Qoǵam • 26 Qarasha, 2019

2020 jyly qandaı sanattaǵy qyzmetkerlerdiń jalaqysy ósedi?

2406 retkórsetildi

Úkimet otyrysynyń qorytyndysy boıynsha eńbek qatynastaryn retteý sharalaryn jetildirý týraly ótken baspasóz konferensııasynda Eńbek jáne halyqty áleýmettik qorǵaý mınıstri Birjan Nurymbetov jalaqysy az jumyskerlerdiń jalaqysyn arttyrý boıynsha atqarylyp jatqan jumystar týraly aıtyp berdi. Bul týraly Úkimettiń baspasóz qyzmeti habarlady.  

Búgingi tańda eńbek qatynastary máselesi óte mańyzdy ári ózekti máselelerdiń biri. Jalpy, Úkimettiń, Eńbek jáne halyqty áleýmettik qorǵaý mınıstrliginiń nazaryndaǵy negizgi jumystar halyqtyń jalpy tabysyn arttyrýǵa baǵyttalǵan, onyń ishinde jumys istep júrgen azamattardyń eńbekaqysyn arttyrý da bar.

«Tómen jalaqy alatyndardyń máselesine kelsek, bizde eńbek zańnamasynda tek tómen jalaqy mólsheri rettelgen, basqasynyń bári jumys berýshiniń quzyrynda. Sondyqtan QR Tuńǵysh Prezıdenti – Elbasy N. Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýyna sáıkes, jyl basynan beri Qazaqstandaǵy eń tómengi jalaqy mólsheri 1,5 esege – 28 000 teńgeden 42 500 teńgege deıin artty. Oǵan qosa, 25 AEK deıin, ıaǵnı 63 000 teńgege deıingi kólemde eńbekaqy alyp júrgen azamattardyń salyq júktemesi 10 ese azaıtylýda», — dedi eńbek jáne halyqty áleýmettik qorǵaý mınıstri. 

Bıylǵy 1 maýsymnan bastap bıýdjet salasynda jumys isteıtin qyzmetkerlerdiń jalaqysy 30%-ǵa artty. Al jekemenshik kásiporyndar boıynsha, Elbasynyń áleýmettik jaýapkershilik sheńberinde jumys berýshilerdi tómen jalaqy alatyn jumyskerleriniń jalaqysyn kóterýge úndeýiniń negizinde bul jumystar kásipodaqtarmen birge júrgizilip jatyr. 

«Jyl basynan beri elimizde 2,7 myń kásiporyn az jalaqy alyp júrgen 1,2 mln jumyskeriniń jalaqysyn orta eseppen 32,5%-ǵa kóbeıtti. Bul áli de jetkiliksiz - bizdiń elimizdegi kásiporyndar sanynyń jartysynan sál ǵana joǵary. Sondyqtan, kásiporyndardyń basshylaryn osyǵan atsalysýǵa shaqyramyz. Azamattardyń tabysy ósken saıyn el turǵyndarynyń ál-aýqaty da arta túspek», — dedi mınıstr.

Bul rette, 2020 jyldan memleket tarapynan bıýdjettik salaǵa qatysty birqatar sharalar qolǵa alynady. Atap aıtqanda, kelesi jyldyń 1 qańtarynan bastap muǵalimderdiń jalaqysy 25%-ǵa, mádenıet salasyndaǵy qyzmetkerlerniń eńbekaqysy 35%-ǵa, keıbiriniń jalaqysy 50%-ǵa deıin, áleýmettik sala qyzmetkerleriniń eńbekaqysy 30-60%-ǵa deıin kóbeıedi.

Condaı-aq mınıstr qazaqstandyq jáne sheteldik jumyskerlerdiń jalaqylarynyń sáıkessizdigine jol bergen jumys berýshilerge qatysty máselege toqtalyp ótti. Bıyl tamyz aıynan beri QR Bas prokýratýrasynyń qoldaýymen eńbek ınspeksııasy 30-dan astam sheteldik mamandar jumys isteıtin 95 kásiporynda tekserý jumystaryn júrgizgen. Sonyń nátıjesinde, atalǵan kásiporyndarda eńbek jáne kóshi-qon zańnamasyn buzý boıynsha 930 fakti anyqtalyp, joıyldy. 25 kásiporynda jalaqy jáne eńbek sharttarynyń sáıkessizdigi boıynsha 474 fakti anyqtaldy. Zańnamaǵa sáıkes atalǵan kásiporyndardyń basshylaryna qatysty sharalar qabyldandy, uıǵarymdar jasaldy, 2 mln teńgege aıyppul salyndy. Qazaqstanda jumys isteýge berilgen 681 ruqsat qaǵazy qaıtaryp alyndy, 393 sheteldik jumysker elden shyǵaryldy.

«Memlekettik eńbek ınspeksııasy men prokýratýra jergilikti jáne sheteldik qyzmetkerlerdiń eńbekaqysynyń teń bolýyn qamtamasyz etýdi talap etýde. Kompanııalardyń kóbi qazaqstandyqtardyń jalaqysyn ósirip jatyr, degenmen, sheteldikterdiń jalaqysyn tómendetý faktileri de bar. Iаǵnı, bul jumys berýshiniń sheshimine baılanysty. Bastysy, ol talaptardy oryndaýy tıis – birdeı laýazymdarda, birdeı atqarylatyn jumysta jáne biliktiligi teń jaǵdaıda eńbekaqy mólsheri birdeı bolýy kerek», — dedi B. Nurymbetov. 

Sońǵy jańalyqtar

Táýelsizdik – tuǵyrym

Aımaqtar • Keshe

Jas otbasylar baspanaly boldy

Aımaqtar • Keshe

Kúlki kerýeni № 25

Rýhanııat • Keshe

Uqsas jańalyqtar