Memlekettik hatshy Qyrymbek Kósherbaev sóz basynda Táýelsizdik merekesi qarsańynda jyl saıyn Qazaqstannyń jarqyn bolashaǵy jolynda qajyrly eńbegimen qaltqysyz eńbek etip jatqan asyl azamattarymyzdy mártebeli memlekettik nagradalarmen marapattaý ıgilikti dástúrge aınalǵanyn atap ótti.
– Táýelsizdiktiń máni de, mańyzy men maǵynasy da aıryqsha. Qazaq degen halyqtyń san ǵasyrǵa jalǵasqan jáne búginde iske asqan armany. Derbes memleket qurý – halqymyzdyń baıyrqaly bostandyqqa, egemen eldikke, azat rýhqa degen arpalysynyń naqty jemisi. Táýelizdikti ornyqtyrýda Qazaqstannyń Tuńǵysh Prezıdenti – Elbasy Nursultan Nazarbaevtyń orasan zor kúsh-jigeri, tereń aqyl-parasaty, syndarly, salmaqty saıasaty jáne barlyq qazaqstandyqtyń birligi men jasampaz eńbegi aıryqsha ról atqarǵan. Búgingi tańda Táýelsizdikti nyǵaıtýdaǵy tarıhı joldy jalǵastyryp kele jatqan Memleket basshysy Qasym-Jomart Toqaev Qazaqstannyń taıaý jyldardaǵy qarqyndy damý baǵyttaryn belgilep, atalǵan mindetteri sheshýdiń naqty joldaryn kórsetip berdi. Bizdiń maqsat – osy keleli mindetterdi bárimiz jumylǵan judyryqtaı birge júzege asyryp, Táýelsizdigimizdi jańa beleske kóterý, Táýelsizdigimizdi baıandy etý. Bul oraıda sizder ár saladaǵy eńbekterińizben memlekettiliktiń irgesin bekemdeýge, elimizdiń áleýmettik-ekonomıkalyq qoǵamdyq-saıası jáne mádenı-rýhanı damýyna, salıqaly ult, salamatty urpaq qalyptastyrý isine eleýli úles qosyp júrsizder. Sondyqtan Memleket basshysynyń Jarlyǵymen sizder Táýelsiz elimizdiń joǵary memlekettik nagradalarymen marapattaldyńyzdar, – dedi Qyrymbek Kósherbaev.
Budan keıin Memlekettik hatshy birqatar azamatqa II, III dárejeli «Barys» ordenin, «Qazaqstannyń eńbek sińirgen qaıratkeri» qurmetti ataǵyn, «Parasat» ordenin, II dárejeli «Dostyq» ordenin, «Qurmet» ordenin, III dárejeli «Eńbek Dańqy» ordenin tapsyrdy. Sondaı-aq bir top ǵalym ál-Farabı atyndaǵy ǵylym men tehnıka salasyndaǵy 2019 jylǵy memlekettik syılyǵyn ıelendi. Buǵan qosa «Eren eńbegi úshin», «Shapaǵat» medaldaryn keýdesine taǵyp jáne Prezıdenttiń alǵys hatyn alyp mereıi tasyǵandar bar.
