Elbasy kitaphanasyna bardy
Máselen, bas qaladaǵy №9 «Zerde» mamandandyrylǵan mektebiniń 9-synyp oqýshylary Elbasy kitaphanasyna baryp, ondaǵy arhıv, mýzeı jáne kitap jınaqtarymen tanysty. Sondaı-aq balalar «Qazaqstandaǵy olımpıadalyq qozǵalys» ekskýrsııacy jáne ınteraktıvti aımaq aıaldamasynda ótken kvest-ekskýrsııaǵa qatysty.
Ekskýrsııany júrgizgen kitaphana qyzmetkeri Botagóz Aıapbergenova oqýshylarǵa Elbasy Nursultan Nazarbaevtyń eńbegin tanystyra kelip, elimizdiń sport salasyndaǵy jetistikterine toqtaldy. Osydan keıin Qazaqstannyń Olımpıada tarıhy týraly tolyq aqparat alǵan jasóspirimder kvest oıynyn oınady.
«Ekskýrsııaǵa oqýshylar belsendi qatysty. Tuńǵysh Prezıdenttiń balalyq shaǵy men eńbek jolyna, táýelsizdik jyldaryndaǵy qundy jádigerlerge qanyqqan balalar Elbasynyń elektrondy kitaptaryn tamashalady. Sport sańlaqtarynyń jetistikterimen tanysqan oqýshylarǵa kvest oıyndary tipti de qyzyq boldy», deıdi №9 «Zerde» mamandandyrylǵan mektebiniń áleýmettik pedagogy Kámshat Tasbolatova.
О́skeleń urpaqqa ónege
Al №72 mektep-lıseıde ataýly merekege oraı «Máńgi óshpes jaryq juldyz» atty kesh ótti. Jıynǵa kórnekti kompozıtor, Memlekettik syılyqtyń laýreaty Tólegen Muhamedjanov pen onyń jary, belgili opera ánshisi, Memlekettik syılyqtyń laýreaty Nurjamal Úsenbaeva qatysyp, óskeleń urpaqqa ónege bolarlyq ulaǵatty áńgime aıtyp, ásem ánnen shashý shashty. Kóshbasshy joly men muraty, yntymaǵy men birligi jarasqan búgingi Qazaqstannyń jańa kelbeti týraly sóz qozǵady.
– Táýelsiz Qazaqstannyń jańa dáýirindegi halyqtyq merekege aınalǵan Tuńǵysh Prezıdent kúni – elimiz úshin erekshe eleýli ýaqıǵa. Kóregen sheshimi men halyq úshin atqarǵan eńbegi ushan-teńiz. Eń áýeli egemendigimizdiń berik irgesin qalap, shekarasyn shegelep, ekonomıka, bilim, mádenıet salalaryn aldyńǵy qatarǵa shyǵardy. Onyń basshylyǵymen qurylǵan el astanasy el ıgiligine arqaý bolǵan dıplomatııalyq mıssııalardyń ordasyna aınaldy. Sondyqtan keler urpaq úshin jastyq armanǵa qanat bitirer osyndaı arnaýly kúnniń mańyzyn aıtý, nasıhattaý óte mańyzdy, – degen T.Muhamedjanov barsha qazaqstandyqtardy merekemen quttyqtady.
Dáris oqydy
S.Seıfýllın atyndaǵy Qazaq agrotehnıkalyq ýnıversıtetiniń «Qazaqstan tarıhy» kafedrasynyń aǵa oqytýshysy, tarıh ǵylymdarynyń kandıdaty Aınur Jumaǵazyqyzy Nur-Sultan qalasyndaǵy №3 mektep-gımnazııasynyń 9-11 synyp oqýshylaryna Elbasynyń dara joly jaıly dáris oqydy.
Tarıhshy Elbasynyń eńbegine ózge elderdiń basshylarynyń bergen baǵasyna toqtaldy. «Jas urpaqqa tárbıe berý barysynda úlgi bolarlyq tulǵalar kóp. Mysaly, Elbasy saıasatynyń arqasynda elimizdiń kók baıraǵy talaı mártebeli jıynda jelbiredi. Tuńǵysh Prezıdent derbes memleket ekenimizdi álem jurtshylyǵyna tanystyrdy. N.Nazarbaevtyń Qazaqstannyń damýyna, ósip-órkendeýine qosqan úlesi zor. О́ziniń sarabdal saıasatynyń, paıym-parasaty arqyly Táýelsiz elimizdiń keregesin keńeıtip, keleshegin jarqyn etip, qıyn-qystaý joldardan sheber sheshim qabyldap alyp shyqty», dedi Aınur Jumaǵazyqyzy.
Jıyn oqýshylardyń daıyndaǵan ádebı-mýzykalyq konsertimen aıaqtaldy.
Armandar oryndalady
Balalardyń tanymyn keńeıtip, jigerlendirgen osyndaı ıgi is-sharanyń biri №63 mektep-gımnazııasynda ótti. Bul sabaqqa mektep oqýshylary da tyńǵylyqty daıyndalyp kelipti.
