Boks • 10 Jeltoqsan, 2019

Almatydaǵy boks keshinde úsh legıoner kúsh synasady

30 retkórsetildi

16 jeltoqsanda Almatydaǵy Balýan Sholaq atyndaǵy Mádenıet jáne sport saraıynda ótetin boks keshinde qazaqstandyq «MTK Global» komandasy sapynda sheteldik úsh legıoner óner kórsetedi.

Olardyń ekeýi О́zbekstannyń beldi bylǵary qolǵap sheberleri. Máselen, 28 jastaǵy Fazlıddın Gaıbnazarovtyń Olımpıada chempıony degen dardaı ataǵy bar. 64 kılo salmaqta kúsh synasqan ol 2016 jyly Rıodaǵy oıyndarda qarsylas shaq keltirgen joq. Odan bólek, Tashkent oblysy Bekabad qalasynyń týmasy 2015 jyly Dohadaǵy álem chempıonaty men Bangkoktaǵy Azııa birinshilikterinde kúmis medaldi keýdesinde jarqyratty. 2017 jyldyń kókteminde kásipqoı boksqa aýysqan Gaıbnazarov sol kezden beri segiz jekpe-jek ótkizip, jeteýinde jeńiske jetti. Tórt básekeni merziminen buryn aıaqtady.

30 jastaǵy Hýrshıd Tojıbaev 2009 jylǵy qurlyq birinshiliginde kúmis alsa, 2010 jyly Gýanjoýda alaýy tutanǵan Azııa oıyndarynda qola medalǵa qol jetkizdi. 2008 jáne 2016 jyldary Olımpııa oıyndarynda baq synady. Beıjińde ol ekinshi kezeńde súrinse, Rıo-de-Janeıroda shırek fınalda súrindi. Boks ónerinde baı dástúri bar Jızaq óńirinde týyp-ósken Tojıbaev kásipqoı rıngte úsh kezdesý ótkizip, úsheýin de óz paıdasyna sheshti. Eki qarsylasyn aıqyn basymdyqpen utty.

29 jastaǵy Nıgerııa boksshysy Alıý Bamıdele Lasızıdiń de esimi sport súıer qaýymǵa tanys. Onyń kásipqoılar arasynda kúsh synasyp júrgenine tórt jyldan asty. О́z jekpe-jekterdiń denin Birikken Arab ámirligi men Ganada ótkizgen «qara marjan» 13 márte sharshy alańǵa shyǵyp, sol básekelerdiń barlyǵynda mereıi ústem boldy. Segiz qarsylasyn Lasızı nokaýtqa jiberdi.

Esterińizge sala keteıik, 16 jeltoqsanda «MTK Global Kazakhs­tan» kompanııasynyń muryndyq bolýymen Táýelsizdik kúnine oraı Almatyda uıymdastyrylyp otyrǵan boks keshinde Vıktor Kotochıgov, Sultan Záýirbek, Es­ken­dir Harsan, Abaı Tólesh, Raı Seıitjanov, Elshat Nyǵ­metolla, Nurtas Ájbenov, Mırasáli Sársenov jáne Nurdos Tólebaı syndy jerlesterimiz jarys kórigin qyzdyrady.  Olar birqatar shet memleketterden kelgen beldi boksshylarmen judyryqtasady.

 

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar