Búgin Almaty ákimdiginiń apparattyq jıynynda qoǵamdyq qaýipsizdikti qamtamasyz etý boıynsha tıimdi sharalar máseleleri qaraldy. Buryndary, aǵymdaǵy jyldyń 29 shildesinde qala ákimi B. Saǵyntaev polısııa departamentine krımınogendi jaǵdaıǵa saraptama júrgizýdi, barynsha kúrdeli ýchaskelerdi anyqtaýdy, patrýldeýdi kúsheıtýdi jáne polısııanyń mobıldi pýnktterin qurýdy tapsyrǵan edi.
Almatynyń polısııa departamentiniń basshysy Serik Kúdebaev qoǵamdyq tártipti saqtaý úshin táýlik saıyn polısııanyń 1650 qyzmetkeri 550 baǵyt boıynsha patrýldeý júrgizetinin baıandady. Barynsha krımınogendi 32 ýchaskede patrýldeý qyzmetkerleriniń sany 350 adamǵa deıin kóbeıdi. Bul munda qylmysty 17,4 paıyzǵa deıin qysqartýǵa múmkindik berdi. Atalǵan ýchaskelerde qylmysty «izin sýytpaı» ashý 11,8 paıyzǵa artty.
Almaty ákiminiń tapsyrmasy boıynsha ashylǵan polısııanyń 23 mobıldi pýnktine qazirdiń ózinde 2,5 myń adam júgingen, bularǵa quqyqtyqtan ózge zańnamalyq kómek te kórsetilgen. Mundaı pýnktterdiń sany 32-ge deıin jetetin bolady ári olar adamdar kóp jınalatyn jerlerge ornatylady.
Jalpy, krımınogendi ýchaskelerde patrýldeýdi kúsheıtý jáne polısııanyń mobıldi pýnktterin qurý qala boıynsha qylmys deńgeıin 11%-ǵa deıin qysqartýǵa múmkindik berdi.
«Tártip buzýdyń belsendi túrde aldyn alýdyń quramyna baǵyttardy túzetý jáne qylmys jasalǵan jerdegi nemese ózge ýchaskedegi qylmystyń deńgeıine saı patrýldeýdi kúsheıtý syndy keshendi sharalar engen. Qaýipsizdik basym baǵyttardyń biri bolǵandyqtan almatylyqtardyń ómir súrý sapasyn arttyrý boıynsha jumystar odan ári jalǵasatyn bolady», dep atap ótti Almaty ákimi Baqytjan Saǵyntaev.
