Ekonomıka • 29 Qarasha, 2019

Kómirdi alypsatarsyz alady

8 retkórsetildi

О́skemenniń irgesindegi 60 myńnan astam halqy bar Glýbokoe aýdanynyń turǵyndary endi kómir alý úshin oblys ortalyǵyna sabylmaıtyn, sarsylyp kezekke turmaıtyn boldy. О́ıtkeni aýdan ortalyǵy – Glýbokoe kentinde qyrkúıek aıynan bastap kómir satý bazasy ashylyp, jumys istep jatyr.

Erekshe atap óterligi, turǵyndarǵa asa qajet kómir bazasyn jeke kásipker Vıktor Leontev óz qarajatyna salypty. 70 mıllıon teńgeden astam qarjysyn jumsap, 250 metrge jýyq jerge temirjol tarttyrypty. «Budan bólek munda ortalyqtandyrylǵan sý júıesin tartyp, elektr jelilerin ornattyq. Oblys ákimdigi tarapynan bólingen 3 mıllıon teńgeniń grantyna sıfrlandyrylǵan elektrondy tarazy qoıdyq. Kómir bazasynyń ashylǵanyna buǵan deıin О́skemennen kómirdi qymbat baǵaǵa alyp kelgen jergilikti halyq erekshe qýanyp jatyr. Árıne, kómirdiń bir tonnasyn 18 myń teńgege alǵan jaqsy ma, 12 myń teńgege alǵan tıimdi me? Qazir kómirdiń kommersııalyq baǵasy 9800 teńge bolsa (áleýmettik baǵa – 9200), biz jetkizgenimiz úshin 2500 teńge ǵana qosamyz. Turǵyndar ózderi de kelip, tıep alyp ketedi.  Múgedek jandarǵa, kóp balaly analarǵa tegin jetkizip beremiz. Tehnıkanyń barlyǵy ózimizdiki. О́zimiz tıeımiz, ózimiz túsiremiz. Kórip tursyzdar, eshqandaı da alypsatar, eshqandaı da kezek joq» degen kásipker kómir bazasyn salýǵa úsh jyldaı ýaqyt ketkenin jetkizdi.

Jaqynda gazetimizde osy aýdannyń Pred­gornoe aýylynda salynǵan fýtbol alańy jaıynda jazǵan edik. Aýylǵa barǵanymyzda alańnyń keńdigin ári óte sapaly salynǵanyn kórgenimiz ras. Sóıtsek bul alańdy da Vıktor Leontev salǵan eken. «Sapaly jasamaýǵa meniń qaqym joq. О́ıtkeni osy jerde turamyn. Mundaı alańdar aýdannyń birneshe aýylynda salyndy. 200 sharshy metrden 600-ge deıin barady. Bizdiń aýyldaǵy alań kelisimshart boıynsha 1200 sharshy metr bolý kerek edi, 350 sharshy metrdi ózim qostym» degen ol qazir jerlesteriniń suraýy boıynsha Beloýsovka aýylynda bir ýaqytta 35 adamdy qabyldaıtyn qoǵamdyq monsha salyp jatqanyn aıtty.

 

Shyǵys Qazaqstan oblysy,

Glýbokoe aýdany

Sońǵy jańalyqtar

Jazyǵy joq kóktemniń

Ádebıet • Keshe

Uqsas jańalyqtar