Bizdi kúnniń borany men tolassyz jaýyp turǵan qaryna qaramaı О́skemennen osynda bastap kelgen «Agrarlyq nesıe korporasııasy» AQ-nyń oblystyq fılıaly dırektorynyń orynbasary Gúlnur Soltanbaeva «Jan» sharýa qojalyǵy bıyl «Qarapaıym zattar ekonomıkasy» baǵdarlamasy boıynsha nesıe alyp, Qostanaıdan 139 bas qazaqtyń aq bas sıyryn satyp ákelgenin aıtqan-dy jol-jónekeı. Sóz láminen munda kelýdegi maqsaty memleket tarapynan berilgen nesıege ne alynyp, ne alynbaǵanyna kóz jetkizý ekenin ańǵarǵanbyz. Áńgimeni bizdi Shardan qarsy alyp, sharýa qojalyǵyna qaraı alyp júrgen Nurtýǵan Manapov kólik ishinde bastap ketti.
«О́skemende birneshe jyl bankte jumys istedim. Basqa qalalarǵa da jumysqa shaqyrdy. Oılana kele, aýylǵa kelip, mal sharýashylyǵymen shuǵyldanýdy jón dep sheshtim. Qazir áýletimizben, ákem bar, anam bar, inim bar, osy jerde asyl tuqymdy qazaqtyń aq bas sıyryn ósirýmen aınalysyp jatqan jaıymyz bar. 2011 jyly «Agrarlyq nesıe korporasııasynan» 15 mıllıon teńge nesıe alyp, sharýany endi qolǵa alǵan kezimizde bar bolǵany 60-70 iri-qaramyz bar edi. Búginde mine, qudaıǵa shúkir, sıyrymyzdyń sany myńǵa jetip qaldy» degende áýelde senbegenimiz ras. Bizdi qoıyp, sharýa qojalyǵyna buǵan deıin birneshe márte nesıe rásimdegen «Agrarlyq nesıe korporasııasynyń» ókili de «Bul sol jer me, álde basqa jer me?» degendeı buryn kelgen qystaǵynyń adam tanymastaı ózgerip ketkenine tańdanysyn jasyrmady. «Qazir jaılanyp shaı iship otyrǵan úıimiz birneshe jyl buryn mal tabanyndaǵy qańyraǵan ǵımarat bolǵan desem senbeıtin shyǵarsyzdar. Osynyń bári uldardyń eńbeginiń, biliminiń arqasy. Bizge senim bildirip, osymen úshinshi márte nesıe bergen «Agrarlyq nesıe korporasııasyna» myń alǵys. Memlekettiń qoldaýy bolmasa, búgingideı dárejege jeter me, jetpes pe edik?!» degen shaı ústinde aǵaıyndy Nurtýǵan men Dáýrenniń ákesi Shyńǵys aǵamyz.
Sharýa qojalyǵyndaǵy qaınap jatqan tirlikti kórip О́skemennen arnaıy kelgen «Agrarlyq nesıe korporasııasy» AQ-tyń oblystyq fılıaly dırektorynyń orynbasary Gúlnur Soltanbaevanyń kóńiliniń toǵaıǵany ras. «Agrarlyq nesıe korporasııasy» negizinen mal jáne ósimdik sharýashylyǵyna qatysty jobalardy qarjylandyrady. 2019 jyly «Qarapaıym zattar ekonomıkasy» baǵdarlamasy arqyly oblys boıynsha jalpy somasy 900 mıllıon teńgeni quraıtyn 42 jobaǵa qarjy bólindi. Jyl aıaǵyna deıin taǵy quny 500 mıllıon teńge bolatyn 30 jobany qarjylandyrmaq oıdamyz», deıdi ol.
Maı óndirisimen shuǵyldanatyn О́skemendegi «Tag-Tın» JShS-sy «Qarapaıym zattar ekonomıkasy» baǵdarlamasy boıynsha qomaqty nesıe alypty. Seriktestik basshysy Qanat Qurmanǵalıevtiń aıtýynsha, osy baǵdarlama aıasynda berilgen qarjyǵa zaýyt boı kóteripti. «Zaýyt qurylysyn 2016 jyly bastaǵanbyz. 2019 jyldyń basynda zaýytty iske qostyq. «Qarapaıym zattar ekonomıkasy» baǵdarlamasynyń kómegimen zaýyt qurylysyna jalpy somasy 700 mıllıon teńge qarjy jumsaldy. Onyń 180 mıllıony – óz qarajatymyz. Biz qazir kúnbaǵystan óndirilgen maıdy Qytaıǵa eksportqa shyǵaryp jatyrmyz, deıdi kásipker.
Shyǵys Qazaqstan oblysy,
Jarma aýdany
