Ákimniń aıtýynsha, Almatyda kólik, kommýnaldyq qyzmetter, qaýipsizdik, halyq densaýlyǵy, qyzmet kórsetý salasynda aqyldy tehnologııalar qoldanylatyn bolady.
«Qalamyzdyń ǵylymı áleýeti óte joǵary. Munda Ǵylymı zertteý, tájirıbelik konstrýktorlyq jumystardyń 35%-y shoǵyrlanǵan. Almaty mádenı kreatıvti qala retinde bilim ekonomıkasynyń ortalyǵy bolýy tıis. Biz jaqynda Kreatıvti ındýstrııa parkin salýdy bastaımyz. Bul parkte jer týraly ǵylym, opto jáne mıkroelektronıka, bıotehnologııa, joǵary energııalar fızıkasy, medısına salasyndaǵy jańa ǵylymı jumystar jasalatyn bolady», - dedi ákim.
Sonymen qatar, qala basshysy megapolıs úshin áleýmettik ekonomıka da úlken draıver bolatynyn jetkizdi. «Birinshi kezekte másele bilim jáne densaýlyq saqtaý salasynda bolyp otyr. Bul salaǵa aýqymdy qarajat bólinetin bolady. Qala turǵyndarynyń ómir súrý sapasyn jaqsartý úshin kem degende 19 mektep, 400 balabaqsha, 30 medısınalyq mekeme ashý kerek. Osy salalarǵa bıznestiń qyzyǵýshylyǵy bar dep oılaımyn. Balabaqsha men mektepterdiń salynýyna barynsha kúsh salatyn bolamyz», - dedi ákim. Aıta ketý kerek, búgin Almatyda ınvestısııalyq forým bastaldy.
Forým sessııalarynda belgili saıasatkerler, ekonomıster, qarjygerler, álemdik startap jobalardyń avtorlary óz tájirıbelerimen bólisip jatyr.
ALMATY
