Parlament • 29 Qarasha, 2019

Qoqys ekologııalyq problemaǵa aınaldy

7 retkórsetildi

Keshe Parlament Senatynda osy palatanyń Agrarlyq máseleler, tabıǵatty paıdalaný jáne aýyldyq aýmaqtardy damytý komıteti uıymdastyrǵan «Turmystyq jáne ónerkásiptik qaldyqtardy jınaý jáne óńdeý» máselelerine arnalǵan Úkimet saǵaty ótti.

Otyrysqa Senat Tóraǵasy Darıǵa Nazarbaeva, Senat depýtattary, mem­lekettik organdardyń basshylary, Qara­ǵandy oblysynyń ákimi jáne basqa oblys ákimderiniń, Nur-Sultan, Almaty jáne Shymkent qalalary ákimderiniń orynbasarlary, sondaı-aq osy saladaǵy halyqaralyq jáne úkimettik emes uıym­dardyń basshylary men ókilderi, sarapshylar men mamandar qatysty.

Elimizdiń Ekologııa, geologııa jáne tabıǵı resýrstar mınıstri Maǵzum Myrzaǵalıev baıandama jasady. Ol Qazaqstannyń «jasyl» ekonomı­kaǵa kóshýi jónindegi tujyrymdama­sy aıasynda 2030 jylǵa qaraı eldegi qaldyqtardy óńdeý úlesi 40 paıyz­ǵa, 2050 jylǵa qaraı 50 paıyzǵa deıin jetýi tıis ekeni týraly senatorlardy habardar etti. Ol sondaı-aq elektr energııasyn alý maqsatynda qaldyqtardy órteýdi jáne odan ári jańartylatyn energııa kózderimen birdeı elektr jelilerine berýdi kózdeıtin «Waste to Energy» jobasyn júzege asyrý týraly aıtty. «Bul joba qaldyqtardy po­lı­gondarda kómý kólemin eselep qys­­qar­týǵa ǵana emes, sondaı-aq osy baǵyt­­qa ınvestısııa tartýǵa múmkindik beredi», dedi mınıstr.

Senat Tóraǵasy Darıǵa Nazarbaeva óz sózinde turmystyq jáne ónerkásip qaldyqtaryn jınaý, kádege jaratý jáne qaıta óńdeý problemasyn sheshýde júıeli tásil qajettigine nazar aýdardy.

Senat basshysy ekologııalyq problemalardy sheshý úshin qatty turmys­tyq qaldyqtardy qaıta óńdeý jáne kádege jaratý jónindegi memlekettik baǵdarlama ázirleý qajet dep esepteıdi. «Búginde mınıstrlik jańa ekologııalyq kodeks boıynsha jumystardy júzege asyrýda. Memlekettik baǵdarlamasyz, baǵyt-baǵdarsyz biz erteń Ekologııa­lyq kodeksti qalaı qabyldaıtynymyz maǵan belgisiz bolyp otyr. Bizde qazirdiń ózinde tujyrymdama bar, ol 2013 jylǵy deńgeıde qalǵan, alty jyl ótse de ári qaraı qozǵalys joq. Osynyń bárin Sizden qatań suraıtyn bolamyz, óıtkeni bul máselelerdi odan ári keıinge qaldyrýǵa bolmaıdy», dedi Senat basshysy mınıstrge. 

Senat Tóraǵasy bul rette polıgondarda azyq-túlik jáne qurylys qaldyqtaryn kómýge tyıym salýǵa asyqpaý kerek dep sanaıdy. Salalyq mınıstrliktiń derekteri boıynsha, mundaı tyıym 2020 jyldan bastap engiziledi. «Al ony qaıda jiberetinimizdi bilgimiz keledi. Úkimet nemese zańdar qandaı da bir balama bolýy úshin ne usyna alady? Bul másele ázirge tolyq pysyqtalmaǵan dep sanaımyn, sondyq­tan oǵan tyıym salýǵa bolmaıdy. О́ıt­keni erteń adamdar jumys istep jatqan polı­gondardy jazalaý bastalady. Bul mán-maǵynasyz másele bolady», dedi Darıǵa Nazarbaeva.

D.Nazarbaeva Qazaqstan aýmaǵyndaǵy radıoaktıvti qaldyqtar máselelerine jeke toqtaldy. Ol zalaldy qaldyqtar azamattardyń densaýlyǵyna zııan kel­tirip jatqan kezde medısınalyq shyǵyndardyń mánisi joqtyǵyn atap ótti: «Turmystyq qaldyqtardan bas­qa, bizde 170 mıllıon tekshe metr ra­dıoak­tıvti qaldyqtar jınaqtalyp qal­ǵan. Ol jaı ǵana topyraq pen atmosferany lastap qana qoımaıdy, barshaǵa ólim qaýpin tóndiredi».

Salalyq komıtet tóraǵasy Álı Bektaev Úkimet saǵaty barysynda elimizde qaldyqtardy basqarý jónindegi, onyń ishine ónerkásiptik jáne turmystyq qaldyqtar boıynsha monıtorıng, qaıta óńdeý jáne kádege jaratý enetin júıe joq ekenin atap ótti. Bul eldiń ornyqty damýyna kedergi keltiredi.

Sharaǵa qatysýshylar aldynda óner­kásip jáne óndiris qaldyqtarymen jumys isteý jónindegi qaýymdastyqtyń tóraǵasy Aleksandr Rıabının, Qaraǵan­dy qalasyndaǵy «Gorkomtrans» serik­tes­tiginiń dırektory Vıktor Ivanov, Qostanaı oblysyndaǵy Lısakov qalasy­nyń qatty turmystyq qaldyqtar polı­gon­yn paıdalanýshy «ILIN» kompa­nııa­­synyń dırektory Inna Aman, «Operator ROP» seriktestiginiń bas dırektory Medet Qumarǵalıev sóz sóıledi.

Senat depýtattary Úkimet saǵatynyń qorytyndysy boıynsha Úkimetke jiberiletin usynymdardy ázirledi.

Sońǵy jańalyqtar

Táýelsizdik – tuǵyrym

Aımaqtar • Keshe

Jas otbasylar baspanaly boldy

Aımaqtar • Keshe

Kúlki kerýeni № 25

Rýhanııat • Keshe

Uqsas jańalyqtar