Keshe elimizdiń bas qalasy – Astanaǵa halyqaralyq The Sun Trip atty velojarys jobasyna qatysýshy Raf Van Hol birinshi bolyp jetti. «The Sun Trip: Astana EKSPO-2017 baǵytynda» atty bul halyqaralyq velojarys ústimizdegi jylǵy 15 maýsymda Fransııanyń Savoııa qalasynan bastaý alǵan bolatyn.
Keshe elimizdiń bas qalasy – Astanaǵa halyqaralyq The Sun Trip atty velojarys jobasyna qatysýshy Raf Van Hol birinshi bolyp jetti. «The Sun Trip: Astana EKSPO-2017 baǵytynda» atty bul halyqaralyq velojarys ústimizdegi jylǵy 15 maýsymda Fransııanyń Savoııa qalasynan bastaý alǵan bolatyn.
«The Sun Trip: Astana EKSPO-2017 baǵytynda» atty bul halyqaralyq jarystyń basty maqsaty – elordamyzda 2017 jyly ótetin Búkilálemdik kórmeniń bas taqyryby – «Bolashaq energııasyn» jahandyq aýqymda nasıhattaý bolyp tabylady. Halyqaralyq velojarysqa qatysýshylar Astanaǵa deıingi óz saparlarynyń baǵytyn ózderi tańdady. Sapar barysynda veloshabandozdar Venesııa, Sofııa, Býharest, Odessa, Ystambul, Sochı, Baký, Atyraý jáne Aqtóbe qalalaryna toqtady.
Báseke barysynda «Solar Wind» komandasynyń ókili Raf Van Hol márege birinshi bolyp jetti. Ol 38 kún aralyǵynda, jeti myń kılometrden astam qashyqtyqty óziniń kúnnen nár alatyn kóligimen júrip ótti.
Taý shyńyn, halyqaralyq avtobandar men dala jazyqtaryn baǵyndyrǵan veloshabandoz: «Qazaqstan – óte tartymdy el! Eýropa jurtshylyǵynyń kópshiligi Qazaqstannyń qandaı el ekenin jáne munda sheksiz ásem dala bar ekenin bilmeıdi. Sol sebepten men óz kózimmen kórip, jaǵymdy pikir alý úshin osy saparǵa shyqtym!» – dep atap ótti.
Velojarys jeńimpazyn Astana qalasynda Syrtqy ister mınıstrliginiń, Fransııanyń Qazaqstan Respýblıkasyndaǵy elshiliginiń jáne «Astana EKSPO-2017» UK» AQ-tyń ókilderi qarsy aldy. Sol sııaqty halyqaralyq velojarysqa qatysýshylardy quttyqtaý úshin osy jobanyń negizin qalaýshy Florıan Baılı da Qazaqstanǵa kelipti. Ekinshi bolyp, búgin elordamyzǵa velojarysqa qatysýshy fransýzdyq velosıpedshi Jordj Moıta keledi. Halyqaralyq velojarysqa qatysýshy qalǵan veloshabandozdar Astana qalasyndaǵy márege taıaýdaǵy eki aptanyń ishinde tolyq kelip jetetin bolady. Sodan keıin elordamyzda The Sun Trip jobasyna qatysýshy veloshabandozdardyń qatysýymen buqaralyq velosıped jarysy ótkiziledi.
Márege birinshi bolyp jetken Belgııa azamaty Raf Van Holdiń mamandyǵy – sáýletshi jáne energetıka máseleleri boıynsha sarapshy. Ol osyndaı halyqaralyq jarystarǵa qatysý arqyly saparǵa shyǵýdy unatady. Eki paneldi kún batareıalarymen jabdyqtalǵan velosıpedin onyń ózi qurastyrǵan. Raftyń aıtýynsha, kún batareıalarymen jaraqtandyrylǵan bul velosıpedi onyń arnaıy patent alǵan ónertapqyshtyq jańalyǵy bolyp tabylady. Bul ekologııalyq tıimdi kólik quralynyń jyldamdyǵy saǵatyna 50 shaqyrym.
Jylqybaı JAǴYPARULY,
«Egemen Qazaqstan».
Sýrette: halyqaralyq velojarystyń jeńimpazyn Astanada qarsy alý.
