Oral qalalyq jastar resýrstyq ortalyǵynyń basshysy Bolatbek Sahıevtyń aıtýynsha, qala turǵyndarynyń 60 806-sy – 14 pen 29 aralyǵyndaǵy jastar. Munyń 37 905-i – orta mektepter men kolledj-ýnıversıtette bilim alady. 2019 jylǵy jumyssyzdyq kórsetkishi jastar arasynda 2,1 paıyz deńgeıinde bolypty.
- Jyl basynan beri 2958 jas jumys izdep jolyqsa, sonyń 2291-i memlekettik qoldaýǵa ıe boldy. 934 jas turaqty jumysqa turdy. «Eńbek» memlekettik baǵdarlamasy aıasynda «Jastar tájirıbesi» boıynsha 551 jas maman ár túrli mekemelerge joldandy. Sóıtip onyń 147-si turaqty jumysqa qabyldandy, - deıdi B.Sahıev.
«Jastar jyly» aıasynda bıyl Oralda kásipkerlikti damytý baǵytynda kóptegen ıgi is jasalǵan. «Bıznestiń jol kartasy-2020» memlekettik baǵdarlamasy arqyly 130 mln teńge qarjy bólinip, qaıtarymsyz 50 grant ıesin tapty. Buǵan qosa osy baǵdarlama sheńberinde jastardy qoldaý maqsatynda oblys boıynsha óteýsiz memlekettik grant úshin qosymsha 45 mln teńge bólingen.
Tyń ıdeıalarymen kózge túsken jastarǵa arnalǵan biregeı baǵdarlamanyń biri – «Zhas Project» jobasy. Búkil elimizde keń qanat jaıǵan osy baǵdarlama boıynsha oraldyq 54 joba jeńimpaz atanyp, qatysýshylarǵa 1 000 000 teńge kóleminde qaıtarymsyz grant negizinde qarjy berilgen.
