Inklıýzıvti bilim berý kabıneti ashyldy

Úkimet • 28 Qarasha, 2019

Inklıýzıvti bilim berý kabıneti ashyldy

Premer-Mınıstrdiń orynbasary Berdibek Saparbaev pen elorda ákimi Altaı Kólginov №88 jańa mektep-lıseıine bardy. Oqý orny 1200 orynǵa eseptelgen. Bul №75, №84 jáne №85 mektepterdiń shamadan tys júktemesin jeńildetýge múmkindik beredi. Jańa mekteptiń jumysymen tanysý barysynda «Ár bala mektepke laıyqty» jobasynyń iske asyrylýy tanystyryldy. Mektep-lıseıde erekshe qajettilikteri bar balalardy qoldaý maqsatynda ınklıýzıvti kabınet ashyldy.

Egemen Qazaqstan

«Oqýshylar jalpy toptarda qurdastarymen teń dárejede bilim alady. Kún saıyn balaǵa qajetti jeke kómek kórsetiledi», dedi «Bolashaq» korporatıvtik qory keńesiniń tóraıymy Dınara Shaıjúnisova.

№88 mektep-lıseıiniń ınklıýzıvti kabıneti «Shevron» kompanııasynyń demeýshilik qarajaty esebinen qarjylandyryldy. Bul atalǵan qordyń «Ár bala mektepke laıyqty» jobasy aıasyndaǵy altynshy kabıneti.

«Shevron» kompanııasynyń Qazaqstanmen seriktestigine 26 jyl tolyp otyr. Iаǵnı kompanııanyń elimizde jumys isteı bastaǵan kúnderinen beri, – dedi kompanııa ókili Janar Qoshpanova – elimizdiń medısınalyq mekemelerin qoldaýǵa, halyqaralyq standarttardy engizýge, jergilikti mamandardy úzdik halyqaralyq tájirıbelermen tanystyrýǵa qoldaý kórsetildi. Bul – eldiń áleýmettik-ekonomıkalyq damýyna qosyp jatqan úlesimiz».

Premer-Mınıstrdiń orynbasary Berdibek Saparbaev áleýmettik jobalardy iske asyrýda, atap aıtqanda, erekshe qajettilikteri bar balalardy qoldaýǵa baǵyttalǵan memlekettiń, qoǵamdyq uıymdar men sheteldik kásiporyndardyń ózara tyǵyz baılanysynyń mańyzdylyǵyn atap ótti.

Elorda ákimi Altaı Kólginov oqýshylarmen kezdesý barysynda jańadan ashylǵan mekteptiń alǵashqy oqýshylaryna «Sizder oqıtyn mektep jetekshi mektepterdiń biri. Bilim alý úshin eńbek etińizder, al biz óz tarapymyzdan barlyq jaǵdaıdy jasaımyz, «Shevron» kompanııasyna qoldaý kórsetkeni úshin alǵys bildiremin», – dedi. Sondaı-aq qala ákimi ınklıýzıvti kabınetterdiń qalanyń basqa mektepterinde de ashylatynyn jetkizdi.

Ata-analar da alǵysyn bildirip, atalǵan ınklıýzıvti kabınetterdiń mańyzdylyǵyn atap ótti. Sondaı-aq №88 mektep-lıseıinde gıdroponıka kabıneti ashyldy. Tehnologııa kómegimen mektep oqýshylary ózderi ósimdik ósire alady. Sonymen qatar oqýshylar fızıka men hımııa pánderi boıynsha tájirıbe jasaı alatyn zerthana kabıneti ashyldy.

Muǵalimdermen áńgime barysynda vıse-premer Elbasy men Prezıdenttiń tapsyrmasy boıynsha pedagogtardyń mártebesin arttyrýda naqty sharalar qabyldanǵanyn aıtty.

«Memleket bilim berý salasyn damytýǵa jáne balalardy qoldaýǵa erekshe kóńil bóledi. Búkil el boıynsha jańa zamanaýı mektepter salynyp jatyr, muǵalimderdiń jalaqysy artyp, jumys jaǵdaıy jaqsarýda. Urpaqtyń bilimdi, saýatty jáne tárbıeli bolyp ósýi úshin barynsha kúsh salýymyz kerek», – dedi Berdibek Saparbaev.