Oblys ákimi, partııa fılıalynyń tóraǵasy О́mirzaq Shókeev júrgizip otyrǵan aktıv otyrysynda Elbasy, partııa Tóraǵasy N.Nazarbaevtyń óńirlik partııa fılıaldary ókilderimen kezdesý barysynda júktegen mindetterdi oryndaý jáne jańa bastamalardy júzege asyrý máseleleri talqylandy. О́ńirde atqarylǵan jumystar jóninde baıandaǵan partııa fılıaly tóraǵasynyń birinshi orynbasary Beısenbaı Tájibaev saıası uıymnyń kadrlyq rezervine úmitkerlerdi irikteý pılottyq jobasy boıynsha Túlkibas aýdany respýblıkada aldyńǵy qatardan kóringenin atap ótti. Bul jobany barlyq aýdan, qalalarda ótkizý josparlanyp otyr. Osylaısha qarapaıym eldiń arasynan memleketke shynaıy janashyr, otanshyl, belsendi azamattar partııa qataryna qosylyp, máslıhattarǵa usynylmaq.
Aktıv otyrysyn qorytyndylaǵan О́mirzaq Shókeev Elbasy, «Nur Otan» partııasynyń Tóraǵasy Nursultan Nazarbaevtyń tapsyrmalary boıynsha jumys kúsheıetinin málimdedi. «Partııalyq praımerızdi túsindirý jáne daıyndyq jumystary boıynsha semınarlar ótkizilsin. Naqty jergilikti máselelerdi esepke ala otyryp, saılaýaldy baǵdarlamanyń jobasy ázirlenýi tıis. Partııa fılıaly partııalyq kadrlyq rezerv quramyn jańa talaptarǵa saı jasaqtap, 2020 jyldyń 10 qańtaryna deıin usynsyn. Jańa tizimde áıelderdiń úlesi 30 paıyzdan, 35 jasqa deıingi jastardyń úlesi 20 paıyzdan kem bolmaýy tıis. Sonymen qatar qoǵamnyń belsendi ókilderi de rezervke alynsyn. Partııanyń jemqorlyqqa qarsy qoǵamdyq keńesteri, baqylaý komıısııalary jumysty shıratsyn», dedi oblys ákimi. Sondaı-aq jıynda Tuńǵysh Prezıdent merekesine oraı, bir top azamatqa el Prezıdenti Qasym-Jomart Toqaevtyń alǵys haty tabys etildi.
