Naqtyraq aıtqanda, kórme sórelerin Temirtaý qalasyndaǵy Tuńǵysh Prezıdenttiń tarıhı-mádenı ortalyǵynan alynǵan eksponattar tolyqtyrǵan. Olardyń arasynda Nursultan Nazarbaevqa qatysty túrli kezeńderdegi fotosýretter men qujattar, sondaı-aq Elbasyna ózge memleketter basshylary tabys etken estelik syılyqtar bar. Mysaly kórme qonaqtary bul jerden Rım Papasy Ioann Pavel II-niń syılyǵyn, 2010 jyly Reseı prezıdenti Dmıtrıı Medvedev syıǵa tartqan kúmis medaldi kórýge bolady.
Sonymen qatar, kórme sóresinen Qazaqstanǵa sapary kezinde Belarýs prezıdenti Aleksandr Lýkashenko syılaǵan aspaly tárelke de oryn alǵan. Sheti oıý-órnekpen kómkerilgen, ortasynda shaǵyn bederli sheńberi bar bul kádesyı Qazaqstan men Belarýs halyqtarynyń dostyǵy men ózara túsinistigin beıneleıdi.
Sondaı-aq kelýshiler nazaryna 2011 jyly Elbasyna Qyrǵyz Respýblıkasynyń delegasııasy tabys etken arqar múıizinen jasalǵan kádesyı kompozısııasy da usynylǵan. Bul qolóner týyndysynda baýyrlas túrki halyqtarynyń týysqandyǵy asqan sheberlikpen keskindelgen.
Jádigerlerdiń arasynan «Qazaqstan» kádesyı kompozısııasyna da oryn tıipti. Mundaǵy «Naızaly salt atty» týyndysyn «Atrıým» ortalyǵy syıǵa tartqan.
Qaraǵandy oblystyq tarıhı-ólketaný murajaıy men Temirtaý qalasyndaǵy Tuńǵysh Prezıdenttiń tarıhı-mádenı ortalyǵy arasyndaǵy yntymaqtastyq aıasynda uıymdastyrylǵan kórmeniń esigi 10 jeltoqsanǵa deıin kelýshilerge ashyq bolady.
Qaırat ÁBILDA,
«Egemen Qazaqstan»
Qaraǵandy oblysy
