Úkimet • 03 Jeltoqsan, 2019

Áskerı medısınany damytýǵa arnalǵan jańa baǵdarlama usynyldy

36 retkórsetildi

Qazaqstan Qarýly Kúshteriniń Bas áskerı-medısınalyq basqarmasy áskerı medısınany damytý baǵdarlamasyn ázirledi. Qorǵanys mınıstrine osy salany damytýdyń negizgi baǵyttaryn baıandady. Bul týraly Qorǵanys mınıstrliginiń baspasóz qyzmeti habarlady.


Baǵdarlama Qazaqstannyń áskerı medısınasynyń birqatar mańyzdy baǵyttaryn qamtıdy: áskerı-medısınalyq qamtamasyz etýdi basqarý, kadrlyq resýrstar, materıaldyq baza jáne uıymdyq-shtattyq qurylym, sondaı-aq medısınalyq kómek kórsetýdi uıymdastyrý. Bul rette aǵymdaǵy jaǵdaı, problemalyq máseleler jáne olardy sheshýdiń usynylatyn joldary egjeı-tegjeıli kórsetilgen.

Bas áskerı-medısınalyq basqarma bastyǵy polkovnık Tımýr Oshaqbaevtyń aıtýynsha, atalmysh baǵdarlamany júzege asyrý Qazaqstanǵa beıbit jáne basqa da ýaqytta mindetterdi óz betinshe sheshýge qabiletti, medısınalyq qamtamasyz etý men saqtandyrýdyń jalpy júıesinde básekege qabiletti áskerı-medısınalyq bólimsheler men mekemeler qurýǵa múmkindik beredi.

Baıandamada aıtylǵandaı, josparlanyp otyrǵan basty nátıjeler – áskerlerdi sapaly, zamanaýı medısınalyq múlikpen jáne tehnıkamen úzdiksiz qamtamasyz etý, áskerı dárigerdiń mártebesin jáne áskerı medısınanyń bedelin arttyrý bolyp tabylady. Bul sharalardyń barlyǵy atalmysh qurylym men medısınalyq qyzmet júıesin jaqsartýǵa múmkindik beredi.

Baǵdarlamanyń mańyzdy aspektisi sanatorııalyq uıymdardyń klımatogeografııalyq ornalasýy boıynsha oryndardy bóle otyryp, sanatorııalyq-kýrorttyq emdeýge sáıkes qyzmetterdi satyp alý bolyp tabylady. Qyzmetti qazirgi áskerı qyzmetshiler men zapastaǵy adamdar paıdalana alady.

Sondaı-aq qazaqstandyq áskerı qyzmetshilerdiń BUU bitimgershilik mıssııalaryna qatysýyn keńeıtý sheńberinde áskerı-dalalyq gospıtaldi daıyndaý jáne ony jiberý josparlanyp otyr.

Búginde Qazaqstannyń Qarýly Kúshterinde 21 áskerı-medısınalyq mekeme jumys isteıdi. Atap aıtqanda, ortalyqtar, gospıtaldar, lazaretter jáne 131 medısınalyq bólimshe-medısınalyq rotalar, pýnktter, vzvodtar, bólimsheler.

Áskerı medıkterdiń negizgi bóligi zapastaǵy ofıserlerdi jáne shet memleketterdiń áskerı oqý oryndarynyń túlekterin shaqyratyn Qazaqstannyń medısınalyq joǵary oqý oryndarynan quralady. Qosymsha bilim berýdi QM áskerı medısına ortalyǵy qamtamasyz etedi. Jyl saıyn 400-ge deıin adam bilim alady. Áskerı medısına júıesin damytý men jetildirý áskerdiń joǵary jaýyngerlik daıarlyǵyn qoldaý jónindegi sharalar kesheninde basym baǵyttardyń biri bolyp tabylady jáne memlekettiń qorǵanys qabiletine tikeleı áser etedi.


Sońǵy jańalyqtar

Kitaphana kóbeıgen elde qylmys azaıady

Ádebıet • Búgin, 15:14

Zańsyz qarý-jaraq satqandar sottaldy

Qoǵam • Búgin, 12:50

Igerilgen ınvestısııanyń ıgiligi

Aımaqtar • Búgin, 12:37

Taraz: Bilim oshaǵyndaǵy zańsyzdyqtar

Aımaqtar • Búgin, 11:20

Abaıdyń dombyrasy qandaı bolǵan?

Abaı • Búgin, 11:09

Uqsas jańalyqtar