Elordanyń sol jaǵalaýynda ornalasqan jobalyq ataýy №28 kóshege Qazaqstannyń halyq jazýshysy, qoǵam jáne saıasat qaıratkeri, Qazaqstannyń Eńbek Eri Ábish Kekilbaıulynyń esimi berildi. Saltanatty sharaǵa Memlekettik hatshy Qyrymbek Kósherbaev, qala ákimi Altaı Kólginov, Parlament depýtattary, mádenıet qaıratkerleri men Ábish Kekilbaıulynyń jubaıy qatysty.
«Tuńǵysh Prezıdentimiz Elbasynyń usynysymen osy Eýrazııanyń tórine keremet jańa astanamyzdy salyp, Elbasynyń kótergen usynysyna óziniń tilegin qosyp, shyn júregimen nıetin bildirip, qoldaý kórsetken Ábish aǵanyń atyndaǵy kósheniń ashylýy sátine qatysyp turmyz. Osy dańǵyldyń boıynda ótken óskeleń urpaq Ábish Kekilbaıulynyń kim ekenin, Farıza Ońǵarsynovanyń kim ekenin, Nur-Sultan qalasynyń ne úshin salynǵanyn eskerip, táýelsizdigimizdi baıandy etýge óz úlesterin qossa degen nıettemin. Klara apamyzǵa alǵys bildiremin. Siz jas urpaq úshin úlgisiz» dedi Memlekettik hatshy Qyrymbek Kósherbaev.
Elorda ákimi Altaı Kólginov Ábish Kekilbaıulynyń eldiń damýy men órkendeýine qosqan úlesin atap ótti.
«Búgin Qazaqstannyń túkpir-túkpirinen abyz aqynymyz Ábish Kekilbaıulynyń atyna kóshe berilý sharasynda barlyǵymyz bas qosyp otyrmyz. Shynynda da bul - tarıhı oqıǵa. Elbasynyń qasynda jyldar boıy serik bolyp júrip, osy qazaq elinen máńgilik el jasaýǵa úlken eńbek etken aǵamyzdyń esimimen kóshelerdiń birin ataýdy uıǵardyq. Búgin Nur-Sultan qalasynda aǵamyzdyń 80 jyldyǵyna oraı birqatar is-sharalar ótedi»,- dedi Altaı Kólginov.
Ábish Kekilbaıuly Gı de Mopassannyń «Jızn», «Per ı Jan» romandaryn, Shyńǵys Aıtmatovtyń «Rannıe jýravlı» povesin, Ýılıam Shekspırdiń, Anton Chehovtyń, Lev Tolstoıdyń jáne t.b. shyǵarmalaryn ana tilimizge aýdardy. Alash abyzynyń shyǵarmalary álemniń 13 tiline aýdarylǵan. Búgin saǵat 17: 00-de Beıbitshilik jáne kelisim saraıynda Ábish Kekilbaevty eske alý keshi ótedi.
