Júzdegen altyn ken oryndaryn ashyp Betbaqdalany altyn dalaǵa aınaldyrǵan, kózi tirisinde-aq aty ańyzǵa aınalǵan D.Dúısenbekov Almaty oblysynyń Qaratal aýdanynda týǵan.
Qazaq taý-ken ınstıtýtyn (qazirgi Q.Sátbaev atyndaǵy QazUTÝ) bitirgen. Jezqazǵan ken baıytý kombınatynda, Tekeli geologııalyq barlaý júıesinde geolog, aǵa geolog bolyp eńbek etip, 1966-1993 jyldary Ońtústik Qazaqstan altyn kenin barlaý ekspedısııasynda jumys istegen. 1968 jyly Betpaqdalada júrgizgen geologııalyq izdeý jumystarynyń nátıjesinde Aqbaqaı altyn kenin ashqany ǵylymı ortaǵa málim. 1971-1978 jyldary osy ken ornynda aldyn ala barlaý, jete barlaý jumystaryn júrgizýmen qatar Mıronov vısmýt, Karernyı, Beskempir, Aqsaqal altyn kenderiniń de ashylýy tanymal egolog esimimen tikeleı baılanysty.
Aqbaqaı kendi aýdanynyń geologııasy, mıneralogııasy, petrografııasy týraly zertteýleri búginde qazaq ǵylymynda joǵary baǵaǵa ıe.
Eki márte «Eńbek Qyzyl Tý» ordenimen, medaldermen marapattalǵan geologqa arnalǵan eskertkish taqtanyń ashylýyna elimizdiń geologııa salasynyń, Almaty qalasy ákimdiginiń, «Altynalmas AK» AQ kompanııasynyń ókilderi, sondaı-aq D. Dúısenbekovtiń seriktesteri, izbasarlary men jaqyndary jáne de uly tulǵanyń jubaıy Qantaı apa da qatysty. Memorıaldyq taqtanyń ashylý sátinde estelikter aıtylyp, qatysýshylar Dúbek Dúısenbekovtyń qarapaıym da, ónegeli de erlik jolyn tebirene eske aldy.
ALMATY
