Prezıdent Jastar jylynyń jabylý jáne Volonter jylynyń ashylý saltanatynda 2020 jyldyń 1 qańtarynan bastap bakalavrıat, magıstratýra jáne doktorantýra stýdentteriniń stıpendııasyn 25 paıyzǵa kóterýdi Úkimetke júktegen bolatyn. «Bıyl qyrkúıekten bastap jumysshy mamandyqtary boıynsha bilim alatyn 122 myń stýdenttiń stıpendııasy 30 paıyzǵa kóterildi. 2020 jyldyń 1 qańtarynan bastap Úkimetke arnaıy orta bilim alatyn kolledj stýdentteriniń de stıpendııasyn 25 paıyzǵa arttyrýdy tapsyramyn», dedi Q.Toqaev.
Osydan soń ile-shala uıymdastyrylǵan shaǵyn jıynda mınıstr A.Aımaǵambetov stýdentterdiń stıpendııasyn kóterýge respýblıkalyq bıýdjetten qosymsha qarajat bólinetinin jetkizdi. «Memleket basshysynyń tapsyrmasy ýaqytynda oryndalady. Árıne oǵan qomaqty qarajat qajet. Aıtalyq, bir jylda JOO stýdentterine 13 mlrd teńge qarjy kerek. Endi oǵan kolledj stýdentterin qossaq, taǵy 5-6 mlrd teńge qajet bolady. Álbette, túptep kelgende aıtarlyqtaı soma shyǵady. Degenmen, bul mańyzdy sheshim. Stýdentter osy jańalyqty kóp kútti. Bizdiń stýdentter úshin bul – úlken qoldaý», dedi vedomstvo basshysy.
Aıta keteıik, jaǵymdy jańalyq barlyq stýdentterdi qýantpaq. Sebebi joǵary oqý ornyndaǵy bakalavrıat, magıstratýra, doktorantýrany qosa alǵanda izdenýshiler arasynda joǵary dárejeli stıpendııa alatyn stýdentter de bar. Budan bólek, múgedek, asyraýshysynan aıyrylǵan jandar da qosylady. Demek, elimizdiń barlyq stýdentteri jańa jyldan bastap bıylǵydan 25 paıyzǵa kóp stıpendııaǵa qol jetkizedi.
Baspasóz jıynynda JOO-lardaǵy máseleler de sóz boldy. Memleket basshysy Qasym-Jomart Toqaev halyqqa Joldaýynda bilim berýmen emes, dıplom satýmen aınalysatyn ýnıversıtetterdi qatań synǵa alyp, elimizdegi JOO-lar sanyn qysqartý kerektigin aıtqan edi. Q.Toqaevtyń tapsyrmasynan keıin mınıstr A.Aımaǵambetov tekseristiń bastalyp ketkenin jáne ýnıversıtetterge lısenzııany mınıstrlik beretindikten, aıyrýǵa da osy vedomstvonyń ýákiletti organ bolatynyn eske salǵan-dy. Sondaı-aq jabylǵan JOO-lardaǵy stýdentterdiń mundaı máselede zııan shekpeýi jan-jaqty qarastyrylatynyn aıtqan. Al osy brıfıngte vedomstvo basshysy buǵan deıingi tekseristiń qorytyndysy boıynsha 5 JOO-ny lısenzııasynan aıyrýdy josparlap otyrǵanyn jetkizdi. «Esterińizde bolsa, qarasha aıynda Shymkenttegi Aımaqtyq áleýmettik-ınnovasııalyq ýnıversıteti, Pavlodardaǵy Innovasııalyq Eýrazııa ýnıversıteti, «Almaty» ýnıversıteti, О́skemendegi Qazaqstan-Amerıka erkin ýnıversıteti jáne Aqtóbedegi qazaq-orys halyqaralyq ýnıversıteti lısenzııasynyń jumysy toqtatylǵan bolatyn. Qazir biz qosymsha tekseris júrgizip jatyrmyz jáne onyń nátıjesimen jaqynda taǵy bes JOO-nyń lısenzııasyn toqtatý týraly sheshim shyǵardyq. Olar zańǵa sáıkes bul sheshimge 10 kún ishinde shaǵym túsirýge quqyly. Eger shaǵymdaný nemese sotta basqa sheshim bolmasa, biz qandaı JOO-lar ekenin aıta alamyz», dedi Bilim jáne ǵylym mınıstri.
Budan bólek, brıfıngte ýnıversıtetterdegi qordalanǵan, kóp kúttirmeı sheshimin tabýdy qajet etetin máseleler de aıtyldy. Onyń birin A.Aımaǵambetov ashyq atady. «Biz birinshi kýrsqa bes stýdent qabyldanyp, aıaǵynda 150-ge jýyǵynyń bitirgeni týraly faktilerdi kórip otyrmyz. Ekinshi, úshinshi kýrsta jón-josyqsyz jumys isteıtin JOO-lar basqa ýnıversıtetterdiń oqýdan shyǵarylǵan stýdentterin jınaıdy. Prezıdenttiń tapsyrmasyna sáıkes, biz joǵary oqý oryndaryna qoıylatyn talaptardy kúsheıttik, joǵary bilim berý salasynda tártip ornatý úshin qosymsha tetikter engiziledi», dedi ol.
