Búgingi tańda Bilim jáne ǵylym mınıstrligi stýdentterdiń baspanamen qamtylyp, alańsyz bilim alý máselesin ońtaılandyrý maqsatynda birshama júıeli jumystardy júzege asyrýda. Onyń negizgi ózegi – jataqhana salý men buryn salynǵan ǵımarattardy jataqhanaǵa beıimdep qaıta jańǵyrtý jumystaryn júrgizýge memlekettik tapsyrys qarajatyn ornalastyrý. Osynaý qajettilikke oraı, BǴM «Qarjy ortalyǵy» AQ memlekettik tapsyrysty ornalastyrý qaǵıdasyn daıyndaǵan bolatyn. Atalǵan qujatta ortaq múddeli iske jekemenshik sektordy ekijaqty ońtaılylyq jaǵdaıynda tartý sharttylyqtary men ony júzege asyrý tetikteri qarastyrylǵan edi.
Aqparattyq nasıhat jumystarynyń pármendi júrgizilýiniń nátıjesinde búginde ınvestorlar men jeke kásipkerler stýdent jastar úshin jataqhana salý jáne buryn basqa baǵytta qoldanysta bolǵan ǵımarattardy jańadan jańǵyrtyp beıimdeý sharalaryna kirisip te ketti. Osy rette olardyń qolǵa alǵan isterine áleýmettik nysan dep qana qaramaı, túsimi turaqty, keleshegi ilkimdi bıznes-joba turǵysynan kelýleri kóńilge qýanysh uıalatady. Shynaıy suranys kólemin zerdeleý el kóleminde stýdentter úshin 75 myń jataqhana orny qajet ekendigin kórsetip otyr. Suranys respýblıkanyń iri qalalarymen qosa, oblystyq mańyzdaǵy qalalardy da qamtıdy.
Stýdentter jataqhanasyn salǵan nemese ǵımaratty qaıta beıimdep jańǵyrtqan ınvestor, ıakı bolmasa jeke kásipker nysandy (jataqhanany) stýdentter úshin qoldanysqa engizgen soń memleket tarapynan 8 jyl boıy memlekettik tapsyrysty ornalastyrý tásilimen qarjy tólemderi júrgiziledi. Tólem mólsheri paıdalanýǵa tapsyrylǵan jáne stýdentter naqty ornalasqan orynjaılar sanyna saı aıqyndalady. Jyl saıyn ár orynjaı úshin 122 aılyq eseptik kórsetkishi (AEK), ǵımaratty jataqhana retinde rekonstrýksııalanǵan jaǵdaıda 47 AEK kóleminde memleket qarjysy tólenedi.
Buryn stýdentterdiń jataqhanada turýynyń shekteýli tólemaqysy olardyń shákirtaqysynyń 15 paıyzynan aspaıtyn mólsherde belgilengen edi. Alaıda qurylys kompanııalarynyń ókilderi shyqqan shyǵynnyń ornyn toldyrýdy kózdeıtin bul kórsetkish bızneske de, JOO-ǵa da menshik ıesi retinde jataqhanany tıimdi basqarý múmkindigin bermeıdi dep esepteıdi. Sol sebepti, jataqhana ǵımarattarynda kásipkerlik baǵytyndaǵy sharttylyqtardy qosa paıdalaný joldary da qarastyryla bastady. Úshinshi bastama júzege asyryla bastaǵannan beri 5404 oryndyq 22 nysan iske qosyldy. Jańadan iske qosylǵan jataqhanalardyń stýdentter úshin bir aı turý quny ortasha eseppen 8,5 myń teńgeni quraıdy. Bul iri qalalarda bilim nárimen sýsyndap, stýdenttik shaqtaryn ótkizip, páter jaldap júrgen jastar úshin qoljetimdi somma. Máselen, orynjaı jańadan iske qosylǵan Qazaq ınjenerlik-tehnologııalyq ýnıversıtetiniń jataqhanasynda – 15000 teńge, «DıLMASh» JSSh – 4000 teńge, al «RnR Group» JShS jataqhanasynda – 10000 teńge. Jataqhanalar turmysqa qolaıly, jyly, jaryq, tegin Wi-Fi, kitaphanalarmen, kovorkıng ortalyqtarmen jabdyqtalǵan, kópshiliginiń sanıtarlyq toraptary burynǵydaı barshaǵa ortaq emes, bólme ishinde ornalasqan.
Osy oraıda aıta keter jaıt, jataqhanadaǵy oryndar kóbine ornalasý quqy alǵashqy kezekte memlekettik bilim berý granty negizinde oqýǵa túsken stýdentterge, onyń ishinde: jetim balalar men ata-anasynyń qamqorlyǵynsyz qalǵan balalar, múmkindigi shekteýli balalar, tolyq emes otbasylar men kóp balaly analardyń balalary, zeınet jasyndaǵy kóp balaly otbasylardyń balalaryna jetetin. Alǵa qoıylǵan meje 2022 jylǵa deıin keminde jataqhanalarda 75 myń jańa oryndy engizý, túıtkildi máseleniń sheshimin tarqatyp, zamanaýı jataqhanada turýǵa nıet tanytqan barlyq sanattaǵy stýdent jastardyń turǵyn jaıyn sheshedi degen senim mol.
«Qarjy ortalyǵy» AQ
