Oblystyq Kásipkerlik jáne ındýstrııalyq-ınnovasııalyq damý basqarmasynyń basshysy Aıqyn Eleýsizov óńirdegi shaǵyn jáne orta bıznestiń damýy jóninde habarlama jasady. Osy salada jumyspen qamtylǵandardyń sany - 128,1 myń adam , 1 362,3 mlrd teńgeniń ónimi óndirilgen. 2019 jyly memlekettik jáne óńirlik baǵdarlamalarǵa 5 846,5 mln teńge bólindi, onyń 3 387,8 mln – jergilikti bıýdjetten. 2019 jyly «Bıznestiń jol kartasy – 2020» baǵdarlamasyna 2 249,5 mln teńge bólindi. 282 joba qoldaý taýyp, 705 jumys orny quryldy. Baǵdarlama júzege asyrylǵannan beri (2010-2019 jj) óńirde jalpy nesıe somasy - 115,5 mlrd teńge bolatyn 1 546 kásipkerdiń jobasy qoldaý alyp, 18 433 jumys orny saqtalýmen 6 576 jańa jumys orny quryldy. Olarmen 203,1 mlrd teńgege jýyq ónim óndirilip, 39,6 mlrd teńgeden astam salyq tólendi.
- Biz óz jumysymyzda kásipkerlikti damytýdy qoldaýymyz kerek. Elbasynyń, Prezıdenttiń tapsyrmalary bar. Shaǵyn jáne orta bıznesti damytý – bul salyq bazasynyń ulǵaıýy, jańa jumys oryndarynyń ashylýy, halyqtyń ál-aýqatyn jaqsartýǵa baǵyttalǵan basqa da áleýmettik máseleler, - dedi Nurlan Noǵaev.
Statıstıkalyq málimetter boıynsha, ShOB óńirlik jalpy ónimdegi úlesi - 19%. Eger bıznestiń TShO jáne NKOK sııaqty jobalarǵa úlesin eseptemese, bul kórsetkish - 38% jetedi.
- Biz kásipkerlermen ashyq ta adal sóılesýge umtylamyz. ShOB qoldaý boıynsha memlekettik baǵdarlamalardy iske asyrý bızneske belsendi damýǵa múmkindik beredi. Oblystyń geoportalynan ótkizilip jatqan jer aýksıondary men konkýrstar týraly barlyq málimetti alýǵa bolady. Bul arqyly áleýetti qatysýshy atalǵan ýchaskeniń artyqshylyqtaryn aldyn-ala baǵalaı alady. Kásipkerge aqparat, kelisim alý úshin memlekettik organǵa barýdyń qajeti joq. Basty maqsat – ruqsat qaǵazdaryn alýdaǵy adamı faktordy meılinshe azaıtý jáne olardy berýdi tezdetý. Barlyǵy da ashyq, jarııaly bolýy qajet, - dep atap ótti oblys ákimi.
Kásipkerler ákimge fermerlik pen mal ósirýge tejeý bolyp turǵan faktorlar týraly aıtty : ol sýarý ınfraqurylymynyń jetispeýshiligi. Qazirgi bar sýarý júıeleri bytyrańqy jáne tehnıkalyq turǵydan tozǵan.
Nurlan Noǵaev óńirde sýmen qamtamasyz etý máselesi shynynda da ózekti ekenin aıtty. Jergilikti bılik sýbsıdııalaý máselesin birneshe ret kótergen, biraq problema sheshimin tappaı tur. Soǵan qaramastan, oblys ákimdigi sý kanaldarynyń qyzmetin qalpyna keltirý boıynsha jumystanýda. Jalpy uzyndyǵy 1150 shaqyrym 15 kanaldyń 14 óńirdiń balansyna alyndy. Bul kanaldardy tazartý, jóndeý jumystaryn jergilikti bıýdjetten qarjylandyrýǵa múmkindik beredi.
Oblys ákimimen ashyq áńgimelesýge kelgen bıznes ókilderi ózderiniń problemalaryn da aıtty, jetistikterin de kórsetti. Bir kásipker áıeldiń «Qazaq qyzy akademııasy» ınnovasııalyq jobasy áıelder kásipkerligin damytýǵa jáne qazaq qolónerin nasıhattaýǵa arnalǵan. Taǵy bir kásipker sheshendik óner trenıngterine memlekettik qyzmetshilerdi tartýǵa ákimniń yqpal etýin surady.
- О́ziniń oıyn naqty jetkizip, áńgimelese bilýge bala jastan baýlý qajet jáne bul tek memlekettik qyzmetshilerge emes, bárimizge kerek. Zamanaýı tehnologııalardyń damýynyń teris jaqtary da bar. Biz tildesip, aralasýdan, kitap oqýdan qalyp baramyz. Qarym-qatynasty kúsheıtip, bir-birimizdi syılaı bilýimiz kerek. Biz búgin sizdermen ashyq formatta tildesip otyrmyz. Problemalyq máselelerdi talqylap, sheshý joldaryn izdeý úshin keldim. Men áriptesterime senemin, olar óz oılaryn halyqqa uǵynyqty jetkize alady. Jáne bundaı qarym-qatynas kóptegen problemalardy sheshýge múmkindik beredi, - dep oı túıdi N.Noǵaev.
Kásipkerler jer ýchaskelerin berý, elektr qýatyna qol jetkizý, óz jobalaryn iske asyrý boıynsha qandaı kómekter bar – basqa da kóptegen saýaldar qoıdy. Oblys ákimi barlyq kóterilgen máseleler boıynsha olardy sheshý joldaryn qarastyrý jóninde qaramaǵyndaǵy qyzmetkerlerge tapsyrmalar berdi.
