Tuńǵysh Prezıdent kúni merekesinde О́skemendegi «Shyǵys» óńirlik qolbasshylyǵyna qarasty Qasym Qaısenov atyndaǵy 27943 áskerı bóliminiń jas sarbazdary (jalpy sany - 330) saltanatty túrde áskerı ant qabyldady.
Jas sarbazdardyń áskerı ant qabyldaý rásimi bólimniń saptyq alańynda saltanatty sapqa turǵyzylyp, qurmetti qonaqtar men ár óńirden jınalǵan ata-analardyń qatysýymen ótti.
«Saltanatty shara barysynda «Shyǵys» óńirlik qolbasshylyǵy áskerler qolbasshysynyń tehnıkalyq qamtamasyz etý jónindegi orynbasary, polkovnık Baqytbek Sadyqov, áskerı-patrıottyq komıssııanyń tóraıymy, S.Amanjolov atyndaǵy Shyǵys Qazaqstan memlekettik ýnıversıtetiniń professory Lensta Áýbákirova, otstavkadaǵy polkovnık Amangeldi Qurymbaev aqsaqal men jas sarbazdar ata-analarynyń atynan Naýret Nurdaýlettiń anasy Jeńisgúl Tileýbaı jáne Tashım Baqdáýlettiń ákesi Jańabek Tashımov quttyqtaý sóz sóıledi. Jas sarbazdar atynan sóz sóılegen qatardaǵy Nurlybek Jetibaev pen Vladıslav Brekotnın: «Áskerı ant qabyldaı otyryp, bizderdi qysqa merzimde osy áskerı ómirge beıimdeýde qyzmet etken ofıserler men serjanttarǵa alǵys bildiremiz. Sonymen qatar «Biz jas sarbazdar elimizdi qorǵaýǵa, jerimizdi saqtaýǵa jáne úlgili azamat bolýǵa saltanatty túrde ant etemiz!» dedi. 27943 áskerı bólim komandıri, podpolkovnık Erjan Meırmanov: «Búgingi kún - sizderdiń ómirlerińizdegi tarıhı kún. Áskerı ant qabyldaı otyryp, Sizder bizdiń Táýelsiz Qazaqstanymyzdyń Otan qorǵaýshylary boldyńyzdar! Búgingi tańda bizder batyrlarymyz Saǵadat Nurmaǵambetov, Talǵat Bıgeldınov, Baýyrjan Momyshuly, Álııa Moldaǵulova, Mánshúk Mámetova jáne Qasym Qaısenov, Tólegen Toqtarov esimderin maqtanyshpen aıtamyz. Olar da osylaı Otanǵa adal bolýǵa ant qabyldap, óz áskerı jaýyngerlik mindetterin tabandylyqpen oryndap, erlikpen elge qyzmet atqardy. Osy ata-babalarymyzdyń Otanǵa degen sheksiz súıispenshilikteri Sizder men bizder úshin naǵyz úlgi, qurmetti jaýyngerler!» dep óz lebizin jetkizdi. Shara sońynda jas sarbazdar jıyny jeke quramy qysqa merzimde ózderi meńgergen qoıan-qoltyq urys jattyǵýlarynan qarýmen jáne bólimniń shtab batalony barlaý rotasy jeke quramy jaýyngerlik urys, oqý-taktıkalyq jattyǵýlarynan kórsetilimderdi qonaqtar nazaryna pash etti» deıdi 27943 áskerı bóliminiń ıdeologııalyq jumystar, arnaıy nasıhat jáne memlekettik-quqyqtyq daıyndyq jónindegi aǵa ofıseri N.Malǵajdarov.
О́SKEMEN
