Bıyl festıval formatyna ózgerister engizildi. Bul joly baıqaýǵa debıýttik tolyqmetrajdy fılmder de qatysady. Festıvaldyń resmı baǵdarlamasy Bastau Shorts – Eýropa elderi, alys-jaqyn shetel stýdentteriniń keıingi 2 jylda túsirilgen qysqametrajdy kórkem, anımasııalyq jáne derekti fılmderiniń halyqaralyq baıqaýy jáne Bastau Debuts – tolyqmetrajdy debıýttik kórkem fılmderiniń halyqaralyq baıqaýynan turady.
– Bizdiń festıvalimiz shyǵarmashylyqpen aınalysatyn jastarǵa bastaý bolatyn, tájirıbıe almasýǵa jáne jas kınogerlerge óz jobalaryn keńinen nasıhattaýǵa, ónerdegi yntymaqtastyqqa jol ashatyn kásibı alań, – dedi festıvaldiń ashylýyna baılanysty uıymdastyrylǵan baspasóz máslıhatynda sóz alǵan «Bastaý» kınofestıvaliniń prezıdenti Sergeı Ázimov. – Sondyqtan da bul alań daryndy jastarymyzǵa festıvaldyń qonaqtarynan – kıno óndirisiniń túrli salasyndaǵy kásibı mamandar men sarapshylardan úırenýge taptyrmas múmkindik syılaıdy. Sonymen qatar festıvaldyń aldyǵa qoıǵan maqsatynyń biri – jas mamandarǵa qoldaý kórsetip, olardyń jumysyn nasıhattaý, túrli janrda fılm túsirýge qyzyǵýshylyǵyn arttyrý. Jalpy festıvaldyń basty ereksheligi – shyǵarmashylyq erkindik. Onyń tynys-yrǵaǵyn qatysýshy jas býyn ózi aıqyndaıdy. Sondyqtan da festıval uranynyń «Jańa býyn kınosy» dep atalýy da tegin emes. Mysaly, baıqaýdaǵy jumystarǵa halyqaralyq qazylar alqasymen qosa, stýdent jastardan quralǵan tóreshiler de baǵa beredi. Festıvaldyń nátıjesinde ulttyq kınorejıssýradaǵy jańa tolqynnyń qarymy baıqalmaq.
Bastau Debuts atty debıýttik tolyqmetrajdy fılmderdiń halyqaralyq baıqaýyna 10 kartına tańdalyp alyndy. Onyń qatarynda túrli halyqaralyq baıqaýlarda topty jaryp, oq boıy ozyp júrgen «Avrora» (Qyrǵyzstan), Berlın kınofestıvaline qatysqan «Olardy kórgen sońǵy adam» (Germanııa), Úndistan men Qytaıdyń birlesip túsirgen «Aýyrsyný» fılmi, «Beıitterdi jyljytý» kınolentasy (Koreı), álemdik jetekshi kınofestıvalderdiń laýreaty «Márıam» (Qazaqstan) jáne basqa kartınalar bar.
Bul baıqaýǵa belgili reseılik rejısser, ssenarııst ári prodıýser Mıhaıl Segal jetekshilik etetin halyqaralyq qazylar alqasy baǵa beredi. Qazylar alqasynyń quramynda ıspandyq kınosynshy, kınofestıvaldyń San-Sebastıandaǵy irikteý komıtetiniń múshesi Roberto Kýeto, fransýz prodıýseri ári dıstrıbıýter Denıs Vaslın, reseılik teatr jáne kıno aktrısasy Nellı Ývarova, qazaqstandyq tanymal akter ári prodıýser Farhat Ábdiraıymov bar. Sondaı-aq festıval barysynda stýdenttik qazylar alqasy da jumys isteıdi. Bıyl onyń quramyna Qazaqstan, Armenııa, Belarýs, Reseı, Qyrǵyzstan ókilderi kirip otyr.
Bastau Shorts qysqametrajdy fılmder baıqaýyna qatysý úshin bıyl álemniń 44 elinen 360 ótinim kelip túsken. Mundaı rekordtyq kórsetkish festıvalǵa degen qyzyǵýshylyq pen onyń halyqaralyq bedeliniń arta túskenin aıǵaqtaıdy. Tizimdegi kóshti 60 fılmimen qatysatyn Reseı bastap tur. Bir eskeretin jaıt, bıyl festıvalǵa alǵash ret Nepaldyń jas kınogerleri qatyspaq.
