Osy qýanyshqa arnaıy kelip, turǵyndardy merekemen quttyqtaǵan oblys ákimi Jeńis Qasymbek Elbasynyń Temirtaý qalasynyń damýyna únemi erekshe kóńil bólip kele jatqanyn atap ótti.
– Tuńǵysh Prezıdent kúni sizderdiń otbasylaryńyz úshin qonys toıyn toılaǵan erekshe kúnge aınaldy. Táýelsizdik jyldary turǵyn úımen qamtamasyz etýge baǵyttalǵan 10-nan astam memlekettik baǵdarlama jasaldy. Olardyń ishinde «Nurly jer», «7-20-25», «Baqytty otbasy», «Qoljetimdi baspana 2020» jáne basqalar bar, – degen óńir basshysy Temirtaýda kelesi jyly 150 páterli úsh úı salynatynyn málim etti. Budan bólek, metallýrgter qalasynda Elbasynyń tapsyrmasy boıynsha jańa dene shynyqtyrý-saýyqtyrý kesheni men aýrýhananyń qurylysy júrgizilip jatyr.
Baspanaly bolýdyń baqytyna bólengenderdiń biri – arbaǵa tańylsa da armany asqaq ónerpaz,«Juldyzdy sát» konkýrsynyń jeńimpazy Arman Qarynsaý.
– Bizdiń turǵyn úı kezeginde turǵanymyzǵa bıyl 10 jyl boldy. Mine, búgin armanymyz oryndalyp, baspanaly boldyq. Buǵan deıin búkil otbasymyzben týysqanymyzdyń úıinde turyp keldik. 2019 jyl bizdiń otbasy úshin sátti boldy, – degen ol óziniń otbasy atynan oblys jáne qala basshylyǵyna alǵys sezimin jetkizdi.
Sol kúni keshke qaraı Temirtaýdyń mádenıet úıinde merekelik konsert uıymdastyryldy. Qala turǵyndary men qonaqtary qazaq estradasynyń juldyzdary men Qalı Baıjanov atyndaǵy konserttik birlestik ártisteriniń ónerin tamashalady. Sonymen qatar, temirtaýlyqtardyń aldynda taıaýda ótken Junior Eurovision baıqaýynda 2-oryn alǵan Erjan Maksım án shyrqady.
Aıta ketý kerek, Tuńǵysh Prezıdent kúni merekesinde oblystyń basqa da qalalary men aýdandarynda turǵyndar baspanaly bolyp, qonys toıyn toılady. Mysaly, Jezqazǵan, Sátbaev jáne Prıozersk qalalarynda, Buqar jyraý, Aqtoǵaı, Abaı jáne Shet aýdandarynda turǵyn úı kezeginde turǵan azamattarǵa páterlerdiń kiltteri tabys etildi. Sonymen qatar, oblys ortalyǵynda jańa medısınalyq ortalyq pen Shahtınsk qalasynda jekemenshik balabaqsha paıdalanýǵa berildi.
