Osy balet jaıly estigen óner súıer qaýym premeradan bir aı buryn bıletterdiń bárin satyp alǵan.
Kórermenniń osynalyqty yntyzarlyq tanytyp otyrǵanynyń sebebi sol, elimizde atalǵan ertegi balet sahnasynda alǵash qoıylyp otyr. Sergeı Prokofevtyń ǵajaıyp mýzykasyn qoıýshy-dırıjer Arman Orazǵalıev basqaratyn orkestr oryndap shyǵady.
Premeraǵa daıyndyq eki aı buryn bastalǵan. Horeograf Nadejda Kalınınanyń aıtýynsha, «Kúlshe qyz» - shyǵarmashylyq jolyndaǵy eń kúrdeli jobalarynyń biri.
- Bul alǵash qoıylyp jatqan dúnıe. Horeografııa, dekorasııa, kostıýmder, beıne kontent – osynyń bárin oıdan shyǵaryp, arnaıy «Astana Balet» úshin daıyndap, kıimderin tigip jatyrmyz. Adam balasy ertegini qajetsinedi. Bizdiń maqsat otbasyńyzben birge kóretin, zamanaýı stılde jasalǵan, tartymdy keıipkerleri kóp, ázili bar jarqyn spektkl jasaý. Balette komedııa janry múldem sırek qoldanylady, óıtkeni, sahnada tentektiń keıipin somdaý, kúldirý óte kúrdeli. Ol úshin belgili bir dárejede ishki bostandyq qajet, - dedi baletmeıster.
Kúlshe qyzdyń ógeı ápkeleri, olardyń kavalerleri, О́geı Sheshe, tipti Hanzadanyń ózine qyzyqty horeografııalyq replıkalar qosylǵan.
- О́z basym Hanzadanyń tym salmaqty, dúrdeı bolǵanyn qalamadym. Arakidik ol-daǵy tentektik jasaıdy. Spektakl horeografııasyn jasaǵanda men ártisterge ıek artamyn, olardy árdaıym osy dúnıeni birge týdyrýshy retinde qabyldaımyn. «Astana Balet» ártisterine qarap shabyttanamyn. Trýppanyń kásibı turǵyda osynshalyqty óskeni tań qaldyrady, tamsandyrady. Sebebi, olarmen osy teatr qurylǵan shaqta jumys istegenim bar,- dedi N. Kalınına.
Horeograf Nadejda Kalınına lıbrettonyń da avtory. Dekorasııa men kostıým sýrteshisi - tanymal ssenograf Sergeı Novıkov. Onyń ınterpretasııasyna sáıkes, balet oqıǵasy Kúlshe qyzdyń kúndeligi retinde órbıdi. Sol sebepti, kitap taqyryby spektakldiń ón boıynan seziledi.
Aldaǵy premeraǵa teatrdyń balet trýppasy túgel qatysady. Naqty eshkimniń esimin ataǵan joq, degenmen bir nárse aıqyn. Basty partııalardyń birine ártisterdiń úsh-tórt quramyn daıyndap otyr.
Spektakl 20-jeltoqsanda, saǵat 19:30, al, jeltoqsannyń 21, 22 kúnderi, saǵat 18:00 bastalady.