Bul baǵdarlamada Qazaqstan 6 kartına usynady, olar: Kamılla Berdimuratovanyń «Taqsyr» derekti fılmi, Aıdarbek Ábdilqadyrdyń «Tereń sý» atty anımasııalyq týyndysy, Samǵar Raqymnyń «Dıplommen – aýylǵa» fılmi, Elaman Shaýbanovtyń «Baýyr» kartınasy, Darına Manapovanyń «Máýlen» dramasy jáne Baǵlan Qudaıberlıevtiń «Tynyshtyq baıany» fılmi.
Qysqametrajdy fılmderge qazylyq etetin alqanyń tóraǵalyǵyna fransııalyq rejısser, ssenarııst, «Sanders» sekildi bedeldi kınofestıvaldyń eki márte jeńimpazy, Venesııa kınofestıvaliniń júldegeri Gela Bablýanı tańdaldy. Sondaı-aq qazylar alqasynyń quramynda О́zbekstannyń eńbek sińirgen ártisi Rano Shodıeva, «Lıstopad» HKF baǵdarlamalyq dırektory Igor Sýkmanov, reseılik teatr jáne kıno akteri Aleksandr Pashkov, qazaqstandyq rejısser Shárıpa Orazbaevalar bar.
Festıval aıasynda konkýrstan tys qyzyqty baǵdarlama daıyndalǵan. Onda álemdik derekti (BASTAU DOCS), sonymen qatar jańa qazaqstandyq kıno (BASTAU KZ) kórsetilimderi uıymdastyrylmaq. Jalpy «Bastaý» sheńberinde kórermen bes kún boıy túrli janr men baǵyttaǵy 80-ge jýyq kıno sheberleri men debıýtanttardyń kınosyn kórip, tamashalaı alady.
Kórsetilimder Bekmambetov Cinema (Abaı dańǵ.109 V, Globus HKF, 2-qabat) kınoteatrynda ótedi. Kirý tegin.
Festıvaldyń qazylar alqasy men qonaqtary ótkizetin sheberlik dáristeri men shyǵarmashylyq kezdesýler kezinde stýdentter kıno salasyna qatysty tolǵandyrar suraqtaryna jaýap taba alady. Mysaly, T.Júrgenov atyndaǵy Qazaq ulttyq óner akademııasynda «Pıtchıng» óneri» taqyrybynda sheberlik dáris uıymdastyrylady. Ony armenııalyq aktrısa Armıne Anda ótkizedi. Sondaı-aq festıval aıasynda Ortalyq Azııamen birlesip túsiretin kıno týyndylardyń erekshelikterine arnalǵan (Denıs Vaslın, Nıderland), qazirgi zamanǵy kıno óndirisi máselelerine qatysty (Arsen Arakelıan, Armenııa), sonymen qatar sıfrly tóńkeris zamanyndaǵy derekti kınoǵa qatysty (Alekseı Hanıýtın, Reseı) máseleler tóńireginde sheberlik dáristeri uıymdastyrylady.
Festıval aıasynda Halyqaralyq kınomektepter qaýymdastyǵynyń quramyna jańa múshelerdi qabyldaý týraly Memorandýmǵa qol qoıylady.
Jas kınogerlerdiń festıvali rejısser Shárıpa Orazbaevanyń «Márıam» atty kartınasymen ashylady. Festıval jeńimpazdarynyń esimderi 2019 jyldyń 7 jeltoqsanynda ótetin marapattaý saltanatynda jarııalanady.
«Bastaý» stýdenttik jáne debıýttik fılmderdiń halyqaralyq festıvali Almaty qalasy ákimdiginiń, T.Q.Júrgenov atyndaǵy Qazaq Ulttyq óner akademııasy, Tanaris Production kompanııasy, «Turan» ýnıversıteti jáne Sh.Aımanov atyndaǵy «Qazaqfılm» kınostýdııasynyń qoldaýymen uıymdastyrylyp otyr.
ALMATY