Ashyq sabaq «Armandar oryndalady» dep ataldy. Bul rette balalarǵa Elbasynyń dara jolyn úlgi ete otyryp, óz armanyna jetýge degen jigerlerin janıtyn baıypty áńgime órbidi. Mektepke arnaıy kelgen belgili jýrnalıst Danııar Esen osy taqyrypta keńinen sóz qozǵady.
– Balalarmen sóılesken qyzyq. Olar – shynaıy. Oıyn búkpesiz aıtady. Ata-analardyń qateligi – balalarymen emen-jarqyn sóılese bilmeıdi. Balańyzǵa jaýapty mektep te, ınternet te, tárbıeshi de emes, tek ózińizsiz! Balalarǵa armandary, oǵan jetý jolynda qandaı áreket kerektigi týraly aıttym. Uıyp tyńdady. Oıyn oınadyq. Bir-birine suraq qoıdy. Bul ádis japon pedagogıkasynda oń nátıje bergen. Jalpy, kezdesýden alǵan áserim erekshe. Balalar azdap bolsa da motıvasııa alǵan shyǵar dep oıladym. Balalarmen sóılesińizder. Erkeletińizder. Baýyryńyzǵa basyńyz. Olar sizderdiń mahabbattaryńyzǵa zárý, – dedi ol.
Danııar Esen ózin izgilik pedagogıkasynyń negizin qalaǵan Shalva Amonashvılıge uqsatatynyn aıtty. Sondaı-aq mektep qonaǵy balalarmen kezdesýge áıeli, opera ánshisi Gúlnur Ermanovany da ertip keldi. Ol jyly júzdesýdiń sońynda án aıtyp, oqýshylardyń zeıinin klassıkalyq ánge burdy.
Adam kapıtalyn damytýǵa basymdyq berdi
Nur-Sultan qalasyndaǵy №77 mektep-gımnazııasynda ótken ashyq sabaq «Jasampazdyqtyń 30 jyly» taqyrybynda ótti. Elbasynyń ómiri men qyzmet joldaryna sholý jasaı otyryp, «Mádenı mura», «Máńgilik el», «Bolashaqqa baǵdar: rýhanı jańǵyrý», «Uly dalanyń jeti qyry» tárizdi memlekettik baǵdarlamalary men ıdeıalarynyń mańyzyn ashýdy kózdegen ashyq sabaqqa «Bolashaq» baǵdarlamasy boıynsha Amsterdam ýnıversıtetin támamdaǵan, Nazarbaev ýnıversıtetiniń magıstranty Ýálıhan Dıdarbekov qatysty. Qazaq, aǵylshyn, orys tilderinde qatar ótken ashyq sabaqta Ý.Dıdarbekov: «Ár memlekettiń basty baılyǵy – adam. Bizdiń el úshin de adam men adamı kapıtal eń qymbat qazyna bolyp esepteledi. Elbasynyń bastamalary men baǵdarlamalarynyń barlyǵynda derlik adam kapıtalyn damytýǵa kóńil bólinedi. «Bolashaq» baǵdarlamasy da adam kapıtalyn damytýǵa teńdessiz úles qosqan bastamalardyń biri. Elbasynyń osynaý baǵdarlamasy bizdiń bilim men biliktiligimizdi arttyryp, adam retinde básekelestikke qabiletimizdi jetildirdi. Bizdiń sapamyz arta tústi», dedi.
Táýelsizdik jemisi
Sondaı-aq №56 mektep-lıseıde «Elbasy muraty – bilimdi urpaq» atty kezdesý keshine aqyn Erbol Beıilhan men jazýshy Anar Qabylqaq qatysty.
«Oqýshylardyń belsendiligi men bilimge qushtarlyǵy unady. Bul qoǵamdy alǵa súıreıtin qasıet. Oqýshylar joǵary deńgeıde daıyndalǵan eken, Elbasy ómirin – balalyq shaǵy men qyzmet jyldaryn jup-jumyr teatrlandyrylǵan kóriniske syıǵyzyp, shynaıy, senimdi sahnalap shyqty. Olardyń belsendiligin arnaıy uıymdastyrylǵan esse baıqaýyna qatysýynan da kórýge bolady. Biz jeńimpaz atanǵan eki oqýshyny marapattadyq. Sondaı-aq kezdesý barysynda oqýshylar qazirgi aqyn-jazýshylar, ádebıettiń damý barysy, kitap shyǵarý jaıynda túrli saýal qoıdy. Kózinde oty bar, kóp biletin, pikirin ashyq aıtyp, qysylmaı suraq qoıa alatyn qazirgi oqýshylar – táýelsizdiktiń, demokratııalyq qoǵamnyń jemisi», deıdi A.Qabylqaq.
Daıyndaǵan «Egemenniń» tilshiler toby
