Qazaqstanda 800-den astam jıhaz kásiporyndary jumys isteıdi

Qazaqstan • 26 Qarasha, 2019

Qazaqstanda 800-den astam jıhaz kásiporny jumys isteıdi

О́tken 10 jylda jıhaz salasyndaǵy óndiris kólemi 2 ese ósti (19,3 mlrd teńgeden 38,6 mlrd teńgege deıin), al negizgi kapıtalǵa salynǵan ınvestısııalar 3 ese ósti (571,5 mln teńgeden 1 710,2 mln teńgege deıin). Bul týraly búgin otandyq jıhaz óndirýshilerdiń sezi barysynda IIDM Indýstrııalyq damý jáne ónerkásiptik qaýipsizdik komıtetiniń tóraǵasy Qanat Baıtov málimdedi.

Egemen Qazaqstan

Bıyl Qazaqstan Respýblıkasy jıhaz jáne aǵash óńdeý óndiris kásiporyndarynyń qaýymdastyǵy óziniń jıyrma jyldyq mereıtoıyn atap ótýde. Jıhaz jáne aǵash óńdeý ónerkásibi halyqtyń birinshi kezektegi qajettilikterin qanaǵattandyrýǵa baǵyttalǵan mańyzdy sala bolyp tabylady. Búginde qazaqstandyq naryqta osy baǵytta 800-den astam óndiris oshaǵy jumys isteıdi. Sońǵy 6 jylda jumys istep turǵan kásiporyndar sany 1,6 ese artty.

Jıhaz jasaý baǵytyndaǵy óndiris oshaqtarynyń basym bóligi Almaty qalasy men Almaty oblysynda ornalasqan, onyń kórsetkishi 42,6 % quraıdy. Sondaı-aq barshamyz kúndelikti ómirde tutynatyn jıhazdardyń edáýir bóligi Pavlodar oblysynda - 8,6%, Nur-Sultan qalasy jáne Aqmola oblysynda - 12,3%, Qaraǵandy oblysynda - 6,8%, Shyǵys Qazaqstan oblysynda - 6,1 %, Shymkent qalasy jáne Túrkistan oblysynda - 8,2% óndiriledi. Otandyq jıhaz óndirisiniń kásiporyndary sapa menedjmenti jáne ekologııalyq menedjment júıesine saı, zamanaýı dızaın sertıfıkattarymen rastalǵan ónim shyǵarady.

Qazirgi ýaqytta Indýstrııalyq damý jáne ónerkásiptik qaýipsizdik komıteti 2019 jylǵy 5 naýryzdaǵy Qazaqstan Respýblıkasy Úkimetiniń otyrysynda maquldanǵan, 2019 – 2021 jyldarǵa arnalǵan jıhaz ónerkásibin damytý jónindegi jol kartasyn iske asyrýda, onyń sheńberinde memlekettik qoldaý men ekonomıkalyq yntalandyrýdyń birqatar júıeli sharalary kózdelgen, olardyń bir bóligi qazirdiń ózinde júzege asty.

Jol kartasynyń negizgi baǵyttaryna toqtalsaq: jumys istep turǵan óndiristerdi shıkizatpen qamtamasyz etý, taýarlardyń zańsyz aınalymyna qarsy kúres júrgizý, Memlekettik satyp alý salasyndaǵy sharalar jáne qazaqstandyq qamtý úlesin arttyrý, tehnıkalyq retteý jáne ekonomıkalyq yntalandyrý sharalary, salany bilikti kadr resýrstarymen qamtamasyz etý, otandyq taýar óndirýshilerdiń ónimderin ishki naryqta damytý, jumys istep turǵan óndiristerdi keńeıtý jáne jańa óndiristerdi iske asyrý, ınvestısııalyq jobalardy jolǵa qoıý bolyp tabylady.

Jol kartasyn iske asyrý aıasynda jıhaz ónerkásibi taýarlaryn memlekettik satyp alýda jergilikti qamtý boıynsha nysanaly ındıkatorlar ornatyldy.

Sonymen qatar jıhaz ónerkásibiniń taýarlary 2019 jylǵy 1 shildeden bastap memlekettik satyp alýlar aldyn ala biliktilik suryptaýmen baıqaý tásilimen ótkiziletin taýarlar, jumystar men qyzmetter tizbesine engizilgen.

Memlekettik satyp alýda aldyn ala biliktilik irikteýinen ótý kezinde Indýstrııalyq sertıfıkat berý boıynsha talap engizildi.

Otyrýǵa arnalǵan jıhaz jáne ózge de jıhaz túrleri shartty shyǵarýǵa jol berilmeıtin taýarlar tizbesine engizilgen, sol arqyly sertıfıkattalmaǵan jıhaz ónimderin ákelýge tosqaýyl qoıyldy.