tyǵyzdyǵyna qaramastan, aımaqtyq týr operatorlar qajet aqparatpen almasyp, ózara baılanys ornata aldy.

Elordalyq týr operator Meıramgúl Jalǵasqyzynyń aıtýynsha, mundaı aqparattyq týrlardyń tıgizer paıdasy mol. «Qazaqstannyń túkpir-túkpirin aralap, ishki týrızmdegi usynystardy baǵamdaýǵa týr operatorlardyń ózdiginen shamasy kelmes edi. Elimizdiń týr bıznes qaýymdastyǵynyń talap-tilegin jerge qaldyrmaı, osyndaı sharapaty mol sharanyń uıymdastyrǵan «Kazakh Tourism» ulttyq kompanııasy jáne QR Týrızm ındýstrııasy komıtetine alǵysymyz zor», - deıdi Meıramgúl Jalǵasqyzy.

Atap óterligi, Býrabaı kýrorttyq aımaǵy  týrıstik kartanyń TOP-10 basym baǵytynyń tizimine ense, Zerendi aýdany TOP-50 qatarynda. Býrabaıdaǵy týrızm tórt negizgi aımaqta, atap aıtqanda sanatorııalyq-kýrorttyq aımaq, astana mańyndaǵy demalys aımaǵy, kıeli jerler men qoryq aımaǵy, jáne tabıǵı aımaqta júzege aspaq.

 «Býrabaı kýrortynyń tartymdylyǵyn arttyryp, jyl on eki aı boıy jumysyn qamtamasyz etý maqsatynda kásipkerlerdi iske tarta otyryp, «Four seasons», ıaǵnı, jyldyń tórt birdeı mezgilindegi jumys tujyrymdamasyn ázirledik»,  - deıdi jergilikti týrıstik aqparattyq ortalyq jetekshisi,  Erlan Mýsıpov. Bıyldyń ózinde oblys aýmaǵynda 52 shara uıymdastyrylǵan.

Esterińizge sala ketsek, otandyq týr operatorlarǵa arnalǵan aqparattyq týr QR Mádenıet jáne sport mınıstrliginiń qoldaýymen úshinshi márte uıymdastyryldy. Jyl sońyna deıin taǵy bir týrdy uıymdastyrý josparda bar.  

Sońǵy jańalyqtar

Almatyda Abaı klýby ashyldy

Rýhanııat • Keshe

Dımash Qudaıbergen tyńdarmandaryna alǵys aıtty

Rýhanııat • 14 Jeltoqsan, 2019

Ǵalymdar: Adam qysta az jumys isteýi kerek

Qoǵam • 14 Jeltoqsan, 2019

Neımar «Barselonany» taǵy da sotqa berdi

Fýtbol • 14 Jeltoqsan, 2019

Atyraý oblysy Táýelsizdik kúnin atap ótti

Aımaqtar • 14 Jeltoqsan, 2019

Mańǵystaýda «Jyl adamy - 2019» anyqtaldy

Aımaqtar • 14 Jeltoqsan, 2019

Aqtaýda turǵyn úı paıdalanýǵa berildi

Aımaqtar • 14 Jeltoqsan, 2019

Almatylyqtarǵa memlekettik marapat tapsyryldy

Aımaqtar • 14 Jeltoqsan, 2019

Atyraýlyqtar taǵy da úzdikter qatarynda

Aımaqtar • 13 Jeltoqsan, 2019

Uqsas jańalyqtar